ស៊ីម៉ាក់រៀបចំផែនការយុទ្ធសាស្ត្របោសសម្អាតគ្រាប់យុទ្ធភណ្ឌមិនទាន់ផ្ទុះនៅកម្ពុជា

អង្គភាពស៊ីម៉ាក់បានរៀបចំផែនការយុទ្ធសាស្ត្រសម្រាប់បោសសម្អាតគ្រាប់យុទ្ធភណ្ឌមិនទាន់ផ្ទុះ នៅកម្ពុជា បន្ទាប់ពីបញ្ចប់ការបោសសម្អាតគ្រាប់មីនប្រឆាំងមនុស្សនៅចុងឆ្នាំ២០២៥ខាងមុខ។

លោក ហេង រតនាប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានមានប្រសាសន៍នៅក្នុងសិក្ខាសាលាកាលពីថ្ងៃទី៣១ ខែមករា នៅសណ្ឋានគារ Hyatt Regency Phnom Penhថា សិក្ខាសាលានេះ ធ្វើឡើងដើម្បីប្រមូលធាតុចូលក្នុងការរៀបចំផែនការយុទ្ធសាស្ត្រពង្រឹងសមត្ថភាពអង្គភាពស៊ីម៉ាក់សំរាប់ទ្រទ្រង់សភាពការណ៍សំណល់យុទ្ធភណ្ឌសង្គ្រាម នៅកម្ពុជាក្រោយឆ្នាំ២០២៥។

លោកអគ្គនាយកស៊ីម៉ាក់ បានបន្តថា ថ្វីត្បិតកម្ពុជា អាចបញ្ចប់ភារកិច្ចបោសសម្អាតគ្រាប់មីនប្រឆាំងមនុស្សស្របតាមអាណតិ្តរបស់អនុសញ្ញាអន្តរជាតិអូតាវ៉ា​នៃការហាមប្រាមការប្រើប្រាស់គ្រាប់មីនប្រឆាំងមនុស្ស​ត្រឹមចុងឆ្នាំ២០២៥ ​ប៉ុន្តែមានបញ្ហាសំណល់យុទ្ធភណ្ឌសង្គ្រាមដទៃទៀតដូចជា គ្រាប់បែកចង្កោម​គ្រាប់បែកទម្លាក់ពីយន្តហោះ​ និងសំណល់គ្រាប់មិនទាន់ផ្ទុះផេ្សងៗទៀត ​ទាមទារពេលវេលា និងអង្គភាពស៊ីម៉ាក់បន្តភារកិច្ចបោសសម្អាតកាកសំណល់យុទ្ធភណ្ឌសង្គ្រាមទាំងនោះបន្តទៀត។

លោកអគ្គនាយកស៊ីម៉ាក់បានបន្តទៀតថា រដ្ឋាភិបាលជប៉ុនតាមរយ:JICA បានគាំទ្រអង្គភាពស៊ីម៉ាក់នូវការផ្តួចផ្តើមឱ្យមានការគិតគូរផែនការយុទ្ធសាស្ត្រនៃការពង្រឹងសមត្ថភាព​និងតួរនាទីអង្គភាពស៊ីម៉ាក់ ក្រោយឆ្នាំ២០២៥ ​ជាច្រើនឆ្នាំមកហើយ​ ដើម្បីពង្រឹងធាតុទន់​ដូចជាបណ្តុះបណ្តាលធនធានមនុស្ស​ ពង្រីកទំនាក់ទំនងសហប្រតិបតិ្តការត្បូង-ត្បូងនិងមួយផ្នែកទៀតដើម្បីពង្រឹងធាតុរឹង​ ដូចជាការបំពាក់សម្ភារបច្ចេកទេស ​និងការកសាងសំណង់អាគារសិក្សា​ សារមន្ទីរជាដើម​។

យោងតាមផែនការយុទ្ធសាស្ត្រជាតិសកម្មភាពមីន ឆ្នាំ២០១៨-២០២៥ បានឲ្យដឹងថា នៅកម្ពុជា មានផ្ទៃដីសង្ស័យមានផលប៉ះពាល់ ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាមប្រមាណជាង១៩៧០គីឡូម៉ែត្រការ៉េ ក្នុងនោះប្រមាណ ៨៧៧គីឡូម៉ែត្រការ៉េជាដីមានផលប៉ះពាល់ខ្ពស់ដោយសារមីន ៤៩៩គីឡូម៉ែតការ៉េ ជាដីប៉ះពាល់ដោយគ្រាប់បែកចង្កោម និង៣៣គីឡូម៉ែត្រការ៉េ ជាដីមានផលប៉ះពាល់ដោយសារសំណល់ជាតិផ្ទុះពីសង្រ្គាម។ផ្ទៃដីសង្ស័យមានផលប៉ះពាល់ ដោយសារមីនគ្រាប់បែកចង្កោម និងសំណល់ជាតិផ្ទុះពីសង្គ្រាមប្រមាណជាង ១៩៧០គីឡូម៉ែត្រការ៉េនេះ គ្រោងនឹងត្រូវការថវិកាប្រមាណជាង៤០០លានដុល្លារសម្រាប់បោសម្អាត រយៈពេលពីឆ្នាំ ២០១៨ដល់ឆ្នាំ ២០២៥ខាងមុខ៕

អត្ថបទ៖ សំអឿន