សម្ដេច​ក្រឡាហោម ស ខេង ប្រកាស​ពីហានិភ័យ​ នៃគ្រឿងញៀន​ ខណៈ​ការចរាចរកើតឡើង ​ដាច់​ដោយឡែកៗ​ពីគ្នា

មានប្រសាសន៍​នៅ ក្នុងពិធីសម្ពោធអគារមណ្ឌលទទួលពលករកំរៀង​ ស្ថិតនៅ ភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង នាព្រឹកថ្ងៃចន្ទ ទី២០ ខែធ្នូ ឆ្នាំ២០២១ សម្ដេចក្រឡាហោមស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានប្រកាសពីហានិភ័យ នៃការចរាចរគ្រឿងញៀន ខណៈដែលសារធាតុញៀនត្រូវបានជនល្មើសចរាចរដាច់ដោយឡែកៗ​​ពីគ្នា ពិបាកត្រួតពិនិត្យ។

បើតាមសម្ដេចក្រឡាហោម ស ខេង និន្នាការនៃការចរាចរគ្រឿងញៀននៅ លើពិភពលោក ក៏ដូចជាក្នុងតំបន់ អនុតំបន់មិនមានការថមថយទេ ជាពិសេសគ្រឿងញៀនសំយោគ។

សម្ដេចបញ្ជាក់ថា គ្រឿងញៀនសំយោគនេះ ជាប្រភេទសារធាតុញៀន ដែលផ្សំឡើងដោយសារធាតុគីមីផ្សេងផ្សេងៗ ហើយគ្រឿងញៀនប្រភេទនេះ ពិបាកត្រួតពិនិត្យណាស់។

សម្តេចថា ករណីនេះ មិនខុសពីចោរលួចឡានពីព្រំដែនថៃទេ ដែលពួកគេមិនអាចយកឡានចូលមកស្រុកខ្មែរទាំងមូលបានទេ ដោយម្ដងគេយកកង់ ម្ដងយកចង្កៀង ម្ដងយកចង្គូត ម្ដងយកម៉ាស៊ីន… ហើយនៅ ពេលចូលមកដល់គេតំឡើងជាឡានវិញដដែល ដោយឡែកគ្រឿងញៀនក៏ដូចគ្នាដែរ គឺយកម្ដងសារធាតុនេះ ម្ដងសារធាតុនោះ “ឧទាហរណ៍ថា ៥មុខគេយកខុសៗគ្នាមក គេថាយកមកផលិតជី ឬមួយយកមកព្រលិតស្អីឯណាផ្សេងទៅវិញទេ ប៉ុន្តែទីបំផុតអត់ទេ យកមកផ្គុំគ្នាទៅ ជាសារធាតុញៀនតែម្ដង ដែលយើងចាប់បានប្រមាណ២តោនជាងនៅ កំពង់ស្ពឺ”។

សម្ដេចក្រឡាហោម ស ខេង បានលើកឡើងដែរថា នៅ ក្នុងកិច្ចប្រជុំកន្លងមក សម្ដេចបានស្នើឱ្យ​ក្រសួង​ដែលជាអ្នកចេញអាជ្ញាប័ណ្ណ រៀបចំឲ្យមានគណៈកម្មការមួយៗ ដើម្បីត្រួតពិនិត្យសារធាតុញៀន ហើយក្រសួងដែលជាអ្នកចេញអាជ្ញាប័ណ្ណ គឺត្រូវធ្វើប្រធានតែម្ដង បើមានការអីគាត់មានភាពងាយស្រួល។

សម្ដេចក្រឡាហោមអះអាងថា សមត្ថកិច្ចប៉ូលិស កងរាជអាវុធហត្ថ នៅ ពេលដែលមានការសង្ស័យ មិនអាចទៅ ឆែកបានទេ ប្រសិនបើគ្មានការអនុញ្ញាត ហើយករណីនៅ ស្រុករ៉ាល់នេះ គាត់បានយករោងចក្រផលិតស្វាយធ្វើជាខែល។

សម្តេចបានបញ្ជាក់ថា គ្រឿងញៀនដែលផលិតហើយ ទោះបីជាដឹកចេញនៅ កន្លែងណា ក៏ដោយក៏មិនអនុញ្ញាដែរ ពីព្រោះវាខុសច្បាប់អន្តរជាតិ ហើយធ្វើឲ្យខូចមុខមាត់របស់កម្ពុជាយើង ដែលពីមុនគេថាកម្ពុជាគ្រាន់តែជាប្រទេសឆ្លងកាត់ តែឥឡូវមិនត្រឹមតែឆ្លងកាត់ គឺជាកន្លែងផលិតផង។

សម្ដេចក្រឡាហោមស ខេង បានបញ្ជាក់ទៀតថា អ្នកជាប់ឃុំនៅ ទូទាំងប្រទេសកម្ពុជាយើងទាំងអស់មាន៣ម៉ឺន៨ ពាន់នាក់ ក្នុងនោះ ៥១ភាគរយ គឺជាអ្នកទោសគ្រឿងញៀន។ សម្តេចថា នេះជារឿងមួយធំណាស់ ពីព្រោះរដ្ឋយើងត្រូវចិញ្ចឹមនៅក្នុងពន្ធនាគារមួយខែៗអស់មិនតិចទេ។

សម្ដេចក្រឡាហោម ស ខេង អះអាងថា មេរកស៊ីគ្រឿងញៀនធំៗ វាអត់ជក់គ្រឿងញៀនទេ ប៉ុន្តែអ្នករកស៊ីតូចតាច រកស៊ីផងវាជក់ផង ហើយអាមេធំនេះមិនងាយចាប់បានទេ ពីព្រោះភាគច្រើនវានៅ ក្រៅ ប្រទេស ដូច្នេះអនាគតវានឹងប៉ះពាល់ដល់បុគ្គល ប៉ះពាល់ដល់ក្រុមគ្រួសារ និងប៉ះពាល់ដល់សង្គមរបស់យើងធ្ងន់ធ្ងរ ដែលយើងមានការបារម្ភ ហើយប្រសិនបើយើងមិនរួមគ្នា មិនគាំទ្រគ្នា ក្នុងការប្រយុទ្ធប្រឆាំងគ្រឿងញៀនទេ មិនបានទេ ពីព្រោះនេះជាបញ្ហាធំណាស់ សម្រាប់ជាតិរបស់យើង ប្រសិនបើយើងដោះស្រាយមិនបានទេ ស្ថានការណ៍នឹងជ្រុល៕

អត្ថបទ៖ កោះកែវ