ទិញ​មៀនប៉ៃលិន​​ពី​កសិករ ​​​រដ្ឋាភិបាល​ឲ្យ​តម្លៃ​ខ្ពស់​ជាង​ទីផ្សារ​គុណ​ជាពីរ​

បើ​តាម​ប្រភព​ពី​កសិករ​ និងមន្រ្តី​ដែល​ទទួល​បន្ទុកឈរ​ចាំទិញ​មៀនប៉ៃលិន (តាង៉ែន) នៅ​ខេត្ត​បាត់ដំបង​បាន​ឲ្យ​ដឹង​ថា តម្លៃ​មៀនប៉ៃលិន ដែល​ក្រុម​ការងារ​​រដ្ឋាភិបាល​បាន​ចុះ​ទៅប្រមូលទិញ​ពី​កសិករ​​រាប់​តោនដោយ​ឲ្យ​តម្លៃ​្ទិញចូល​ខ្ពស់ជា​ង​ទីផ្សារ។

ការឈរទិញផ្លែតាង៉ែនចាប់តាំងពី​ថ្ងៃ​ដំបូង​កាលពីម្សិលមិញ​នេះ​ ក្រុមការងារទទួលទិញផ្លែតាង៉ែនចម្រុះខ្នាតរាប់សិបតោនពីកសិករផង និងពីក្រុមឈ្មួញកណ្តាលផងក្នុងតម្លៃ២៥០០រៀលក្នុង១គីឡូក្រាម ខណ:តម្លៃផ្លែតាង៉ែនក្នុងទីផ្សារបច្ចុប្បន្នត្រឹមជាង១៥០០រៀល ដល់១៨០០រៀលក្នុង១គីឡូក្រាមប៉ុណ្ណោះ។

ក្នុងឱកាសឈរទទួលទិញផ្លែតាង៉ែននៅក្នុងខេត្តបាត់ដំបង លោកនាយឧត្តមសេនីយ៍គតិបណ្ឌិតហ៊ីង ប៊ុនហៀង បានលើកឡើងថា ការទទួលទិញកសិផលផ្លែតាង៉ែនពីកសិករនេះ ជាយុទ្ធសាស្ត្ររបស់សម្តេចតេជោហ៊ុន សែន ក្នុងគោលបំណងជួយសម្រួលបញ្ហាកកស្ទះលើទីផ្សាររបស់ប្រជាកសិករ នៅក្នុងតំបន់ព្រំដែនពិសេសក្នុងមូលដ្ឋានខេត្តបាត់ដំបង។

ការឈរទិញនេះមិនមានកំណត់រយ:ពេលឡើយ ខណះដែលថ្ងៃផ្តើមទិញដំបូងចាប់ពីថ្ងៃទី១៨ខែសីហាឆ្នាំ២០២១តទៅ ក្រុមមន្ត្រីចាំទទួលទិញនៅទីលានទាត់បាល់វាលបែកចានខេត្តបាត់ដំបង និងនៅថ្ងៃបន្ទាប់ក្រុម​ការងារកងអង្គរក្ស នឹង​ចុះទិញដោយផ្ទាល់ដល់ចម្ការរបស់កសិករតែម្តងនៅតាមបណ្តាស្រុកជាច្រើន នៅតំបន់ព្រំដែន។

សូមបញ្ជាក់ផងដែរថា ក្នុងភូមិសាស្ត្រខេត្តបាត់ដំបងផ្ទៃដី ដែលបានដាំដុះមៀនប៉ៃលិនសរុប​ជាង ៥,៩៥០ហិកតា ក្នុងនោះប្រមូលផល ៥,៣៧២ហិកតា ដែល​ទទួល​បរិមាណផល​ប្រមាណ ១៥,៦៣៨តោន៕

អត្ថបទ៖ សៅ សារិទ្ធ