កម្លាំង​ចម្រុះ​ត្រៀម​ចុះបង្ក្រាប​ករណីទន្រ្ទាន​យកដីព្រៃលិចទឹក​ក្នុង​ស្រុក​២ ខេត្តបន្ទាយមានជ័យ​

លោក នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជា​មេបញ្ជាការកងរាជអាវុធហត្ថលើផ្ទៃប្រទេស នៅព្រឹកថ្ងៃទី ២៩ ខែវិច្ឆិកា បានឱ្យកម្លាំង​អាវុធហត្ថខេត្តបន្ទាយមានជ័យចុះប្រតិបត្តិការបង្ក្រាបជនទាំងឡាយណាដែលចូលមកកាប់ទន្រ្ទានយកដីក្នុងតំបន់ព្រៃលិចទឹកក្នុងភូមិសាស្រ្ត ខេត្តបន្ទាយមានជ័យ។

ក្រោយពីទទួលបានបទបញ្ជាហើយលោកឧត្តមសេនីយ៍ត្រី បោន ប៊ិន មេបញ្ជាការកងរាជ​អាវុធហត្ថ​ខេត្តបន្ទាយមានជ័យ បានដឹកកម្លាំងអាវុធចំនួន ២១៩ នាក់ ចុះប្រតិបត្តិការបង្ក្រាប ជនទាំងឡាយ​ណា​ដែលចូលមកកាប់ទន្រ្ទានយកដីក្នុងតំបន់ព្រៃលិចទឹកក្នុងភូមិសាស្រ្តខេត្តបន្ទាយមានជ័យ។

ការចុះបង្រ្កាបនេះដឹកនាំដោយលោក អ៊ុំ រាត្រី អភិបាលខេត្តបន្ទាយមានជ័យ មេបញ្ជាការ កងរាជអាវុធហត្ថខេត្ត ស្នងការនគរបាលខេត្ត មេបញ្ជាការសឹករងខេត្ត មេបញ្ជាការកងពលតូច ថ្មើរជើង លេខ ៥១ អភិបាលស្រុក ពាក់ព័ន្ធមន្ទីរអង្គភាពពាក់ព័ន្ធជុំវិញខេត្ត។

លោកឧត្តមសេនីយ៍ត្រី បោន ប៊ិនបានប្រាប់អ្នកយកព័ត៍មានឲ្យដឹងថា​ក្រុមការងារបានចុះពិនិត្យការ​ឈូសឆាយរបស់ជនខិលខូចលួចឈូលឆាយដីព្រៃលិចទឹកយកធ្វើជាកម្មសិទ្ធិ នៅក្នុង២ស្រុក ១គឺ ស្រុកមង្គលបូរី និងស្រុកព្រះនេត្រព្រះ ដោយសម្រេចដកហូតដីក្នុង២​ស្រុកនេះយកមករក្សា​ទុកជា​សម្បត្តិរដ្ឋវិញ។

លោកឧត្តមសេនីយ៍ត្រី បោន ប៊ិនបានប្រាប់អ្នកយកព័ត៍មានឲ្យដឹងបន្តទៀតថា ក្នុងពីស្រុក​នេះសុទ្ធ​តែ​ជាព្រៃលិចទឹកជាជម្រកព្រៃត្រីពងកូនប៉ុន្តែត្រូវបានជនខិលខូច និងមន្ត្រីខិលខូច​លួចឈូស​ឆាយ​ទន្ទ្រាន​យកដីព្រៃលិច ទឹកទាំងអស់នោះ យកធ្វើស្រែជាកម្មសិទ្ធិអស់។

ក្រុមការងារបានចុះស្រាវជ្រាវនៅតំបន់ទាំងស្រុក២នេះបើឃើញជនខិលខូចណាលួចឈូសឆាយទន្ទ្រានយកដីព្រៃលិចទឹកក្រុមការងារនិងដកហូតដីទាំងអស់នេះយកមកដាំដើមឈើព្រៃលិចទឹកវិញទុកជាទ្រព្យសម្បត្តិរដ្ឋ តាមបទ បញ្ជាររបស់សម្ដេចតេជោហ៊ុនសែន នាយករដ្ឋមន្ត្រី។

ជាមួយគ្នានេះដែរនៅរដូវទឹកស្រកក្រុមការងារចម្រុះមិនអនុញ្ញាតឱ្យជិនខិលខូច ដែលបានឈូសឆាយកាន់កាប់ដីព្រៃលិចទឹកនេះ ធ្វើស្រែនៅលើដីខាងលើនេះជាដាច់ខាត ហើយ​តម្រូវឲ្យអាជ្ញាធរមូលដ្ឋាននិងមន្ត្រីជំនាញត្រូវធ្វើផ្លាកធំយកទៅបោះនៅលើទីតាំងដែលត្រូវដកហូតដីខាងលើនេះ កុំឱ្យគេបំផ្លាញបន្តទៅទៀត។

ក្រុមការងារ នឹងបន្តស្រាវជ្រាវរកអត្តសញ្ញាណជនខិលខូច ដើម្បីកសាងសំណុំរឿង បញ្ជូនទៅ​តុលា​ការចាត់វិធានការតាមផ្លូវច្បាប់ហើយ៕

អត្ថបទៈ វ៉ាន់ ណាង