កម្ពុជា នាំចេញជ័រ និងឈើកៅស៊ូ បានជាង ៩៩លានដុល្លារ នៅត្រីមាសទី១

ចំណូលសរុបគិតត្រឹមត្រីមាសទី១ ឆ្នាំ២០២២នេះ ការនាំចេញជ័រកៅស៊ូ និងឈើកៅស៊ូ មានចំនួន ៩៩ ១៤៦ ៩៧០ដុល្លារ ក្នុងនោះចំណូលពីការនាំចេញជ័រកៅស៊ូមានចំនួន ៩៨ ៥៦០ ២៧០ដុល្លារ និងចំណូលពីការនាំចេញឈើកៅស៊ូ ចំនួន ៥៨៦ ៧០០ដុល្លារ។ នេះបើតាមការបង្ហាញរបាយការណ៍របស់អគ្គនាយកដ្ឋានចម្ការកៅស៊ូ នៅថ្ងៃទី ១៨ ខែមេសា។

ចំពោះបរិមាណនៃការនាំចេញគិតត្រឹមត្រីមាសទី១ ឆ្នាំ២០២២នេះ កម្ពុជា បាននាំចេញជ័រកៅស៊ូ ចំនួន ៦១ ៨៣៩តោន កើនឡើងចំនួន៧៨៣តោន ស្មើនឹង១ភាគរយ ធៀបនឹងរយៈពេលដូចគ្នានៃឆ្នាំកន្លងមក។ រីឯការនាំចេញឈើកៅស៊ូ សម្រេចបានចំនួន ៨៣៦ម៉ែត្រគុប កើនឡើង ៣,៤៧ភាគរយ។ សម្រាប់តម្លៃលក់ជ័រកៅស៊ូជាមធ្យម គិតត្រឹមត្រីមាសទី១ ឆ្នាំ២០២២ ថ្លៃ ១ ៥៩៤ដុល្លារ ក្នុងមួយតោន បានថយចុះចំនួន ៤២ដុល្លារ ក្នុងមួយតោន ស្មើនឹង ០,៣ភាគរយ ធៀបនឹងរយៈពេលដូចគ្នានៃឆ្នាំកន្លងមក។

គិតត្រឹមត្រីមាសទី១ ឆ្នាំ២០២២ ផ្ទៃដីដាំកៅស៊ូ សរុបមានចំនួន ៤០៤ ០៤៤ហិកតា ក្នុងនោះ ផ្ទៃដីចៀរជ័រមានចំនួន ៣១០ ១៩៣ហិកតា ស្មើនឹង៧៧ភាគរយ និងផ្ទៃដីថែទាំមានចំនួន ៩៣ ៨៥១ហិកតា ស្មើនឹង២៣ភាគរយ។

កាលពីឆ្នាំ២០២១ កម្ពុជារកចំណូលបានជាង ៦១១ លានដុល្លារអាមេរិក ពីការនាំចេញជ័រកៅស៊ូ និងឈើកៅស៊ូ ។ ក្នុងនោះនាំចេញជ័រកៅស៊ូ ចំនួន ៣៦៦ ៣០០តោន និងនាំចេញឈើកៅស៊ូចំនួន ៤៥៤ម៉ែត្រគុប ៕