អភិបាលខេត្តតាកែវ លោក អ៊ូច ភា បានគូសបញ្ជាក់ថា ការចាប់យកជំនាញបច្ចេកទេស ពិតជាមានតម្រូវការទីផ្សារខ្ពស់ និងទទួលបានប្រាក់ចំណូល ឬទទួលបានប្រាក់ខែបានខ្ពស់ ជាងជំនាញផ្សេងទៀត។

ក្នុងឱកាសអញ្ជើញចូលរួម ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៥ នៅព្រឹកថ្ងៃទី១៥ ខែមិថុនា ឆ្នាំ ២០២២នេះ នៅវិទ្យាស្ថានបណ្ដាលបណ្ដាលបច្ចេកទេសភូមិភាគតេជោតាកែវ លោក អ៊ូច ភា បានថ្លែងថា សិស្សនិស្សិតដែលប្រឡងជាប់ ឬធ្លាក់បាក់ឌុបភាគច្រើនតែងតែនាំគ្នាសិក្សាតាមគ្នា ឬជ្រើសរើសជំនាញធនាគា គណនេយ្យជាដើម ដោយមើលរំលងជំនាញបណ្ដុះបណ្ដាលបច្ចេកទេស ដែលជំនាញនេះងាយស្រួលក្នុងការរកការងារធ្វើ និងអាចឱ្យប្អូនៗនិស្សិតអាចបើករបរកស៊ីដោយខ្លួនឯងផ្ទាល់ខ្លួន នៅស្រុកកំណើត។

លោកអភិបាលខេត្តបានបន្តថា រាជរដ្ឋាភិបាលកម្ពុជាបានប្រឹងប្រែងគ្រប់បែបយ៉ាងដើម្បីជួយសម្រួលដល់ការសិក្សារបស់សិស្សនិស្សិតដែលជាប់ ឬធ្លាក់បាក់ឌុប ដោយបានបើកវិទ្យាស្ថានបណ្ដុះបណ្ដាលជំនាញបច្ចេកទេសនៅតាមបណ្ដាលខេត្តជាច្រើន ឱ្យសិស្ស និស្សិតបានចូលរួមសិក្សា ក្នុងគោលបំណងជួយសិស្ស និស្សិតកុំឱ្យទៅសិក្សានៅកន្លែងឆ្ងាយពីផ្ទះ ដូច្នេះសិស្សានុសិស្សទាំងអស់ ត្រូវសិក្សាស្វែងយល់ឱ្យកាន់តែច្បាស់ អំពីសារៈសំខាន់ នៃការអប់រំបណ្ដុះបណ្ដាលបច្ចេកទេស និងវិជ្ជាជីវៈ ក្នុងការអភិវឌ្ឍកម្លាំងពលកម្មជំនាញប្រកបដោយគុណភាព និងប្រសិទ្ធភាព ដើម្បីឆ្លើយតបទៅនឹងតម្រូវការទីផ្សារការងារនៅក្នុងស្រុក និងក្រៅប្រទេស។

លោក អ៊ូច ភា បានក្រើនរំលឹកទៅដល់សិស្ស និស្សិតដែលកំពុងតែសិក្សាចាប់យកជំនាញបច្ចេកទេស និងសិក្សាកម្រិត​វិទ្យាល័យ ត្រូវតែខិតខំប្រែងប្រែងរៀនសូត្រ តាមរយៈការសិក្សាស្រាវជ្រាវនៅតាមបណ្ណាល័យ អ៊ីនធើណេតជាដើម ដើម្បី​យកមកបំពេញបន្ថែម និងជាមូលដ្ឋានគ្រឹះលើការសិក្សាឱ្យកាន់តែទូលំទូលាយថែមទៀត ព្រោះសម័យបច្ចុប្បន្ននេះ ពិភពលោកកាន់តែទំនើប និងប្រែប្រួលច្រើន ប្រសិនបើយើងមិនខិតខំអភិវឌ្ឍន៍ចំណេះ និងបង្កើនសមត្ថភាពទេ នោះយើងប្រាកដជាដើរមិនទាន់ពិភពលោកទេ៕

អត្ថបទ៖ វីរៈ