ព័ត៌មានជាតិ

ប្រមុខការទូតកម្ពុជា ដឹកនាំកិច្ចប្រជុំគណៈកម្មការជាតិលើកទី២ សម្រាប់រៀបចំកិច្ចប្រជុំកំពូលអាស៊ាននៅឆ្នាំ២០២២

បានផុស

៥ years មុន

នៅ

ថ្ងៃអង្គារ ២៨ ធ្នូ ២០២១

ដោយ

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងជាប្រធានគណៈកម្មការជាតិ សម្រាប់រៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅឆ្នាំ២០២២ កាលពីព្រឹកថ្ងៃទី២៨ ខែធ្នូ ឆ្នាំ២០២១ បានដឹកនាំកិច្ចប្រជុំគណៈកម្មការជាតិលើកទី២ សម្រាប់រៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅឆ្នាំ២០២២ តាមរយៈប្រព័ន្ធវីដេអូ ដើម្បីពិនិត្យអំពីវឌ្ឍនភាពការងារ នៃការត្រៀមធ្វើជាប្រធានអាស៊ាន ឆ្នាំ២០២២ និងការងារត្រៀមសម្រាប់រៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧបនាយករដ្ឋមន្ត្រី ប្រាក់ សុខុន បានឲ្យដឹងថា នៅក្នុងកិច្ចប្រជុំគណៈកម្មការជាតិសម្រាប់រៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅឆ្នាំ២០២២ លោកបានដឹកនាំកិច្ចប្រជុំពិភាក្សា និងផ្លាស់ប្តូរយោបល់គ្នាលើបញ្ហាមួយចំនួនរួមមាន ខ្លឹមសារ ភ័ស្តុភារ ពិធីការ សន្តិសុខ ព័ត៌មាន ហិរញ្ញវត្ថុ ព្រឹត្តិការណ៍អម និងការគ្រប់គ្រងជំងឺកូវីដ១៩។

លោករដ្ឋមន្ត្រីក្រសួងការបរទេសកម្ពុជាបានបញ្ជាក់ដែរថា ជាក់ស្តែង ការងារទាំងអស់នេះតម្រូវឱ្យយើងមានការទទួលខុសត្រូវខ្ពស់ ក្នុងនាមជាប្រធានអាស៊ានឆ្នាំ២០២២ និងដើម្បីកិត្តិយសជាតិយើងទាំងមូល៕

ដោយ ៖ កោះកែវ