ព័ត៌មានជាតិ

នំបញ្ចុកខ្មែរមានប្រវត្តិរាប់រយឆ្នាំ ធ្លាប់ប្រមុខរដ្ឋាភិបាលអំពាវនាវពលរដ្ឋរាប់លាននាក់ចូលរួមបំបែកកំណត់ត្រាពិភពលោក

បានផុស

៤ years មុន

នៅ

ថ្ងៃសុក្រ ២២ មេសា ២០២២

ដោយ

“នំបញ្ចុក” ជាអាហារប្រពៃណីយ៉ាងសំខាន់ដែលមានប្រវត្តិរាប់រយឆ្នាំមកហើយ។ ដោយសារប្រជាប្រិយភាពនៃអាហារប្រពៃណីខ្មែរនេះ គេក៏តែងតែឃើញគេយកនំបញ្ចុកមកលៀងភោជនាហារភ្ញៀវនៅក្នុងពិធីបុណ្យផ្សេងៗ ដូចជាបុណ្យដារលាន, បុណ្យភូមិ, បុណ្យឡើងអ្នកតាជាដើម។

របៀបធ្វើនំបញ្ចុក

ការធ្វើនំបញ្ចុក គេយកអង្ករប្រភេទអង្ករខ្សាយ ហើយជាអង្ករបាយរឹង។ ដំបូងគេយកអង្ករទៅត្រាំឲ្យរីកដើម្បីឲ្យសាច់អង្ករទន់ងាយស្រួលកិន។ បន្ទាប់មក គេលាងសម្អាតអង្ករនោះ ហើយដាក់ត្រាំទឹកជាថ្មី ទើបយកទៅកិននឹងត្បាល់ឲ្យម៉ដ្ដជាម្សៅ។ ម្សៅដែលកិនរួចពុំទាន់អាចយកទៅធ្វើនំបានទេ ដ្បិតវារាវពេក។ ដូច្នេះគេត្រូវយកម្សៅនោះទៅចងរុំក្នុងក្រណាត់ស្តើង ហើយយកថ្មឬវត្ថុធ្ងន់មក សង្កត់ដើម្បីឲ្យហូរទឹកចេញអស់ពីម្សៅ រហូតម្សៅនោះកករឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេយកដុំម្សៅ នោះទៅខ្ចប់នឹងក្រណាត់ ឬស្បៃ រួចដាក់ស្ងោរក្នុងទឹកក្តៅ តែមិនឲ្យឆ្អិនពេកនោះទេ (គឺឆ្អិនប្រហែល ៥០ ភាគរយ ឬហៅថាឆ្អិនសម្បកក្រសាំង) ទើបស្រង់ម្សៅនោះមកបុកនឹងត្បាល់ក្ដឿង (បច្ចុប្បន្នគេប្រើម៉ាស៊ីនវាយម្សៅ) ឲ្យល្មួតចូលគ្នាល្អ។ បន្ទាប់មកគេលញ់ម្សៅនោះជាដុំមូលទ្រវែងតម្រូវតាមប៉ែន។

ប៉ែននំបញ្ចុកធ្វើពីស្ពាន់ឬទង់ដែង ដែលមានរន្ធតូចៗសម្រាប់សង្កត់ម្សៅឲ្យកើតជាសរសៃនំបញ្ចុក។ គេយកម្សៅដែលលញ់រួចទៅដាក់ក្នុងប៉ែន រួចសង្កត់ពីលើប៉ែននោះ សរសៃនំបញ្ចុកក៏ហូរធ្លាក់ចុះទៅក្នុងឆ្នាំងទឹកក្តៅកំពុងពុះ។ ខណៈសរសៃនំធ្លាក់ចូលឆ្នាំងទឹកក្តៅ គេយកឈើកូរនិងកៀសមុខរន្ធប៉ែន ដើម្បីកាត់ផ្តាច់សរសៃនំបញ្ចុកកុំឲ្យវែងពេក ដ្បិតងាយស្រួលនៅពេលចាប់វាជាចង្វាយ។ នៅពេលឃើញល្មមថាឆ្អិនហើយ គេយកកន្ត្រងមកដួសស្រង់យកទៅលាង រួចក៏ដាក់ត្រាំក្នុងទឹកថ្មី។

ចុងក្រោយបំផុត គឺគេស្រង់វាពីទឹកហើយចាប់ជាចង្វាយៗដាក់ក្នុងកញ្ច្រែងឬល្អី ដើម្បីឲ្យវាស្រស់ទឹកជាការស្រេច។

ការទទួលទាន

ជាទូទៅ គេមិនហូបនំបញ្ចុកទទេទេ គឺគេច្រើនហូបជាមួយនឹងសម្លដោយមានរបោយច្រើនប្រភេទរោយពីលើឬដាក់ពីក្រោមនំបញ្ចុក។ សម្លនោះមានបីបួនប្រភេទដូចជា សម្លប្រហើរ (ឬហៅសម្លខ្មែរ) សម្លការី និងសម្លណាំយ៉ាជាដើម។ ក្រៅពីនោះ គេអាចហូបជាមួយទឹកត្រីផ្អែមផ្ទាប់ជាមួយអន្លក់ក៏បាន។ ប៉ុន្តែសម្រាប់អ្នកស្រុកស្រែចម្ការ ដែលហៅថាសម្លនំបញ្ចុកនោះ គឺសម្លប្រហើរនោះឯង ពោលគឺកម្រឃើញគេស្លសម្លការី ឬណាំយ៉ាណាស់លើកលែងតែអ្នករស់នៅទីប្រជុំជន ឬទីក្រុងប៉ុណ្ណោះ។

ត្រៀមបញ្ចូលក្នុងបញ្ជីបេតិកភណ្ឌពិភពលោកអង្គការយូណេស្កូ

ក្រសួងវប្បធម៌ និងវិចិត្រសិល្បៈ បានកំពុងរៀបចំឯកសារ ដើម្បីស្នើសុំចុះ «នំ បញ្ចុក» ទៅក្នុងបញ្ជី បេតិកភណ្ឌពិភពលោក របស់អង្គការយូណេស្កូ។ នេះបើតាមការបញ្ជាក់របស់រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកជំទាវ ភឿង សកុណា ក្នុងពិធីបើកអង្គសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ កាលពីថ្ងៃទី០៩ ខែកុម្ភៈ ឆ្នាំ២០២២។

ប្រមុខរដ្ឋាភិបាលលើកទឹកចិត្តពលរដ្ឋទទួលទាននំបញ្ចុក

កន្លងទៅនេះប្រមុខរដ្ឋាភិបាលសម្តេចតេជោ ហ៊ុន សែន ក៏ជំរុញឲ្យពលរដ្ឋទទួលទាននំបញ្ចុក ដែលលោកហៅថានំបញ្ចុកសាមគ្គីនិងឯកភាពជាតិ។

សម្តេច ហ៊ុនសែន បានហៅយុទ្ធនាការទទួលទាននំបញ្ចុកដែលអាចមានមនុស្សរាប់លាននាក់ចូលរួម ចេតនាក្នុងការជំរុញចលនានេះដើម្បីទទួលបាននូវកំណត់ត្រាពិភពលោកថ្មី។ សម្តេចតេជោ ហ៊ុន សែន បានបញ្ជាក់ថា ឆ្លងកាត់នៃចលនានំបញ្ចុកសាមគ្គីភាពឯកភាពជាតិនេះ គឺនឹងគ្មានការលាបពណ៌គ្នានោះទេ ឬអាចនិយាយបានថានឹងជំរុញឲ្យមានចលនា ដើម្បីប្រើប្រាស់ផលិតផលខ្មែរ ហើយអាចបំបែកឯកត្តកម្មពិភពលោកតែម្ដង៕