លោក លី ធុជ លើកឡើងពីតម្រូវការចាំបាច់នៃហិរញ្ញប្បទាន ដើម្បីជំរុញការស្តារឡើងវិញនៃសកម្មភាពសេដ្ឋកិច្ច ក្រោយវិបត្តិកូវីដនៅកម្ពុជា

លោកទេសរដ្ឋមន្ត្រី លី ធុជ ប្រធានគណៈកម្មាធិការជាតិអេស្កាប់ បាន​លើកឡើងថា អំពីតម្រូវការចំាបាច់នៃហិរញ្ញប្បទាន ដើម្បីជំរុញការស្តារឡើងវិញនៃសកម្មភាពសេដ្ឋកិច្ច ក្រោយវិបត្តិនៃជំងឺកូវីដ-១៩ នៅក្នុងប្រទេសកម្ពុជា។

ការលើកឡើងនេះ​ គ្រាដែលលោកទេសរដ្ឋមន្ត្រី លី ធុជ ប្រធានគណៈកម្មាធិការជាតិអេស្កាប់ នៅថ្ងៃទី ២៥ ខែឧសភា ឆ្នាំ ២០២២នេះ បានអញ្ជើញធ្វើសេចក្តីថ្លែងការណ៍ ក្នុង​កិច្ច​ប្រជុំ​បណ្តា​ប្រទេស​ដែលមាន​ការ​អភិវឌ្ឍតិចតួច (LDCs) ក្នុងតំបន់​អាស៊ី និង​ប៉ាស៊ីហ្វិក នៃ​អង្គសន្និ​បាតប្រចាំឆ្នាំលើកទី ៧៨ របស់ UN ESCAP។

នៅក្នុងសេចក្តីថ្លែងការណ៍នោះ លោកទេសរដ្ឋមន្ត្រី លី ធុជ បានលើកឡើងអំពីតម្រូវការចំាបាច់នៃហិរញ្ញប្បទាន ដើម្បីជំរុញដល់ការស្តារឡើងវិញ នៃសកម្មភាពសេដ្ឋកិច្ច ក្រោយពីវិបត្តិនៃជំងឺកូវីដ-១៩ នៅកម្ពុជា។

លោកទេសរដ្ឋមន្ត្រី បានគូសបញ្ជាក់ថា ខណៈប្រឈមនឹងវិបត្តិដ៏ធំនេះ រាជរដ្ឋាភិបាលកម្ពុជាបានផ្តោតលើការបង្កើនប្រសិទ្ធភាព ការប្រើប្រាស់ធនធានដែលមានកំណត់របស់ខ្លួន និងធានាឲ្យបាននូវចីរភាពនៃហិរញ្ញវត្ថុសាធារណៈ ដោយស្របទៅតាមយុទ្ធសាស្ត្រ ស្តីពី ការគ្រប់គ្រងបំណុលសាធារណៈ​ ដែលដាក់ចេញដោយរាជរដ្ឋាភិបាល។

លោកបានបន្ថែមថា ការប្រមូលចំណូលពន្ធនៅក្នុងត្រីមាសទី ១ ក្នុងឆ្នាំ ២០២២ បានកើនឡើងប្រមាណ ២២% ធៀបនឹងរយៈពេលដូចគ្នាកាលពីឆ្នាំកន្លងទៅ ដែលកត្តានេះអាចបណ្តាលមកពីការពង្រឹងអភិបាលកិច្ចល្អ ជាពិសេសការសម្រួលដល់ការប្រមូលពន្ធ តាមរយៈប្រព័ន្ធឌីជីថល ដែលលទ្ធផលនេះបង្ហាញថា កម្ពុជានឹងត្រូវបន្តធ្វើទំនើបកម្ម ក្នុងប្រព័ន្ធគ្រប់គ្រងពន្ធដារ ដើម្បីឆ្លើយតបទៅនឹងស្ថានភាពសង្គម-សេដ្ឋកិច្ចបច្ចុប្បន្ន។

ជាចុងក្រោយ លោកទេសរដ្ឋមន្ត្រី លី ធុជក៏បានជំរុញឲ្យដៃគូអភិវឌ្ឍន៍ បង្កើនកិច្ចសហប្រតិ​បត្តិការជាមួយប្រទេស ដែលមានការភិវឌ្ឍតិចតួច រួមទាំងកម្ពុជាផងដែរ ដើម្បីធ្វើឲ្យប្រសើរឡើងនូវការកៀរគរធនធាន ដោយពិចារណាប្រើប្រាស់គំនិតផ្តួចផ្តើម ក្របខ័ណ្ឌហិរញ្ញប្បទានជាតិ ដែលមានលក្ខណៈបញ្ចូលគ្នា ដាក់ចេញដោយអង្គការសហប្រជាជាតិ៕