ព័ត៌មានជាតិ

២ សប្ដាហ៍ មានអ្នកដំណើរពីសិង្ហបុរី ជាង ១ ពាន់នាក់ ចូលតាមអាកាសយានដ្ឋានសៀមរាប

បានផុស

២ years មុន

នៅ

ថ្ងៃព្រហស្បតិ៍ ៣០ ធ្នូ ២០២១

ដោយ

រយៈពេលជិត ២ សប្ដាហ៍ ពោលគឺចាប់តាំងពីការបើកដំណើរការឡើងវិញនូវជើងហោះហើរអន្តរជាតិទៅកាន់អាកាសយានដ្ឋានអន្តរជាតិខេត្តសៀមរាប មានអ្នកដំណើរ ជាវិនិយោគិន និងភ្ញៀវទេសចរ ចំនួនជាង ១ ពាន់នាក់ មកពីប្រទេសសិង្ហបុរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ថោង រដ្ឋសក្ដិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ មានប្រសាសន៍ប្រាប់ កម្ពុជាថ្មី នៅថ្ងៃទី ៣០ ខែធ្នូ នេះថា បច្ចុប្បន្ន ក្រុមហ៊ុនអាកាសចរណ៍សាំងហ្គាពួរអ៊ែរឡាញ ធ្វើការហោះហើរមកកម្ពុជា ដោយចុះចតនៅ អាកាសយានដ្ឋានអន្តរជាតិខេត្តសៀមរាប ជារៀងរាល់ថ្ងៃ ឬ៧ ជើង ក្នុង១សប្ដាហ៍ ដែលក្នុងមួយជើងៗ មានអ្នកដំណើរពី ៦០ ទៅ ៧០នាក់។ ដូចនេះរយៈពេលជិត ២ សប្ដាហ៍ នៃការបើកការហោះហើរនេះ គឺមានអ្នកដំណើរ ឬអ្នកវិនិយោគ និងអ្នកទេសចរប្រហែល ១ ពាន់នាក់។

លោក ថោង រដ្ឋសក្ដិ មានប្រសាសន៍បញ្ជាក់ថា ពីមុននៅក្នុងដំណាក់កាលអនុវត្តវិធានការសុខាភិបាល និងតម្រូវឱ្យធ្វើចត្តាឡីស័ក ដើម្បីទប់ស្កាត់ការឆ្លងរាលដាលជំងឺកូវីដ-១៩ កម្ពុជាទទួលអ្នកដំណើរមកពីក្រៅប្រទេសក្នុង១ថ្ងៃ តែពី ១០០ ទៅ ២០០ នាក់។ ប៉ុន្តែចាប់ពីការបន្ធូបន្ថយលក្ខខណ្ឌដល់អ្នកដំណើរចាក់វ៉ាក់សាំង មិនបាច់ធ្វើចត្តាឡីស័ក ចាប់ពីថ្ងៃទី ១៥ ខែវិច្ឆិកានេះ ឃើញថា កម្ពុជា ទទួលអ្នកដំណើរពីបរទេសរហូតជាង ២ ម៉ឺននាក់ ដែលក្នុងមួយថ្ងៃ គឺអាចទទួលពី ៥០០ ទៅ ៦០០ នាក់។

លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានលើកឡើងថា ក្រោយពីរាជរដ្ឋាភិបាលកម្ពុជា បើកប្រទេសឡើងវិញ និងទទួលទេសចរវ៉ាក់សាំងពេញលេញនោះ ការត្រួតពិនិត្យត្រូវបានធ្វើឡើងដោយហ្មត់ចត់បំផុត។ ដោយភ្ញៀវត្រូវតែមានប័ណ្ណចាក់វ៉ាក់សាំងពេញលេញ និងត្រូវមានប័ណ្ណបញ្ជាក់ថាបានធ្វើ PCR ៧២ ម៉ោង មុនមកដល់គោលដៅ និងមានប័ណ្ណប្រកាសសុខភាព។

លោក ក្រុស សារ៉ាត់ បានឱ្យដឹងបន្ថែមថា ជាមួយគ្នានេះភ្ញៀវទេសចរអន្តរជាតិដែលត្រូវឆ្លងកាត់អាកាសយានដ្ឋានអន្តរជាតិសៀមរាប ត្រូវតែទទួលការធ្វើតេស្តរហ័សពីក្រុមការងារ។ បើអវិជ្ជមានគឺអាចធ្វើដំណើរកម្សាន្តបាន បើស្ថិតក្នុងករណីវិជ្ជមាន ត្រូវទទួលការថែទាំនិងព្យាបាល តាមការជ្រើសរើសមន្ទីរព្យាបាលតាមការចង់បានរបស់ភ្ញៀវ។ តែបើលទ្ធផលវិជ្ជមានពុំមានអាការៈសម្គាល់ គឺត្រូវធ្វើចត្តាឡីស័កនៅក្នុងបន្ទប់ដាច់ដោយឡែក នៃសណ្ឋាគារស្នាក់នៅនោះតែម្តង។

គួររំលឹកថា ក្រុមហ៊ុនអាកាសយានដ្ឋានកម្ពុជា និងក្រុមហ៊ុនអាកាសចរណ៍សិង្ហបុរី (SIA) បានចេញសេចក្តីប្រកាសព័ត៌មានរួម អំពីការចាប់ផ្តើមបើកដំណើរការឡើងវិញនូវជើងហោះហើរអន្តរជាតិទៅកាន់អាកាសយានដ្ឋានអន្តរជាតិខេត្តសៀមរាប ជាមួយនឹងជើងហោះហើររបស់ក្រុមហ៊ុនអាកាសចរណ៍ SIA ដែលបានចុះចតនៅម៉ោង ៩ និង ៤៥ នាទីព្រឹកថ្ងៃទី ១៧ ខែធ្នូនេះ។ ជើងហោះហើររបស់ SIA ទៅកាន់ខេត្តសៀមរាបបានក្លាយជាជើងហោះហើរអន្តរជាតិដំបូងគេ ដែលចុះចតនៅទីនោះ ចាប់តាំងពីខែមីនា ឆ្នាំ ២០២០ បន្ទាប់ពីផ្អាករយៈពេល ២០ ខែ។

ក្រុមហ៊ុនអាកាសចរណ៍ SIA ផ្តល់ជូនជើងហោះហើរភ្ញៀវដែលចាក់វ៉ាក់សាំងពេញលេញ “Vaccinated Travel Lane” ៤ ដងក្នុងមួយសប្តាហ៍ ពីខេត្តសៀមរាបទៅកាន់ប្រទេសសិង្ហបុរី ដែលអនុញ្ញាតឱ្យអ្នកធ្វើដំណើរដែលត្រូវបានចាក់វ៉ាក់សាំងគឺមិនតម្រូវឱ្យធ្វើចត្តាឡីស័កក្នុងប្រទេសសិង្ហបុរីឡើយ ប្រសិនបើពួកគេបំពេញតាមលក្ខខណ្ឌនៃកម្មវិធីនេះ៕

អត្ថបទ៖ ច័ន្ទ វីរៈ