រកឃើញកូវីដ១៩ បំប្លែងថ្មី Delta ១៦៣ កើនដល់ជិត ១ ពាន់នាក់ ៤ រាជធានី-ខេត្តច្រើនជាងគេ

ក្រសួងសុខាភិបាលនៅថ្ងៃទី ២២ ខែសីហា ឆ្នាំ ២០២១ នេះ បានប្រ​កាស​ការរក​ឃើញ​ករណី​វីរុស​កូវីដ​១៩ បំប្លែងថ្មី ដែលតា (Delta) ចំនួន​១៦៣ នាក់​ថ្មីបន្ថែម​ទៀត ធ្វើឱ្យចំនួនអ្នកឆ្លងសរុបកើនដល់ ៩៩៩ នាក់ ដែលបានប៉ះពាល់ដល់ ២៣ រាជធានី-ខេត្ត លើកលែងតែខេត្តចំនួន២ គឺខេត្តកែប និងខេត្តក្រចេះ នៅមិនទាន់រកឃើញ។

នៅក្នុងចំណោមរាជធានី-ខេត្តដែលរកឃើញវីរុសបំប្លែងថ្មីទាំងនោះ មានរាជធានី-ខេត្តចំនួន ៤ ឆ្លងច្រើនជាងគេ គឺរាជធានីភ្នំពេញ ចំនួន ២៣៨ ករណី ខេត្តឧត្តរមានជ័យ ១៧៦ ករណី ខេត្តសៀមរាប ១៣៨ ករណី និងខេត្តបន្ទាយមានជ័យ ១៤៦ ករណី។

លោកស្រី ឱ វណ្ឌឌីន បញ្ជាក់ក្នុងសេចក្ដីប្រកាសនៅថ្ងៃទី ២២ ខែសីហានេះថា វីរុសដែលតា កំពុងបន្តរាត្បាតក្នុងសហគមន៍ជាពិសេសរាជធានីភ្នំពេញ ខេត្តឧត្តរមានជ័យ សៀមរាប ព្រះវិហារ កំពង់ចាម កំពង់ធំ កណ្ដាល បន្ទាយមានជ័យ និងបណ្ដាខេត្តមួយចំនួនទៀត៕ ដោយ៖ ឡេង ដេត