លោក ឌី វិជ្ជា ៖ អ្នកសង្កេតការណ៍ គឺចូលរួមយ៉ាងសំខាន់នៅក្នុងដំណើរការបោះឆ្នោតប្រកបដោយតម្លាភាព

ប្រធានសហភាពសហព័ន្ធយុវជនកម្ពុជាខេត្តស្វាយរៀង លោក ឌី វិជ្ជា បានចាត់ទុកថា អ្នកសង្កេតការណ៍ការបោះឆ្នោត គឺដើរតួនាទីយ៉ាងសំខាន់ក្នុងការចូលរួមតាមដានដំណើរការបោះឆ្នោត និងដើម្បីធានាឲ្យបានការបោះឆ្នោតប្រកបដោយភាពត្រឹមត្រូវ សេរីភាព និងតម្លាភាព។ 

ក្នុងកម្មវិធីបើកវគ្គបណ្ដុះបណ្ដាលអ្នកសង្កេតការណ៍ជាតិរបស់សហភាពសហព័ន្ធយុវជនកម្ពុជាខេត្តស្វាយ រៀង សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ កាលពីថ្ងៃទី២៤ ខែមេសា ឆ្នាំ២០២២ លោក ឌី វិជ្ជា បានលើកឡើងថា អ្នកសង្កេតការណ៍ ត្រូវពង្រឹងសមត្ថភាពខ្លួនឯង និងសិក្សាស្វែងយល់ឲ្យបានច្បាស់អំពីទិដ្ឋភាពច្បាប់ ជាពិសេស នីតិវិធីក្នុងដំណើរការបោះឆ្នោតនៅតាមការិយាល័យបោះឆ្នោតនីមួយៗ។

ជាមួយគ្នានេះ លោកក៏បានជំរុញឲ្យយុវជនសហភាពសហព័ន្ធយុវជនកម្ពុជាខេត្តស្វាយរៀង ត្រូវប្រកាន់ភ្ជាប់នូវឆន្ទៈមោះមុត ភាពក្លាហាន និងការបំពេញការងារប្រកបដោយការទទួលខុសត្រូវខ្ពស់ ក្នុងនាមអ្នកសង្កេត ការណ៍សម្រាប់ការបោះឆ្នោតនាពេលខាងមុខ ។

សូមជម្រាបជូនថា សហភាពសហព័ន្ធយុវជនកម្ពុជាខេត្តស្វាយរៀង បានសហការជាមួយគណៈកម្មាធិការជាតិរៀបចំការបោះឆ្នោត(គ.ជ.ប) បើកវគ្គបណ្តុះបណ្តាលដល់អ្នកសង្កេតការណ៍ជាង៣ពាន់នាក់សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២។ វគ្គបណ្តុះបណ្តាលនេះ មានរយៈពេល ២ថ្ងៃ គឺនៅថ្ងៃទី ២៣-២៤ ខែមេសា ឆ្នាំ២០២២ ។ វគ្គបណ្ដុះបណ្ដាលនេះ មានការធ្វើបទបង្ហាញដោយលោក ឌឹម សុវណ្ណារុំ សមាជិក និងប្រធានក្រុមប្រតិកម្មព័ត៌មាននៃគណៈកម្មាធិការជាតិរៀបចំការបោះឆ្នោត លោក កែ រឹទ្ធ ប្រធាននាយកដ្ឋាន សេវាកម្មច្បាប់ និងវិវាទកម្ម និងលោក តូច ប៉ូលីវ៉ា អភិបាលរង និងជាអនុប្រធានសហភាពសហព័ន្ធយុវជនកម្ពុជាប្រចាំនៅខេត្តស្វាយរៀង៕

ដោយ៖ ធឿន វ៉ាន់សុង