លោក ឈួរ សុបញ្ញា កោតសរសើរកិច្ចសហការល្អ របស់អាជ្ញាធរខេត្តក្រចេះ ជុំវិញការអនុវត្តកម្មវិធីឧបត្ថម្ភ​​សាច់ប្រាក់

លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងអំណរគុណ និងកោតសរសើរនូវកិច្ចសហការល្អ របស់អាជ្ញាធរមូលដ្ឋានឃុំ ស្រុក ខេត្តក្រចេះ ជុំវិញដំណើរនៃការអនុវត្តកម្មវិធីឧបត្ថម្ភសាច់ប្រាក់ ជូនស្រី្តមានផ្ទៃពោះ និងកុមារអាយុក្រោម ២ឆ្នាំជួយជ្រោមជ្រែងគិតគូលើលទ្ធផល នៃការអនុវត្តកម្មវិធីឧបត្ថម្ភសាច់ប្រាក់ ជូនស្រី្តមានផ្ទៃពោះ និងកុមារអាយុក្រោម ២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងប្រយុទ្ធជំងឺកូវីដ-១៩ នៅក្នុងខេត្តបានដោយរលូន។

លោកប្រធាននាយកដ្ឋាន បានថ្លែងអំណរគុណបែបនេះ ខណៈពេលចុះពិនិត្យការអនុវត្តកម្មវិធីឧបត្ថម្ភសាច់ប្រាក់ជូនស្រី្តមានផ្ទៃពោះ និងកុមារអាយុក្រោម ២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងប្រយុទ្ធជំងឺកូវីដ-១៩ នៅស្រុកឆ្លូងខេត្តក្រចេះ កាលពីរសៀលថ្ងៃទី ២១ ខែមេសា ឆ្នាំ ២០២២។

ក្នុងជួបប្រជុំពិភាក្សាការងារ ជាមួយមន្ទីរពាក់ព័ន្ធជុំវិញខេត្តថ្មីៗនេះ លើលទ្ធផលនៃការអនុវត្តកម្មវិធីឧបត្ថម្ភសាច់ប្រាក់ជូនស្រី្តមានផ្ទៃពោះ និងកុមារអាយុក្រោម ២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងប្រយុទ្ធជំងឺកូវីដ-១៩ នៅក្នុងខេត្តទាំងមូលទទួលបានភាពល្អប្រសើរទោះបីជាជំងឺរាតត្បាតកូវីដ-១៩ រីករាលដាលឆ្លង និងឆក់យកអាយុជីវិតខ្មែរយើង ជាច្រើនពាន់នាក់យ៉ាងណាក៏ដោយ។

លោក ឈួរ សុបញា បានថ្លែងបញ្ជាក់ថា ក្រោយពីទទួលបានគោលនយោបាយជាតិគាំពារសង្គម (២០១៦-២០២៥) រាជរដ្ឋាភិបាល បានផ្ទេរការអនុវត្តកម្មវិធីឧបត្ថម្ភសាច់ប្រាក់ ជូនដល់គ្រួសារក្រីក្រ និងងាយរងគ្រោះពិសេស ដែលទទួល ផលប៉ះបាល់ដោយសារជំងឺរាតត្បាតកូវីដ-១៩ ដែលបានចុះឈ្មោះនិងមានប័ណ្ណសមធម៌ តាមមូលដ្ឋានឃុំសង្កាត់រួចរាល់ហើយ ត្រូវបន្តបើកប្រាក់ឧបត្ថម្ភពីរាជរដ្ឋាភិបាលដែលបានរៀបចំរួចជាស្រេច។

ជាមួយគ្នានេះដែរក្រសួងសង្គមកិច្ច អតីតយុទ្ធជន និងយុវនីតិសម្បទា បានណែនាំដល់គ្រប់នាយកដ្ឋានពាក់ព័ន្ធទាំងអស់ អំពាវនាវបន្ថែមទៀតដល់ប្រជាពលរដ្ឋក្រីក្រ និងងាយរងគ្រោះទូទាំងប្រទេសបន្តមកពិនិត្យឈ្មោះតាមមូលដ្ឋានឃុំ-សង្កាត់ ដែលរស់នៅស្នាក់អាស្រ័យរៀងៗខ្លួន ដើម្បីបន្តទទួលសាច់ប្រាកឧបត្តម្ភពីរាជរដ្ឋាភិបាលបន្ថែមទៀត។

ដើម្បីបង្កើនភាពងាយស្រួលដល់គ្រួសារក្រីក្រ និងងាយរងគ្រោះនោះ លោកបន្តចុះពិនិត្យការអនុវត្តកម្មវិធី និងការបើកសាច់ប្រាក់នៅឃុំសង្កាត់ និងតាមភ្នាក់ងារវីង ដើម្បីបង្កើនប្រសិទ្ធភាព និងស្វែងយល់ពីការបើកសាច់ប្រាក់ជូនគ្រួសារក្រីក្រ ស្របតាមអនុសាសន៍ណែនាំរបស់ថ្នាក់ដឹកនាំ ជាពិសេសលោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា។ ដោយឡែកគ្រួសារ ដែលមិនទាន់បានទទួលសាច់ប្រាក់ឧបត្ថម្ភ ពីរាជរដ្ឋាភិបាលដូចព័ត៌មានខាងលើ សូមរួសរាន់មកទំនាក់ទំនង​ជាមួយអាជ្ញាធរមូលដ្ឋាន ដែលខ្លួនស្នាក់អាស្រ័យនោះ ដើម្បីទទួលបានអត្ថប្រយោជន៍ ដែលរាជរដ្ឋាភិបាលបានផ្តល់ជូន៕

អត្ថបទ៖ វិមាន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត