ស្នងការក្រុងនឹងដាក់ពង្រាយរថយន្តពន្លត់អគ្គិភ័យ២១គ្រឿងត្រៀមសង្គ្រោះក្នុងឱកាសពិធីបុណ្យភ្ជុំបិណ្ឌ​

ស្នងការដ្ឋាន​នគរបាល​រាជធានី​ភ្នំពេញ នឹងធ្វើ​ការដាក់​ពង្រាយរថយន្ត​ពន្លត់​អគ្គិភ័យ​ចំនួន​២១គ្រឿង នៅ​តាម​គោលដៅ​ធំៗ​ចំនួន​៧ក្នុង​រាជធានី​ភ្នំពេញ ដើម្បី​ត្រៀម​ជួយសង្គ្រោះ​ដល់​ប្រជាពលរដ្ឋ​ដែល​អាច​កើត​ឡើង​ជាយថាហេតុ នាឱកាស​បុណ្យ​ភ្ជុំបិណ្ឌ​ខាងមុខនេះ ។​

លោក​វរសេនីយ៍ឯក សាន សុខ​សីហា អ្នកនាំពាក្យ​នៃ​ស្នងការដ្ឋាន​នគរបាល​រាជធានី​ភ្នំពេញ បានឱ្យដឹង​នៅ​ថ្ងៃទី ១ ខែតុលា​នេះ​ថា ក្នុងឱកាស​បុណ្យ​ភ្ជុំបិណ្ឌ​ខាងមុខនេះ កម្លាំង​នៃ​ការិយាល័យ​ពន្លត់​អគ្គិភ័យ​រាជធានី​ភ្នំពេញ ​បាន​ត្រៀម​ជាប្រចាំ​ការ២៤​ម៉ោង​លើ​២៤​ម៉ោង​ដោយបាន​បែង​ចែកជា​៧​គោលដៅ​ធំៗដែល​មាន​រថយន្ត​ចំនួន​២១​គ្រឿង និង​បាន​បែងចែក​កម្លាំង​ជា២​វេន ទាំងយប់​ទាំង​ថ្ងៃដើម្បី​ត្រៀមសង្គ្រោះបន្ទាន់​នៅពេល​ដែលមាន​បញ្ហា​អគ្គិភ័យ​កើតឡើង​ភ្លាមៗ​។​

លោក​វរសេនីយ៍ឯក បាន​សំណូមពរ​ដល់​ប្រជាពលរដ្ឋ​ទាំងអស់ត្រូវ​ចូលរួម និង​ប្រុងប្រយ័ត្ន​រក្សា​ការពារ​ទាំងអស់គ្នា ចំពោះ​ចរន្ត​ភ្លើងអគ្គិសនី ភ្លើង​ធូប ទៀន និង​ចង្ក្រានហ្គាស​ជាដើម នៅមុន​ពេលដែល​ចាកចេញ​ពី​លំនៅដ្ឋាន ដើម្បី​ចៀសវាង និង​បង្ការ​កុំ​ឱ្យមាន​គ្រោះ​អគ្គិភ័យ​កើតឡើង​ដែល​ធ្វើឱ្យ​ខូ​ខាត់​ទ្រព្យសម្បត្តិ​ឬ​ឈានដល់​បាត់​បង់​អាយុជីវិត​ទៀតផង​។​

យោងតាម​គណៈកម្មាធិកា​រ​ជាតិ​គ្រប់គ្រង​គ្រោះមហន្តរាយ​បានឱ្យដឹងថា​ ក្នុង​រយៈពេល​៨ខែ ​ឆ្នាំ​២០២១​នេះ​នៅ​រាជធានី​ភ្នំពេញ​មានអគ្គិភ័យ​កើតឡើង​ចំនួន​៨៥​លើក​ បណ្តាលឱ្យ​ឆេះ​ផ្ទះ​ចំនួន​៩៩​ខ្នង តូប​ផ្សារ​៣​តូប​

ឃ្លាំ​ងទំនិញ​៩​កន្លែង អគារ​រដ្ឋបាល​១​កន្លែង​រោងចក្រ​សិប្បកម្ម​២​កន្លែងស្លាប់​មនុស្ស​៨​នាក់​និង​របួស​២៨​នាក់​៕​

អត្ថបទ៖ សំអឿន​