អាជីវករ​ផ្សារទួលគោក ​៧០ ភាគរយ ​បើកតូប​ ស្តង់ លក់ដូរ​ ជាមួយ​នឹងអតិថិជនចេញ-ចូល​ផ្សារ​មាន​ចំនួន​តិច

អាជីវករផ្សារទួលគោកប្រមាណ ៧០ ភាគរយ បានបើកតូប ស្តង់ លក់ដូរ ខណៈដែលជំងឺកូវីដ-១៩ ប្រភេទអូមីក្រុងបាននិងកំពុងរីករាលដាលនៅរាជធានីភ្នំពេញ។

ប៉ុន្តែទោះបីជាយ៉ាងណាក្តី ការពង្រឹងវិធានការ បង្ការទប់ស្កាត់ជំងឺកូវីដ-១៩ គណៈកម្មការផ្សារនៅតែបន្តធ្វើជាប់ជាប្រចាំ ទៅតាមការណែនាំរបស់លោក ឃួង ស្រេង អភិបាលរាជធានីភ្នំពេញ។

មន្ត្រីក្នុងជួរគណៈកម្មការផ្សារទួលគោកបានឱ្យដឹងថា គណៈកម្មការផ្សារទួលគោកថ្ងៃទី ១៥ ខែកុម្ភៈ ឆ្នាំ២០២២នេះ បានដឹកនាំកម្លាំងផ្សព្វផ្សាយវិធានការទប់ស្កាត់ កូវីដ-១៩ ដោយត្រូវអនុវត្តនូវវិធាន ៣ការពារ ៣កុំ ជាប្រចាំថ្ងៃ។

បន្ថែមពីលើនេះ គណៈកម្មការផ្សារទួលគោកបានបន្តចែកម៉ាសដល់បងប្អូនអាជីវករនិងអតិថិជនដែលចេញ ចូលផ្សារនេះផងដែរ។

មន្ត្រីដដែលក៏បានបញ្ជាក់ផងដែរថា សម្រាប់ថ្ងៃទី ១៥ ខែកុម្ភៈនេះ អាជីវករ បានបើកតូបស្តង់លក់ដូរប្រហែល​៧០ភាគរយប៉ុណ្ណោះ ហើយសម្រាប់អតិថិជនចេញ-ចូលមកទិញទំនិញវិញក៏មានចំនួនតិចដែរ៕

អត្ថបទ៖ ស្រីរ័ត្ន