ឃាត់ខ្លួនយុវជន១២នាក់ ជួលផ្ទះសំណាក់ ប្រើប្រាស់ថ្នាំញៀន

ក្រុមយុវជនចំនួន១២នាក់ ត្រូវបានកម្លាំងការិយាល័យនគរបាលប្រឆាំងគ្រឿងញៀន សហការជាមួយកម្លាំងបង្ការ-បង្ក្រាប ចុះក្រសោបបានទាំងសំបុក ខណៈពួកគេកំពុងសេពគ្រឿងញៀនក្នុងបន្ទប់ផ្ទះសំណាក់។

លោកវរសេនីយ៍ឯក សុខ និមល នាយការិយាល័យ ប្រឆាំងគ្រឿងញៀន បានបញ្ជាក់ថា កិច្ចប្រតិបត្តិការនេះ គឺបានធ្វើឡើងកាលពីវេលាម៉ោង ១០ និង ៤៥ នាទីយប់ ថ្ងៃទី២៤ ខែកញ្ញា ឆ្នាំ២០២១ ត្រង់ចំណុច ក្នុងបន្ទប់ផ្ទះសំណាក់ “មូនហៅស្ស” ស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង។

លោកនាយការិយាល័យបានបន្តថា កិច្ចប្រតិបត្តិការនេះ ដោយសារតែមានការសហការពីម្ចាស់ផ្ទះសំណាក់ ដែលបានរាយការទាន់ពេលវេលា គឺកម្លាំងឃាត់បានចំនួន ១២ នាក់ ព្រមទាំងបានដកហូតថ្នាំញៀនប្រភេទយ៉ាម៉ា ប្រភេទម៉ាទឹកកក និងប្រភេទថ្នាំគ្រវី អុិចស្តាសុី មួយចំនួន។

បច្ចុប្បន្នជនសង្ស័យដែលជាក្រុមយុវជនទាំង ១២នាក់ ក្នុងនោះមានស្រី ៤ នាក់ និងវត្ថុតាងមួយចំនួន ត្រូវបានកម្លាំងការិយាល័យជំនាញ រៀបចំសំណុំរឿង ដើម្បីបញ្ជូនទៅសាលាដំបូងហើយ ក្នុងការចាត់វិធានការតាមផ្លូវច្បាប់៕

អត្ថបទ៖ សោ និយមរ័ត្ន