ចាប់ឃុំខ្លួនស្ត្រីម្នាក់ តាមសាលក្រមតុលាការចោទពីបទឆបោក និងក្លែងបន្លំ ផ្ដន្ទាទោសដាក់ពន្ធនាគារ​២ឆ្នាំ

ស្ត្រីចំណាស់ម្នាក់ត្រូវបានសមត្ថកិច្ចចាប់ខ្លួន និងឃុំខ្លួនតាមដីកាបង្គាប់ឱ្យចាប់ខ្លួនតាមអំណាចសាលក្រមដែលចូលជាស្ថាពរ។

ជនជាប់ចោទត្រូវបានបញ្ជូនទៅកាន់ពន្ធនាគារព្រៃសឈ្មោះ កែវ សុីណា ហៅគិន អាយុ ៥៧ឆ្នាំ មានទីលំនៅភូមិលេខ៧ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។

លោកស្រី កែវ សុីណា ត្រូវបានតុលាការចោទប្រកាន់ពីបទ «ឆបោក និងសមគំនិតក្នុងអំពើក្លែងបន្លំ» តាមាត្រា ៧៧ មាត្រា៣៧៨ មាត្រា២៨ និងមាត្រា៦២៦ នៃក្រមព្រហ្មទណ្ឌ ប្រព្រឹត្តនៅរាជធានីភ្នំពេញកាលពីឆ្នាំ ២០១៦ ដល់ឆ្នាំ ២០២០។

អំពើល្មើសនេះត្រូវបានតុលាការចេញសាលក្រមព្រហ្មទណ្ឌលេខ ២៦២៩ ខ ចុះថ្ងៃទី ១០ កញ្ញា ឆ្នាំ២០២១ សម្រេចផ្ដន្ទាទោសឈ្មោះ កែវ សុីណា ដាក់ពន្ធនាគារកំណត់២ឆ្នាំ និងបង្គាប់អោយបង់ប្រាក់ពីន័យចំនួន ៦ លានរៀលចូលថវិការដ្ឋ ក្រោមការចោទប្រានពីបទ ឆបោក និងសមគំនិតក្នុងអំពើក្លែងបន្លំ និងចេញដីកាបង្គាប់ឱ្យសមត្ថកិច្ចស្វែងរកចាប់ខ្លួនជនត្រូវចោទយកមកអនុវត្តទ័ណ្ឌកម្មទោសតាមសេចក្ដីសម្រេចនេះ។ ហេតុដូច្នេះហើយទើបសមត្ថកិច្ចបញ្ជូនជនត្រូវចោទទៅមន្ទីរឃុំឃាំងព្រៃស៕

អត្ថបទៈ មករា