ព័ត៌មានជាតិ
លោក ទេព នីថា ៖ ដើម្បីសម្រេចបានជោគជ័យ លើការរៀបចំការបោះឆ្នោត ត្រូវតែរួមគ្នាអនុវត្តការងារដោយការទទួលខុសត្រូវ
លោក ទេព នីថា អគ្គលេខាធិការ នៃគណៈកម្មាធិកាជាតិរៀបចំការឆ្នោត (គ.ជ.ប) បានលើកឡើងថា ដើម្បីសម្រេចបានជោគជ័យលើការរៀបចំបោះឆ្នោត ត្រូវតែរួមគ្នាអនុវត្តការងារដោយការទទួលខុសត្រូវ តាមតួនាទីរៀងៗខ្លួន។
ការលើកឡើងខាងលើនេះ បានធ្វើឡើងក្នុងពិធីបិទសិក្ខាសាលា ស្ដីពី “ការអប់រំអ្នកបោះឆ្នោតជាប្រចាំនៅកម្ពុជា” ដែលរៀបចំឡើងរយៈពេល ២ថ្ងៃ សម្រាប់មន្រ្តី គ.ជ.ប, គណៈកម្មការរាជធានី-ខេត្តរៀបចំការបោះឆ្នោត (គធ.ខប) សមាគម និងអង្គការមិនមែនរដ្ឋាភិបាល នាថ្ងៃទី ២៥ ខែកុម្ភៈនេះ នៅសណ្ឋាគារកាំបូឌីយ៉ាណា ។
លោក ទេព នីថា បានថ្លែងថា សិក្ខាសាលានេះ គឺជាសិក្ខាសាលាលើកដំបូង នៃការអនុវត្តកម្មវិធីរួមគ្នារបស់ គ.ជ.ប-JICA ដើម្បីរួមគ្នាអភិវឌ្ឍន៍សមត្ថភាព ចំណេះដឹង ក្នុងគោលដៅធានាឲ្យបាននូវផែនការ កម្មវិធីអប់រំអ្នកបោះឆ្នោតជាប្រចាំ មានភាពពេញលេញគ្រប់គ្រាន់ គ្រប់ជ្រុងជ្រោយ ច្បាស់លាស់ និងមានប្រសិទ្ធភាព ជាមួយការគោរពយ៉ាងខ្ជាប់ខ្ជួន នូវគោលការណ៍លិទ្ធិប្រជាធិបតេយ្យសេរីពហុបក្ស ការគោរពសិទ្ធិ និងសេចក្ដីថ្លៃថ្នូរ ដើរទន្ទឹមគ្នានឹងបច្ចេកវិទ្យា វិទ្យាសាស្រ្ត និងព័ត៌មានវិទ្យា នាពេលបច្ចុប្បន្ន។
ដោយផ្អែកតាមរបាយការណ៍សង្ខេប នៃអង្គសិក្ខាសាលា លោក ទេព នីថា ជំរុញឲ្យអ្នកពាក់ព័ន្ធទាំងអស់ ត្រូវរួមគ្នាសម្រេចឲ្យបាននូវទិសដៅសំខាន់ៗចំនួន ៣ រួមមាន៖
ទី១. ត្រូវខិតខំរួមសហការគ្នា រៀបចំគម្រោងផែនការអប់រំអ្នកបោះឆ្នោត និងអនាគតអ្នកបោះឆ្នោតឲ្យបានហ្មត់ចត់ ច្បាស់លាស់ មានប្រសិទ្ធភាព និងមានលក្ខណៈវិទ្យាសាស្រ្ត គ្រប់ជ្រុងជ្រោយ។
ទី២. រៀបចំបង្កើតឯកសារមេរៀនអប់រំ និងឯកសារបណ្ដុះបណ្ដាល ឲ្យបានល្អគ្រប់គ្រាន់ ផ្អែកតាមច្បាប់ បទបញ្ជា និងនីតិវិធីបច្ចុប្បន្នភាព និងតាមរយៈស្មារតី នៃអង្គសិក្ខាសាលា នាពេលនេះផងដែរ។
ទី៣. បង្កើតក្រុមគ្រូឧទ្ទេសបណ្ដុះបណ្ដាល ក្រុមគ្រូបង្គោលអប់រំ ដែលមានជំនាញច្បាស់លាស់ មានគរុកោសល្យត្រឹមត្រូវ មានបទពិសោធន៍ ច្នៃប្រឌិត និងមានភាពវាងវៃគ្រប់គ្រាន់ ដែលអាចឆ្លើយតបទៅនឹងសេចក្ដីត្រូវការ ចាំបាច់។
ជាមួយគ្នានេះដែរ លោក ទេព នីថា បានអះអាងថា ចាប់ពីឆ្នាំ ២០២២ រហូតដល់ឆ្នាំ ២០២៤ គ.ជ.ប ត្រូវរៀបចំការបោះឆ្នោតចំនួន ៤ តាមការកំណត់ច្បាប់រួមមាន៖ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ថ្ងៃទី ៥ ខែមិថុនា ឆ្នាំ ២០២២, ការបោះឆ្នោតជ្រើសតាំងតំណាងរាស្រ្ត នីតិកាលទី ៧ ឆ្នាំ ២០២៣, ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ឆ្នាំ ២០២៤, និងការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង ស្រុក ខណ្ឌ លើកទី ៤ ឆ្នាំ ២០២៤។
លោក ទេព នីថា បានសង្កត់ធ្ងន់ថា តាមបទពិសោធន៍ ដើម្បីសម្រេចបានជោគជ័យ លើការងាររៀបចំការបោះឆ្នោតទាំងអស់នេះ គឺមានតែការរួមសហការគ្នា អនុវត្តប្រកបដោយការទទួលខុសត្រូវ តាមតួនាទីតាមការកំណត់នៃច្បាប់ និងសមស្របតាមសភាពការណ៍ ជាក់ស្ដែង៕
អត្ថបទ៖ កោះកែវ
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២៤ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង