ពិធីជួបជុំបណ្តាញមិត្តយើងទទួលបានជំនួយជាង៥ម៉ឺនដុល្លារសម្រាប់បម្រើដល់សកម្មសង្គម

“ពិធីជួបជុំបណ្តាញមិត្តយើង” ដែលរៀបចំឡើងដោយសមាគមមិត្តយើងទទួលបានការបរិច្ចាគថវិកាពីសប្បុរសជនយ៉ាងផុសផុលសរុបជាង ៥០ ០០០ដុល្លារអាមេរិក ដើម្បីប្រើប្រាស់ក្នុងសកម្មភាពសង្គម។

យោងតាមសេចក្តីប្រកាសព័ត៍មានរបស់សមាគមមិត្តយើងបានឱ្យដឹងថា ថ្មីៗនេះសមាគមបានរៀបពិធីជួបជុំបណ្តាញមិត្តយើង ដើម្បីរឹតចំណងមិត្តភាព និងសាមគ្គីភាពហើយសមាគម មានសេចក្តីសោមនរីករាយយ៉ាងក្រៃលែងដោយទទួលបានការចូលរួមដ៏ខ្ពង់ខ្ពស់ពីសំណាក់លោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ព្រមទាំងភ្ញៀវកិត្តិយសទំាងអស់។

នៅក្នុងកម្មវិធីនោះ សមាគមទទួលបានការបរិច្ចាគជាទឹកប្រាក់ និងសម្ភារៈពីសប្បុរសជននានាតាមរយៈលោក ហេង សួរ មានចំនួនជាង ៥០ ០០០ ដុល្លារអាមេរិកដើម្បីគាំទ្រសកម្មភាពសមាគមមិត្តយើងសម្រាប់រយៈ៣ឆ្នាំ។

គួរបញ្ជាក់ថា ជាង១ឆ្នាំកន្លងមកនេះ សមាគមមិត្តយើង បានចូលរួមសកម្មភាពសង្គម និងសប្បរសធម៌នានា សរុបជាទឹកប្រាក់ប្រមាណជាង ៥០,០០០ (៥ម៉ឺន)ដុល្លារអាមេរិក នៅតាមបណ្តាខេត្ត តាមរយៈការបរិច្ចាគអណ្តូងទឹក សម្ភារសិក្សា
សម្ភារប្រើប្រាស់ គ្រឿងឧបភោគ-បរិភោគ សំលៀកបំពាក់និងសម្ភារផ្សេងៗទៀតជូនដល់សាលារៀន មន្ទីរពេទ្យបង្អែក សិស្ស-និស្សិត ក្មេងកំព្រា លោកតាស៊ីក្លូជាពិសេសគ្រួសារ និងជនដែលជួបការលំបាកក្នុងជីវភាពរាប់រយគ្រួសារដែលបានទទួលការឧបត្ថម្ភទាំងថវិកា និងសម្ភារៈពីសប្បុរសជនដៃគូរសហការ៕

អត្ថបទ៖ សំអឿន