លោក កឹម សុខា អញ្ជើញគោរពវិញ្ញាណក្ខន្ធសពសម្ដេចឧត្ដមទេពញាណ ហ៊ុន ណេង

នៅព្រឹកថ្ងៃអាទិត្យ ទី០៨ ខែឧសភា ឆ្នាំ ២០២២នេះ លោក កឹម សុខា អតីត ប្រធាន នៃអតីតគណបក្សប្រឆាំង សង្រ្គោះជាតិ បានដឹកនាំគណៈប្រតិភូមួយចំនួនចូលរួមគោរពវិញ្ញាណក្ខន្ធ សពសម្ដេចឧត្ដមទេពញាណ ហ៊ុន ណេង  ដែលជាបងប្រុសសម្ដេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា នៅក្រុងកំពង់ចាម ខេត្តកំពង់ចាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អមដំណើរលោក កឹម សុខា ខណៈអញ្ជើញគោរពវិញ្ញាណក្ខន្ធសពសម្ដេចឧត្ដមទេពញាណ ហ៊ុន ណេង នោះ មានភរិយាលោក កឹម សុខា លោក មុត ចន្ថា អតីតនាយកខុទ្ទកាល័យ លោក មាជ សុវណ្ណរ៉ា អតីតមន្ត្រីជាន់ខ្ពស់ នៃអតីតគណបក្សសង្គ្រោះជាតិ និងមនុស្សជំនិតលោក កឹម សុខា មួយចំនួនទៀត ហើយខណៈពេលអញ្ជើញគោរពវិញ្ញាណក្ខន្ធសពសម្តេចឧត្តមទេពញាណ ហ៊ុន ណេង តំណាងរាស្រ្តមណ្ឌលខេត្តកំពង់ចាម និងជាសមាជិកគណៈកម្មាធិការអចិន្រ្តៃយ៍រដ្ឋសភានោះដែរ លោក កឹម សុខា ព្រមទាំងមន្ត្រីអមដំណើរបានជួបសន្ទនា និងបានថ្លែងសាររំលែកមរណទុក្ខជាមួយសម្តេចតេជោ ​ហ៊ុន សែន ផងដែរ។

សូមបញ្ជាក់ថា នៅមុនដឹកនាំគណៈប្រតិភូចូលរួមគោរពវិញ្ញាណក្ខន្ធនេះ លោក កឹម សុខា បានផ្ញើសារជូនសម្តេចតេជោ ហ៊ុន សែន ដោយចូលរួមរំលែកទុក្ខចំពោះមរណភាពរបស់សម្ដេចឧត្ដមទេពញាណ ហ៊ុន ណេង ផងដែរ ហើយតាមរយៈសារចូលរួមរំលែកទុកនោះ លោក កឹម សុខា បង្ហាញពីសេចក្តីសោកស្តាយក្រៃលែង ដោយបានទទួលដំណឹងមរណភាពនេះ។ 

លោក កឹម សុខា បានសរសេរយ៉ាងដូច្នេះថា៖ “ក្នុងឱកាសដ៏ក្រៀមក្រមបំផុតនេះ ខ្ញុំ និងភរិយា សូមចូលរួមរំលែកមរណៈទុក្ខដ៏ធំធេងជាមួយសម្តេចតេជោ និងក្រុមគ្រួសារ និងសូមឧទ្ទិសបួងសួងសូមឱ្យដួងវិញ្ញាណក្ខន្ធ ឯកឧត្តម ហ៊ុន ណេង បានទៅកាន់សុគតិភពកុំបីឃ្លៀងឃ្លាតឡើយ”។

សម្ដេចឧត្តមទេពញាណ ហ៊ុន ណេង សមាជិកអចិន្រ្តៃយ៍នៃរដ្ឋសភា និងជាតំណាងរាស្ត្រមណ្ឌលខេត្តកំពង់ចាម បានទទួលមរណភាព នៅរសៀលថ្ងៃទី០៥ ខែឧសភា ឆ្នាំ២០២២នេះ ក្នុងជន្មាយុ ៧២ឆ្នាំ ដោយជំងឺបេះដូង ហើយសពត្រូវបានតម្កល់ធ្វើបុណ្យ ទៅតាមប្រពៃណីព្រះពុទ្ធសាសនា នៅគេហដ្ឋានភូមិទី៧ សង្កាត់កំពង់ចាម ក្រុងកំពង់ចាម ខេត្តកំពង់ចាម។

បើតាមគម្រោង នៅថ្ងៃចន្ទ ៩កើត ខែពិសាខ ឆ្នាំខាល ចត្វាស័ក ព.ស ២៥៦៥ ត្រូវនឹងថ្ងៃទី០៩ ខែឧសភា ឆ្នាំ២០២២ សពនឹងត្រូវដង្ហែទៅបញ្ចុះនៅវត្តសុវណ្ណគិរីរតនៈ ភ្នំប្រុស ស្ថិតនៅ ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម។

ក្រោយពីមរណភាព ព្រះករុណា ព្រះបាទសម្ដេច ព្រះនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានប្រោសប្រទាននូវគោរមងារ ជាសម្តេចឧត្តមទេពញាណ ហ៊ុន ណេង។

មរណភាពរបស់សម្ដេចឧត្ដមទេពញាណ ហ៊ុន ណេង គឺជាការបាត់បង់ឥស្សរជននយោបាយខ្មែរដ៏ឆ្នើមមួយរូប ដែលមានស្នាដៃ និងបទពិសោធចូលរួមកសាង និងការពារជាតិប្រកបដោយសមត្ថភាព និងស្មារតីទទួលខុសត្រូវខ្ពស់ ជាពិសេស សម្តេចបានធ្វើពលិកម្មដ៏ខ្ពង់ខ្ពស់ ដើម្បីរួមចំណែករំដោះជាតិមាតុភូមិ និងប្រជាពលរដ្ឋកម្ពុជា ឱ្យរួចផុតពីរបបប្រល័យពូជសាសន៍ និងចូលរួមកសាងប្រទេសជាតិឡើងវិញ រហូតទទួលបានការមកដល់សព្វថ្ងៃ៕

អត្ថបទ៖ កោះកែវ