វត្តនៅតាមស្រុក អ៊ូអរ ជាងក្រុង ខណៈក្រុងសៀមរាប កំពុង​បិទខ្ទប់​ច្រើនសង្កាត់

នៅថ្ងៃកាន់បិណ្ឌ១នេះ នៅខេត្តសៀមរាប ប្រជាពលរដ្ឋ ពុទ្ធបរិស័ទ ភាគច្រើន បានអញ្ជើញទៅធ្វើបុណ្យតាមវត្តនានានៅតាមស្រុក ក្រៅក្រុងសៀមរាប ខណៈក្នុងក្រុងសៀមរាប កំពុងឆ្លងរីករាលដាលជំងឺកូវីដ១៩ ហើយកំពុងបន្តការបិទខ្ទប់ច្រើនសង្កាត់។

បងប្អូនប្រជាពុទ្ធបរិស័ទនៅតាមបណ្តាភូមិ ឃុំ ស្រុក មានការស្លៀកពាក់សម្លៀកបំពាក់ទៅតាមប្រពៃណីដូនតាខ្មែរយើង បាននាំយកចង្ហានទៅកាន់ទីវត្តអារាម ដែលជាទីសក្ការៈរបស់ដូនតាខ្លួន បានធ្វើការគោរពបដិបត្តិតរៀងមក ប្រកបដោយទឹកមុខរីករាយ ក្នុងស្មារតីប្រុងប្រយ័ត្នខ្ពស់ នៅឱកាសកាន់បិណ្ឌ ក្នុងបរិបទជំងឺ កូវីដ១៩ កំពុងផ្ទុះតាមតំបន់ក្នុងខេត្តសៀម​រាប ដោយបានអនុវត្តនូវវិធានការរបស់ រាជរដ្ឋាភិបាល ៣កុំ ៣ការពារ និងសេចក្តីណែនាំរបស់ក្រសួងសុខាភិបាលផងដែរ។

ភ្នាក់ងារព័ត៌មានកម្ពុជាថ្មី រាយការណ៍ថា មានតែបណ្តាវត្តអារាមនៅតាម ស្រុកតែប៉ុណ្ណោះ មានពុទ្ធបរិស័ទអញ្ជើញទៅធ្វើបុណ្យ ខណៈវត្តនៅក្នុងសង្កាត់ទាំង ១២ នៅក្នុងក្រុង មិនសូវជាមានប្រជាពលរដ្ឋ ពុទ្ធបរិស័ទអញ្ជើញទៅនោះទេ ដោយ​សារតែសង្កាកត់ទាំង ១២ ក្នុងក្រុង ត្រូវបានបិទខ្ទប់ កំណត់ជាតំបន់ក្រហម និងលឿងទុំ។

នៅតាមបណ្តាវត្តមួយចំនួនតាមបណ្តាស្រុក  លើការអនុវត្តវិធានការ ៣កុំ ៣ការពារ នៅមានខ្វះចន្លោះនៅឡើយ  មិនទាន់បានគោរពទៅតាមការណែនាំរបស់រដ្ឋបាលខេត្តនៅឡើយ ដែលជាចំណោទបញ្ហាហានីភ័យខ្ពស់ នៃការឆ្លងជំងឺដ៏កាចសាហាវនេះ៕

អត្ថបទៈ គឿន វេត