ចាប់ឃុំខ្លួនបុរសស្ត្រី២នាក់ប្ដីប្រពន្ធតាមសាលក្រមតុលាការ ចោទពីបទឆបោក

តាមអំណាចសាលក្រមតុលាការ នៅល្ងាចថ្ងៃទី០៦ ខែកញ្ញា ឆ្នាំ២០២១នេះ សមត្ថកិច្ចនគរបាលព្រហ្មទណ្ឌកម្រិតស្រាលរាជធានី បានចាប់ខ្លួនបុរសស្ត្រី២នាក់ប្ដីប្រពន្ធ យកទៅឃុំខ្លួនដាក់ពន្ធនាគារក្រោមការចោទប្រកាន់ពីបទ ឆបោក។

ជនត្រូវចោទជាប្ដីឈ្មោះ អឿន គា អាយុ ៥៥ឆ្នាំ និងជនជាប់ចោទជាប្រពន្ធឈ្មោះ សេង ណាំង អាយុ ៥៣ឆ្នាំ  ទាំង២នាក់មានទីលំនៅ ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។

សមត្ថកិច្ចបានបញ្ជាក់ឱ្យដឹងថា ការចាប់ខ្លួន និងឃុំខ្លួនបុរសស្ត្រីទាំង២នាក់ គឺជាការអនុវត្តតាមអំណាចសាលក្រមរបស់ចៅក្រមសាលាដំបូងរាជធានីភ្នំពេញ ឈ្មោះ រ័ត្ន សុីថា ដែលមានខ្លឹមសារផ្ដន្ទាទោសឈ្មោះ អឿន គា និងឈ្មោះ សេង ណាំង ដាក់ពន្ធនាគារកំណត់២ឆ្នាំ និងបង្គាប់ឱ្យសងសំណងរដ្ឋប្បវេណីដល់ដើមបណ្ដឹងចំនួន២នាក់មានទឹកប្រាក់សរុបចំនួន ៩៤,០០០ដុល្លារ និង សំណងជំងឺចិត្ត សរុបចំនួន៤៥លានរៀល ក្រោមការចោទប្រកាន់ពីបទ “ឆបោក” តាមមាត្រា ៣៧៧ មាត្រា៣៧៨ នៃក្រមព្រហ្មទណ្ឌ ប្រព្រឹត្តកាលពីអំឡុងឆ្នាំ ២០១៨ នៅរាជធានីភ្នំពេញ៕

អត្ថបទ៖ មករា