សម្ដេចតេជោ ហ៊ុន សែន មិនចង់រំលឹកលម្អិតជុំវិញបញ្ហាកើតឡើង កាលពីថ្ងៃទី ២០ មិថុនា ១៩៧៧នោះទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា សម្ដេចចង់រំលឹកលម្អិត ជុំវិញបញ្ហាដែលបានកើតឡើងកាលពីថ្ងៃទី ២០ មិថុនា ១៩៧៧នោះទេ ដោយសារតែការរំលឹកទាំងនោះ ជាការផ្ដល់នូវការឈឺចាប់ដល់សម្ដេច និងពិបាករៀបរាប់។ ប៉ុន្តែសម្ដេច ចៀសវាងមិននិយាយ ក៏មិនបាន ដោយយ៉ាងហោចណាស់ សម្ដេចត្រូវព្យាយាម ដើម្បីបញ្ជាក់ជូនសាធារណជនឲ្យបានជ្រាបបន្តិច។

ការថ្លែងរបស់សម្ដេចតេជោ ហ៊ុន សែន បានធ្វើឡើងក្នុងពេលអញ្ជើញជាអធិបតី ខួបលើកទី ៤៥នៃទិវាការចងចាំដំណើរឆ្ពោះ ទៅកាន់ការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២២) និងសម្ពោធសមិទ្ធផលនានា នៅតំបន់ប្រវត្តិសាស្ត្រយោធាតេជោកោះថ្ម X16  ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នាព្រឹកថ្ងៃទី ២០ ខែមិថុនា ឆ្នាំ ២០២២។

សម្ដេចតេជោ ហ៊ុន សែន បានថ្លែងឲ្យដឹងថា កាលពីពេលនោះ សម្ដេចមានជម្រើសដល់ទៅ ៤ ដែលជម្រើសទីមួយ គឺប្រើប្រាស់កងកម្លាំងប្រដាប់អាវុធដែលសម្ដេចគ្រប់គ្រង, ជម្រើសទីពីរ គឺសម្ដេចត្រូវឆ្លងកាត់ទៅកាន់ប្រទេសវៀតណាម ដើម្បីរៀបចំការតស៊ូសារជាថ្មីទៀត, ជម្រើសទីបី គឺមិនធ្វើអ្វីទាំងអស់ទុកឲ្យខ្មែរក្រហម ចាប់យកទៅសម្លាប់ដូចអ្នកដទៃទៀត, និងជម្រើសទីបួន គឺការធ្វើអត្តឃាតខ្លួនឯងតែម្ដង។

ជាចុងក្រោយ សម្ដេចតេជោនាយករដ្ឋមន្ត្រី បានសម្រេចជ្រើសរើសយកជម្រើសទីពីរ គឺត្រូវឆ្លងកាត់ទៅកាន់ប្រទេស វៀតណាម ដើម្បីរៀបចំការតស៊ូសារជាថ្មីទៀត រហូតទទួលបានជោគជ័យលើពួកខ្មែរក្រហម កាលពីថ្ងៃទី ៧ មករា ១៩៧៩៕

អត្ថបទ៖ ឃួន សុភ័ក្រ