ព័ត៌មានជាតិ

ទិន្នផលសាវម៉ាវ ទុរេន ឆ្នាំនេះបានល្អ តែតម្លៃធ្លាក់ចុះ ហើយមិនសូវមានទីផ្សារ

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៦ ឧសភា ២០២២

ដោយ

ម្ចាស់ចម្ការសាវម៉ាវ ទុរេន នៅស្រុកស្រែអំបិល ខេត្តកោះកុង អ្នកស្រី អ៊ុំ ស្រីស្រស់បានប្រាប់ថា ទិន្នផលផ្លែសាវម៉ាវ និង ទុរេន នៅចម្ការអ្នកស្រីឆ្នាំនេះ ទទួលបានផលល្អ ប៉ុន្តែគ្រាន់តែតម្លៃធ្លាក់ចុះបន្ដិច ហើយមិនសូវមានទីផ្សារក្នុងរយៈពេលជាងមួខែកន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់ចម្ការរូបនេះបានបញ្ជាក់ថា ការលក់មិនដាច់អាចដោយសារតែទិន្នផលផ្លែឈើនៅក្នុងស្រុកកើនផលច្រើន រួមផ្សំនិងការនាំចូលពីក្រៅប្រទេសក៏ច្រើន។ ម្យ៉ាងទៀតឆ្នាំនេះ ហាក់មិនសូវមានអ្នកទិញផ្លែទុរេនយកទៅទទួលទានផង។

អ្នកស្រីបញ្ជាក់ថា “តម្លៃថោកថ្លៃមិនជាបញ្ហាទេ តែសំខាន់គ្មានអ្នកទិញ ពីមុនមានទំនិញគឺលក់បាន តែឥឡូវមានរបស់ហើយលក់អត់ចេញ ដូចថាអត់មានអ្នកញាំ អ្នកទិញ ខ្ញុំធ្លាប់បោះឱ្យម៉ូយនៅភ្នំពេញរាប់សិបគីឡូ គាត់ថា លក់អត់ដាច់”។

បច្ចុប្បន្នអ្នកស្រីលក់បោះដុំក្នុងតម្លៃ ១ ៥០០០ ទៅ ១ ៦០០០ រៀល ក្នុង១ គីឡូខុសពីមុនគឺ ២ ម៉ឺនរៀល។

ពាក់ព័ន្ធនឹងបញ្ហានេះ លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុងបានឱ្យដឹងថា ផ្លែឈើកាលណាដល់រដូវកាលជន់ច្រើន តម្លៃក៏ធ្លាក់ចុះទៅតាមហ្នឹងដែរ។ លោកបញ្ជាក់ថា ការលក់ទិន្នផលនៅក្នុងខេត្តកោះកុងឆ្នាំនេះ មានលក្ខណល្អប្រសើរ មិនជាបញ្ហាចោទខ្លាំងនោះទេ។

លោកបានឱ្យដឹងទៀតថា ផ្លែឈើនារដូវទុំ ប្រសិនបើវាទុំបណ្ដាក់គ្នាមាននៅតាមតំបន់ នោះតម្លៃល្អអាចអូសពេលបានយូរ តែបើទុំចំពេលតែមួយតម្លៃក៏ធ្លាក់ថ្លៃហើយ។ លោកថាផ្លែសាវម៉ាវ ពីមុនលក់បោះដុំឱ្យគេបាន ១ ម៉ឺនរៀល ធ្លាក់មក ៥ ពាន់ ដល់ ៨ ពាន់រៀល តាមប្រភេទគុណភាពផ្លែឈើទៀតផង៕

អត្ថបទ៖ ឡេង ដេត