​ប្រធានមន្ទីរ៖ ខេត្តប៉ៃលិនអាចផលិតមៀនបាន ៣ម៉ឺនតោន ក្នុងមួយឆ្នាំ សម្រាប់នាំចេញ

តាមការប៉ាន់ស្មានរបស់ប្រធានមន្ទីរកសិកម្មខេត្តប៉ៃលិន បានឲ្យដឹងថា លទ្ធផលនៃការត្រួតពិនិត្យមៀន នាំចេញទៅចិន អាចប្រើរយៈពេលពី ៦ខែ ទៅ៧ខែទៀត។ ទោះយ៉ាងណា កសិករ បានត្រៀមខ្លួនរួចជាស្រេច ក្នុងការផលិតមៀនប៉ៃលិន ដើម្បីនាំចេញទៅទីផ្សារប្រទេសចិន។ នេះបើតាមការបញ្ជាក់របស់លោក សាយ សុផាត ប្រធានមន្ទីរកសិកម្មខេត្តប៉ៃលិន។

ថ្លែងប្រាប់កម្ពុជាថ្មី នៅថ្ងៃទី ០៩ ខែ មីនានេះ លោក សាយ សុផាត បានលើកឡើងថា ខេត្តប៉ៃលិន អាចមានសមត្ថភាពផលិតផ្លែមៀន បានប្រមាណពី ២ម៉ឺន ទៅ ៣ម៉ឺនតោន ក្នុងមួយឆ្នាំ ពោលគឺក្នុងមួយថ្ងៃអាចប្រមូលផលបានពី ៤០តោន ទៅ ៥០តោន។ ក្នុងនោះ មានខេត្តផ្សេងៗមួយចំនួនទៀត ដែលមានដាំមៀនប៉ៃលិននេះដែរ មានដូចជា ខេត្តបន្ទាយមានជ័យ បាត់ដំបង ពោធិ៍សាត់ រតនគិរី មណ្ឌលគិរីជាដើម។​

បច្ចុប្បន្នសមាគមមៀនប៉ៃលិន បានដើរតួនាទីសំខាន់ក្នុងការបណ្តុះបណ្តាលបច្ចេកទេស អំពីរៀបដាំដុះ ការធ្វើឲ្យចេញផ្លែផ្កា ដល់កសិករ។ លោក សុផាត មើលឃើញថា កសិករនៅខេត្តប៉ៃលិន ប្រមាណ ៦០ភាគរយ បានយល់ដឹងច្រើន ពីចំណេះដឹង និងបច្ចេកទេសនៃការដាំដុះ។

ស្របពេលដែលភាគីចិន កំពុងធ្វើការត្រួតពិនិត្យ អាជ្ញារក៏ពន្លឿន ចុះបញ្ជី  GAP ដល់ចម្ការកសិករផងដែរ។​ មានន័យថា បញ្ជីការ GAP មានការទទួលស្គាល់គុណភាព ងាយស្រួលឲ្យកសិផលរបស់យើងអាចចរាចរក្រៅប្រទេសបាន។« រហូតមកដល់ពេលនេះ យើងបានចុះបញ្ជីការ GAP បានច្រើនគ្រួសារហើយ»។ នេះជាការបន្ថែមរបស់ប្រធានមន្ទីរកសិកម្មខេត្តប៉ៃលិន។

បើតាម​ប្រធាន​មន្ទីរ​កសិកម្ម​ខេត្តប៉ៃលិន បានឲ្យដឹងថា ផ្ទៃដី​ដាំ​ដុះ​ដំណាំ​មៀន​ក្នុង​ខេត្ត​ប៉ៃលិន​មាន​ជិត ៤ ​ពាន់​ហិកតា ខណៈ​ខេត្តបាត់ដំបង​មាន​ជិត ៧ ​ពាន់​ហិកតា​។ តាមការប៉ាន់ស្មាន តួលេខសរុប ផ្ទៃដីដាំមៀនប៉ៃលិន ទាំងអស់មានប្រមាណជាង ២ម៉ឺនហិកតា។

សូមបញ្ជាក់ថា ក្រសួង​កសិកម្ម ​កំពុង​រង់ចាំ​ចម្លើយ​ពី​រដ្ឋបាល​គយ​ចិន ដើម្បី​ឈានទៅ​ចុះហត្ថលេខា​លើ​ពិធីសារ​បើកផ្លូវ​សម្រាប់​ការនាំចេញ​ផ្លែ​មៀន​កម្ពុជា ​ទៅកាន់ទីផ្សារ​ប្រទេស​ចិន ក្រោយ​រដ្ឋបាល​គយ​ចិន​ បានធ្វើ​ការវិភាគ​ទៅលើ​ហានិភ័យ និង​ត្រួតពិនិត្យ​ផ្លែ​មៀន​កម្ពុជា តាមរយៈ​វីដេអូ ខណៈ​តំណាង​ស្ថានទូត​ចិន និង​មន្ត្រី​ក្រសួងកសិកម្ម​កម្ពុជា ​បាន​ចុះទៅពិនិត្យ​ចម្ការ​ផ្លែ​មៀន​ចំនួន ៣ ​កន្លែង ​ក្នុង​ខេត្ត​ប៉ៃលិន និង​ខេត្តបាត់ដំបង និង​រោងចក្រ​វេចខ្ចប់​ចំនួន ២​ កន្លែង​ក្នុង​ខេត្ត​ប៉ៃលិន និង​ខេត្ត​កំពង់ស្ពឺ​កាលពីដើម​ខែ​មករា​នេះ​៕

អត្ថបទ៖ ទួន សុផល