ភ្នំពេញមានសួនច្បារសាធារណៈជាង ១២០ ទីតាំង ទុក​បងប្អូន​កម្សាន្ត

នៅរាជធានីភ្នំពេញមានសួនច្បារសាធារណៈសរុបចំនួនជាង ១២០ ទីតាំង លើផ្ទៃដីជាង១លានម៉ែត្រការ៉េ ហើយរដ្ឋបាលរាជធានីភ្នំពេញ គ្រោងជួសជុលការ៉ូឡាបាក់បែក ដាំជួសដើមឈើ ស្មៅ និងផ្កាដែលងាប់នៅសួនច្បារចំនួន ០៤ ទីតាំង ដើម្បីលើកសោភណ្ឌភាពរាជធានីភ្នំពេញ និងម្យ៉ាងទៀតដើម្បីទុកជាកន្លែងឱ្យបងប្អូនប្រជាពលរដ្ឋបានហាត់ប្រាណដើម្បីសុខភាពផងដែរ។

លោក ស៊ូ សាវ៉ន ប្រធានអង្គភាពសួនច្បារនិងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យ​ដឹងនៅព្រឹកថ្ងៃទី១៦ មិថុនានេះថា រដ្ឋបាលរាជធានីភ្នំពេញ ក្រោមការដឹកនាំរបស់លោក ឃួង ស្រេង ជាអភិបាលបានយកចិត្តទុក​ដាក់ខ្លាំងណាស់ លើការកែលម្អសួនច្បារនានានៅក្នុងរាជធានីភ្នំពេញ ដោយសារសួនច្បារមិនត្រឹមតែជាកន្លែងទាក់ទាញនូវភ្ញៀវជាតិអន្តរជាតិប៉ុណ្ណោះទេ ប៉ុន្តែក៏ជាកន្លែងមួយសម្រាប់ប្រជាពលរដ្ឋហាត់ប្រាណ ហើយការហាត់ប្រាណនេះជាឱសថដ៏សក្កិសិទ្ធ ក្នុងការព្យាបាលជម្ងឺគ្រប់ប្រភេទ។

លោក ស៊ូ សាវ៉ន បានបញ្ជាក់ឲ្យ​ដឹងទៀតថា សួនច្បារសាធារណៈក្នុងរាជធានីភ្នំពេញ មានសរុបចំនួន១២១ ទីតាំង ស្មើនឹង ១ ០០៤ ២៣៣ ម៉ែត្រការ៉េ។

សម្រាប់​ឆ្នាំ២០២២នេះ រដ្ឋបាលរាជធានីភ្នំពេញ មានគម្រោងជួសជុលការ៉ូឡាបាក់បែក ដាំជួសដើមឈើ ស្មៅ និងផ្កាដែលងាប់នៅសួនច្បារចំនួន ០៤ ទីតាំង ក្នុងនោះរួមមាន៖ សួនច្បារវិមានឯករាជ្យ ,សួនច្បារមុខវត្តបទុមវតី, សួនច្បារឆ្នេរទន្លេ និងសួនវិមានឈ្នះឈ្នះ។

លោកបានបន្តថា អង្គភាពសួនច្បារនិងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញ​នៅតែបន្តថែទាំ សួរច្បារនានានៅក្នុងរាជធានីភ្នំពេញ ដើម្បីរក្សាបាននូវពណ៌បៃតងទាំងខែប្រាំងនិងខែវស្សា។ បន្ថែមពីលើនេះទៀត ការថែទាំដើមឈើ ការកាប់លះដើមឈើ ការដកដើមឈើដែលងាប់ចេញ ដាំថ្មី ជំនួសនៅតែបន្តធ្វើសកម្មភាពរហូត៕

អត្ថបទ៖ ស្រីរ័ត្ន