ព័ត៌មានជាតិ
សម្ដេច នរោត្ដម ច័ក្រពង្ស់៖ ធុរកិច្ចរបស់ព្រះអង្គ នរោត្តម រ៉ាវីចក្រ ជាការវិនិយោគលក្ខណៈឯកជនសុទ្ធសាធ
ជាការឆ្លើយតបទៅនឹងការផ្សព្វផ្សាយព័ត៌មានខុសឆ្គង នៅក្នុងសារព័ត៌មានអន្តរជាតិក្នុងរយៈពេលប៉ុន្មានថ្ងៃកន្លងមកនេះ សម្ដេចព្រះមហិស្សរា នរោត្ដម ច័ក្រពង្ស់ បានចេញ សេចក្ដីថ្លែងការណ៍ នៅថ្ងៃទី២១ ខែកញ្ញានេះ ដោយបញ្ជាក់ថា ព្រះអង្គម្ចាស់ នរោត្ដម រ៉ាវីចក្រ ជាបុត្រាទី ៨ របស់ទ្រង់ និងជាព្រះអង្គម្ចាស់មួយអង្គក្នុងចំណោមព្រះអង្គម្ចាស់ខ្មែរជាច្រើនអង្គទៀតក្នុងរាជវង្សានុវង្សខ្មែរ។

សម្ដេចព្រះមហិស្សរា បានបញ្ជាក់ទៀតថា គ្មានព្រះអង្គម្ចាស់កម្ពុជាណា ដែលត្រូវបានតែងតាំងជាព្រះអង្គម្ចាស់គ្រងរាជ្យសម្បត្តិបន្ត ឬទទួលគោរម្យងារដែលហៅថា “ព្រះរាជ្ជទាយាទ” ដែលមិនធ្លាប់មាននៅក្នុងព្រះរាជាណាចក្រកម្ពុជាឡើយ។
សម្ដេចព្រះមហិស្សរា បានបញ្ជាក់បន្តថា ធុរកិច្ចរបស់ព្រះអង្គ នរោត្តម រ៉ាវីចក្រ គឺជាការវិនិយោគជាលក្ខណៈឯកជនសុទ្ធសាធ ហើយមិនមានអ្វីពាក់ព័ន្ធនឹងបុគ្គល ឬស្ថាប័នណាមួយនៅក្នុងប្រទេសកម្ពុជាទេ ក្រៅពីព្រះអង្គម្ចាស់ផ្ទាល់។

សម្ដេចព្រះមហិស្សរា នរោត្ដម ច័ក្រពង្ស់ បានបញ្ជាក់ថា យោងតាមរដ្ឋធម្មនុញ្ញប្រទេសកម្ពុជាគឺ ជារាជាធិបតេយ្យអាស្រ័យរដ្ឋធម្មនុញ្ញ ដែលព្រះមហាក្សត្រ ត្រូវបានជ្រើសរើសដោយក្រុមប្រឹក្សារាជសម្បត្តិ។ គោរម្យងារដែលគេហៅថា “ព្រះរជ្ជទាយាទ” មិនមាន ហើយមិនធ្លាប់មាននៅក្នុងប្រទេសកម្ពុជា។
គួររំលឹកថា តាមការផ្សាយដោយសារព័ត៌មានដ៏ល្បីៗដូចជា Le Parisien, Yahoo Sport និង Archysport នៅថ្ងៃអាទិត្យ ទី១៩ ខែកញ្ញា ឆ្នាំ២០២១នេះ បានបញ្ជាក់ថា ព្រះអង្គម្ចាស់ នរោត្តម រ៉ាវីចក្រ បានដាក់សំណើចំនួន ១០០ លានអឺរ៉ូកាលពីថ្ងៃសុក្រ ដល់ធនាគារ KPMG បញ្ជាក់ពីបំណងធ្វើជាម្ចាស់ក្លិបបាល់ទាត់របស់ប្រទេសបារាំង “AS Saint-Etienne”។ ពាក់ព័ន្ធទៅនឹងការចុះផ្សាយរបស់សារព័ត៌មានបរទេសនេះ ក្រសួងព្រះបរមរាជវាំងនៅថ្ងៃទី២០ ខែកញ្ញានេះ បានចេញសេចក្តីប្រកាសថា យោងតាមរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្តីពីការរៀបចំ និងការប្រព្រឹត្តទៅរបស់ក្រុមប្រឹក្សារាជសម្បត្តិនៃព្រះរាជាណាចក្រកម្ពុជា មិនមានចែងអំពីការចាត់តាំង ព្រះរជ្ជទាយាទ “Prince Héritier” ទេ ហើយក៏ពុំមានចែងអំពីស្ថាប័ន ឬបុគ្គលណាមួយមានសិទ្ធិអំណាចចាត់តាំងព្រះរជ្ជទាយាទឡើយ។

