ដាក់ចេញវិធានការ ១០ ចំណុច ដើម្បីពង្រឹងសន្តិសុខ និងសុវត្ថិភាព ក្នុងខេត្តព្រះសីហនុ

អគ្គស្នងការដ្ឋាននគរបាលជាតិ បានសម្រេចដាក់ចេញនូវវិធានការចំនួន ១០ចំណុច ដើម្បីពង្រឹងសន្តិសុខ សុវត្ថិភាព ក្នុងខេត្តព្រះសីហនុ ឲ្យកាន់តែប្រសើរឡើងថែមទៀត។

ការដាក់ចេញវិធានការ ១០ចំណុចនេះ បន្ទាប់ពីលោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរ បាលជាតិ, លោកនាយឧត្តមសេនីយ៍គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍, និងលោក គួច ចំរើន អភិបាល នៃគណៈអភិបាលខេត្តព្រះសីហនុ បានដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត និងស្ថាប័នតុលាការនៅខេត្តព្រះសីហនុ តាមការណែនាំរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅក្នុងពិធីបិទសន្និ​បាត​បូក​សរុប​លទ្ធផល​ការងារ​ប្រចាំឆ្នាំ​ ២០២១​ និង​លើក​ទិស​ដៅ​ការងារ​ឆ្នាំ​ ២០២២​ របស់​រដ្ឋបាល​ខេត្ត​ព្រះ​សីហ​នុ​ ​កាលពីថ្ងៃទី ៩ ខែមីនា ឆ្នាំ ២០២២។

លោក គួច ចំរើន បានមានប្រសាសន៍ នៅក្នុងពិធីបិទសន្និបាតថា វិធានការទាំង ១០ចំណុចនោះ រួមមាន៖ ១.ណែនាំស្នងការដ្ឋាននគរបាល និងបញ្ជាការដ្ឋានកងរាជអាវុធហត្ថខេត្ត ជាសេនាធិការឲ្យគណៈបញ្ជាការឯកភាពរដ្ឋបាលខេត្ត ក្នុងការរៀបចំផែនការការពារ និងផែនទីសម្រាប់ប្រតិបត្តិការដោយមានការគាំទ្រពីកម្លាំងជំនាញ របស់អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍។

២.អគ្គស្នងការដ្ឋាននគរបាលជាតិ នឹងគោរពស្នើសុំគោលការណ៍ទៅ លោក អូន ព័ន្ធមុន្នីរ័ត្ន ឲ្យចាត់ក្រុមការងារ នៃអគ្គលេខាធិការដ្ឋានគ្រប់គ្រង ល្បែងអាជីវកម្មមកប្រចាំការ នៅក្នុងខេត្តព្រះសីហនុ ដើម្បីសហការជាមួយគណៈបញ្ជាការឯកភាពរដ្ឋបាលខេត្ត ចុះពិនិត្យនៅតាមទីតាំងកាស៊ីណូ។

៣.បង្កើនការគ្រប់គ្រងលើទីតាំងអាជីវកម្ម និងការស្នាក់នៅរបស់ជនបរទេស ដោយមានការចូលរួមពីក្រុមការងារ នៃអគ្គនាយកដ្ឋានអន្តោប្រវេសន៍ ដើម្បីទប់ស្កាត់បទល្មើសរត់ពន្ធមនុស្ស  និងការជួញដូរកម្លាំងពលកម្ម។

៤.រដ្ឋបាលខេត្ត ត្រូវរៀបចំក្រុមការងារតាមដាន បណ្ដាញព័ត៌មានជាភាសាចិន ដើម្បីឆ្លើយតបបកស្រាយ និងផ្សព្វផ្សាយអំពីព័ត៌មានពិត។ ៥.រដ្ឋបាលខេត្ត ត្រូវបង្កើនទំនាក់ទំនង និងជួបប្រជុំជាប្រចាំជាមួយសមាគមចិន ដែលមានទីតាំងនៅខេត្តព្រះសីហនុ។ ៦.ចំពោះបទល្មើសឧក្រិដ្ឋ ដែលពាក់ព័ន្ធការប្រើប្រាស់អាវុធខុសច្បាប់ ការជួញដូរគ្រឿងញៀន អំពើឃាតកម្ម ការរត់ពន្ធមនុស្ស ការបង្ខាំងមនុស្សជំរិតទារប្រាក់។ល។ ស្នើស្ថាប័នតុលាការផ្ដន្ទាទោសឲ្យបានម៉ឺងម៉ាត់ និងត្រូវបណ្តេញចេញក្រោយពីអនុវត្តទោសរួចរាល់។

៧.ឯកភាពលើការចុះអនុវត្តរដ្ឋបាលចំហរ នៅតាមតំបន់តូចៗ នៅតាមអគារ ឬនៅតាមតំបន់ប្រមូលផ្ដុំ។ ៨.រៀបចំកម្លាំងត្រួតពិនិត្យតាមដងផ្លូវ ដើម្បីឆែកឆេររកអាវុធជាតិផ្ទុះគ្រឿងញៀន ការប្រើប្រាស់ស្លាកលេខ ន.ប ខ.ម ធ្វើអាជីវកម្ម និងបើកបរដោយជនបរទេស ត្រូវអនុវត្តជាប្រចាំ ឆ្លាស់វេន និងឆ្លាស់ទីតាំង។

៩.ស្ថាប័នថ្នាក់ជាតិគាំទ្រលើវិធានការ របស់គណៈបញ្ជាការឯកភាពរដ្ឋបាលខេត្ត ដើម្បីស្រាវជ្រាវបទល្មើសជួញដូរ ប្រើប្រាស់ កាន់កាប់អាវុធខុសច្បាប់របស់ជនបរទេស។ ១០.គ្រប់ស្ថាប័នកងកម្លាំងឈរជើងលើផ្ទៃសមុទ្រ ត្រូវសហការឲ្យបានល្អប្រសើរ ជាមួយគណៈបញ្ជាការឯកភាពរដ្ឋបាលខេត្ត ក្នុងការទប់ស្កាត់បទល្មើសតាមផ្លូវទឹក ដូចជាការរត់ពន្ធមនុស្សឆ្លងដែន ការរត់ពន្ធគ្រឿងញៀន និងការជួញដូរអាវុធខុសច្បាប់។

លោកអភិបាលខេត្តព្រះសីហនុ បានប្ដេជ្ញារួមគ្នាពុះពារយ៉ាងប្ដូរផ្ដាច់ ដើម្បីរក្សាការពារសន្តិភាព ឯករាជ្យ បូរណភាពទឹកដី អធិបតេយ្យភាព រក្សាការពារសន្តិសុខ សណ្តាប់ធ្នាប់ និងសុវត្ថិភាពសង្គមឲ្យបានល្អប្រសើរ លើកកម្ពស់ស្មារតីទទួលខុសត្រូវ ក្នុងការអនុវត្តតួនាទីភារកិច្ច របស់រដ្ឋបាលខេត្ត ដើម្បីចូលរួមអភិវឌ្ឍន៍ប្រទេសជាតិ៕

អត្ថបទ៖ សំអឿន