ព័ត៌មានជាតិ

រដ្ឋបាលខេត្ត ចាប់ផ្តើមយុទ្ធនាការចាក់វ៉ាក់សាំងលើកុមារ ប្រមាណ១ម៉ឺននាក់ ក្នុងក្រុងបាត់ដំបង

បានផុស

៥ years មុន

នៅ

ថ្ងៃពុធ ១៨ សីហា ២០២១

ដោយ

រដ្ឋបាលខេត្តបាត់ដំបង បានចាប់ផ្តើមយុទ្ធនាការចាក់វ៉ាក់សាំងការពារជំងឺកូវីដ១៩ ប្រភេទស៊ីណូវ៉ាក់ជំហ៊ានដំបូង ដល់កុមារដែលមានអាយុចាប់ពី១២ឆ្នាំ ដល់១៧ឆ្នាំហើយ នាព្រឹកថ្ងៃទី១៨ខែសីហា ឆ្នាំ២០២១ នៅក្នុងក្រុងបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផេង សិទ្ធីអភិបាលក្រុងបាត់ដំបងមានប្រសាសន៍ឲ្យដឹងថា ការបើកយុទ្ធនាការចាក់ វ៉ាក់សាំងការពារជំងឺកូវីដ១៩លើកុមារ ដែលសិក្សានៅតាមសាលារដ្ឋនិងឯកជនចន្លោះ អាយុពី១២ដល់ ១៧ឆ្នាំ នៅក្នុងក្រុងបាត់ដំបង ដែលមានចំនួនប្រមាណ១ម៉ឺននាក់ ដោយធ្វើ ការសហការជាមួយគ្រូ បង្រៀនតាមសាលានីមួយៗ។ លោកបញ្ជាក់ថា យុទ្ធនាការចាក់វ៉ាក់សាំងការពារជំងឺកូវីដ១៩ដល់កុមារនេះ ធ្វើរយៈពេល១០ទៅ១៥ថ្ងៃ តាមស្ថានភាពជាក់ស្តែង ដែលមានមណ្ឌលចាក់វ៉ាក់សាំងចំនួនបី គឺនៅមណ្ឌលផ្សារទំនើបភួពុយ មណ្ឌលបូរីរំចេក និង មណ្ឌលសុខភាពចំការសំរោង។

ថ្លែងក្នុងពិធីបើកយុទ្ធនាការចាក់វ៉ាក់សាំងលើកុមារនេះ ឯកឧត្តម ងួន រតន អភិបាលខេត្តបាត់ដំបង បានមានប្រសាសន៍ថា នេះជាយុទ្ធនាការចាក់វ៉ាក់សាំងលើកទីបួនហើយក្នុងខេត្តបាត់ដំបង ដែលទីមួយចាក់មន្ត្រីរាជការស៊ីវិល ទីពីរចាក់លើប្រជាពលរដ្ឋ ទីបីចាក់លើ អតីតយុទ្ធជន និងលើកទីបួននេះ គឺចាក់លើកុមារ ដែលមានចន្លោះអាយុចាប់ពី១២ដល់១៧ ឆ្នាំនៅទូទាំងខេត្តបាត់ដំបង ដែលមានចំនួនប្រហែល១០ម៉ឺននាក់។

ឯកឧត្តមបញ្ជាក់ថាបច្ចប្បន្ននេះ ចំនួនសិស្សសាលា នៅខេត្តបាត់ដំបង ឆ្លងជំងឺកូវីដ១៩ ច្រើនគួរសម ដែលមានចំនួន២៥ដល់៣០នាក់ក្នុងមួយថ្ងៃៗ បើទោះជាសាសារៀននានា ត្រូវបានបិទបណ្តោះអាសន្នទៅហើយក្តី។ ដូច្នេះក្មួយៗកុមារត្រូវបន្តយកចិត្តដាក់បន្តអនុវត្តវិធានការសុខាភិបាល និង បន្តខិតខំសិក្សានៅផ្ទះ និង តាមរយៈអនឡាញ ។

ឯកឧត្តមអភិបាលខេត្តបញ្ជាក់ថា ដោយសារចំនួនឆ្លងលើសិស្ស មានតួលេខខ្ពស់នេះ ហើយទើប រាជរដ្ឋាភិបាលពន្លឿន ក្នុងការផ្តល់វ៉ាក់សាំងកាពារជំងឺកូវីដ១៩ ដល់កុមារជាសិស្ស ដើម្បីបញ្ចៀសការ ឆ្លងរាលដាលចូលសហគមន៍កាន់តែធំផង និង ដើម្បីតៀមបើកសាលាឡើងវិញផង ក្រោយពីទទួលបានវ៉ាក់សាំងទូទាំងប្រទេស ហើយនាពេលខាងមុខ៕

អត្ថបទ៖ សោ និយមរ័ត្ន