គួរបញ្ជាក់ថា សម្តេចព្រះមហិស្សរា នរោត្តម ច័ក្រពង្ស់ ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាសមាជិក្រុមប្រឹក្សារដ្ឋធម្មនុញ្ញ។ ទ្រង់ជាព្រះរាជបុត្រា នៃព្រះករុណា ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ និងព្រះអង្គម្ចាស់ក្សត្រី ស៊ីសុវត្ថិ ពង្សសានមុនី។ សម្តេចព្រះមហិស្សរា ត្រូវជាព្រះរៀមបង្កើតមាតាទីទៃ នៃព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា៕
អត្ថបទ៖ ច័ន្ទ វីរៈ

-
ព័ត៌មានអន្ដរជាតិ៧ ថ្ងៃ ago
ពលរដ្ឋថៃ នៅជាប់ព្រំដែនមីយ៉ាន់ម៉ា កំពុងត្រៀមខ្លួនសម្រាប់ភាពអាសន្ន
-
បច្ចេកវិទ្យា៣ ថ្ងៃ ago
OPPO Reno14 Series 5G សម្ពោធផ្លូវការហើយ ជាមួយស្ទីលរចនាបថកន្ទុយទេពមច្ឆា និងមុខងារ AI សំខាន់ៗ
-
ព័ត៌មានអន្ដរជាតិ៥ ថ្ងៃ ago
ថៃ អះអាងថា ជនកំសាកដែលលួចវាយទាហានកម្ពុជា គឺជាទេសចរ ប៉ុណ្ណោះ
-
ព័ត៌មានជាតិ៥ ថ្ងៃ ago
កម្ពុជា រងឥទ្ធិពលពីព្យុះមួយទៀត គឺជាព្យុះទី៥ ឈ្មោះ ណារី (Nari)
-
ព័ត៌មានអន្ដរជាតិ៣ ថ្ងៃ ago
រដ្ឋមន្ត្រីក្រសួងថាមពលថៃ ប្រាប់ពលរដ្ឋកុំជ្រួលច្របល់ បើសង្គ្រាមផ្ទុះឡើង អ្នកខាតធំគឺខ្លួនឯង
-
ព័ត៌មានជាតិ១ សប្តាហ៍ ago
ព្យុះទី៣ និងទី៤ អស់ឥទ្ធិពល តែកម្ពុជានៅតែមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់
-
ព័ត៌មានអន្ដរជាតិ៥ ថ្ងៃ ago
«នាយករដ្ឋមន្ត្រី៣នាក់ក្នុងពេល៣ថ្ងៃ» ជារឿងដែលមួយពិភពលោក មិនអាចធ្វើបានដូចថៃ
-
សន្តិសុខសង្គម៥ ថ្ងៃ ago
អាវុធហត្ថបង្ក្រាបរថយន្ត ១ គ្រឿង លួចដឹកទឹកដោះគោស្រស់ ២៧ កេះ នាំចូលពីថៃ