កម្ពុជា រកចំណូលបានពីការនាំចេញ​ផលកសិកម្មប្រមាណជាង ​៥០០០លានដុល្លារ នៅឆ្នាំ ២០២១

ពេញ១ឆ្នាំ ២០២១ តម្លៃផលិតផលកសិកម្មសរុបរបស់កម្ពុជា មានទំហំ ១៨ ០៦៣ ១៣៥ ១៧៩ ដុល្លារអាមេរិក មានកំណើន ៤៣,៣៩% ធៀបទៅនឹងផលិតផលកសិកម្មសរុប ក្នុងឆ្នាំ២០២០។ ក្នុងនោះការនាំចេញសម្រេចបានទំហំទឹកប្រាក់ប្រមាណ ៥ ០៣៨ ៧០៩ ៧៦០ លានដុល្លារអាមេរិក មានកំណើន ២៤,៧៨% ធៀបទៅនឹងការនាំផលិតផលកសិកម្ម ឆ្នាំ២០២០។

យោងតាមរបាយការណ៍របស់ក្រសួងកសិកម្ម បង្ហាញតាមរយៈទំព័រហ្វេសប៊ុកផេកផ្លូវការរបស់រដ្ឋមន្រ្តី វេង សាខុន បានឲ្យដឹងថា ផ្នែកដំណាំមានទំហំទឹកប្រាក់ ១០ ៥៦៧ ០០០ ០០០ ដុល្លារអាមេរិក ក្នុងនោះនាំចេញមានទំហំទឹកប្រាក់ ៤ ៣២៣ ៧១៩ ៣០០ ដុល្លារអាមេរិក។ ផ្នែកផលិតកម្មសត្វ ៥ ១០០ ០០០ ០០០ ដុល្លារអាមេរិក ទំហំនៃការនាំចេញ ៤៥ ៧៩០ ៨១០ ដុល្លារអាមេរិក។ ផ្នែកផលិតផលជលផលសម្រេចបាន ១ ៧១២ ៨០០ ០០០ ដុល្លារអាមេរិក ទំហំនៃការនាំចេញ ៤ ០៩៩ ៥៣០ ដុល្លារអាមេរិក។ ផ្នែកព្រៃឈើសម្រេចបាន ៧៨ ៦៣៦ ៩៦៣ ដុល្លារអាមេរិក ក្នុងនោះទំហំនៃការនាំចេញ ៦០ ៤០១ ៩០៤ ដុល្លារអាមេរិក។ ផ្នែកកៅស៊ូសម្រេចបាន ៦០៤ ៦៩៨ ២១៦ ដុល្លារអាមេរិក ទំហំនៃការនាំចេញ ៦០៤ ៦៩៨ ២១៦ ដុល្លារអាមេរិក៕ ដោយ៖ ទួន​ សុផល