លោក ឃួង ស្រេង ចូលខ្លួនបង់​ការផាកពិន័យ ចំពោះកំហុសមិនពាក់មួកសុវត្ថិភាព

លោក ឃួង ស្រេង អភិបាលរាជធានីភ្នំពេញ នៅព្រឹកថ្ងៃទី ២៧ ខែតុលា ឆ្នាំ២០២១នេះ បានចូលខ្លួនទៅបង់ការផាកពិន័យ នៅអធិការដ្ឋាននគរបាលខណ្ឌដង្កោ ខណៈដែលលោកបានជិះម៉ូតូ មិនបានពាក់មួកសុវត្ថិភាព ពេលកំពុងចុះអន្តរាគមន៍ពិនិត្យស្ថានភាពទឹកជំនន់តាមសណ្តរស្ទឹងព្រែកត្នោត ក្នុងខណ្ឌដង្កោ កាលពីថ្ងៃទី ២៦ ខែតុលា។

បើតាមមន្ត្រីរដ្ឋបាលរាជធានីភ្នំពេញ បានឱ្យដឹងថា បន្ទាប់ពីមានការរិះគន់ លោក ឃួង ស្រេង អភិបាលរាជធានីភ្នំពេញ មិនពាក់មួកសុវត្ថិភាពពេលបេីកម៉ូតូ លោក ឃួង ស្រេង បានចូលខ្លួនទៅបង់ការផាកពិន័យចំពោះកំហុសឆ្គងអចេតនា នេះរួចហើយនៅអធិការដ្ឋាននគរបាលខណ្ឌដង្កោ។

មន្ត្រីដដែលបញ្ជាក់ថា តាមការពិតទៅពេលនោះលោកអភិបាលរាជធានីភ្នំពេញ ក៏បានយកមួកសុវត្ថិភាពមកពាក់ដែរ ប៉ុន្តែ ដោយកញ្ចក់ មួកសុវត្ថិភាព ស្រអាប់ពេក ពិបាកមេីលផ្លូវ ម្យ៉ាងទៀតដោយមានការបន្ទាន់ចុះពិនិត្យមេីលស្ថានភាពទឹកជំនន់ ដេីម្បីរកដំណោះស្រាយជួយប្រជាជនលោកអភិបាល ក៏បេីកម៉ូតូទៅដោយមិនបានពាក់មួក សុវត្ថិភាព។

ប៉ុន្តែទោះជាយ៉ាងណាក្ដី លោក អភិបាល ទទួលយកនូវមតិរិះគន់ដេីម្បីស្ថាបនា ទើបនៅព្រឹកថ្ងៃទី២៧តុលានេះ លោកអភិបាល ក៏ចូលខ្លួនទៅឱ្យមន្ត្រីចរាចរណ៍ ធ្វើការផាកពិន័យទៅតាមច្បាប់ សូមបងប្អូនមេត្តាយោគយល់ចំពោះកំហុស អចេតនានេះផង។

ក្រោយពីបានចូលខ្លួនទៅបង់ការផាកពិន័យ នៅអធិការខណ្ឌដង្កោហើយ លោកឃួង ស្រេង អភិបាលរាជធានីភ្នំពេញ ក៏បានបន្តចុះទៅដឹកនាំ អាជ្ញាធរនិងកងកម្លាំងបន្តទៀតនៅខណ្ឌដង្កោ ដើម្បីសង្គ្រោះ ប្រជាពលរដ្ឋ ខណៈពេលរដ្ឋមានទុក្ខ ដោយគ្រោះទឹកជំនន់នេះ៕

អត្ថបទ៖ ស្រីរ័ត្ន