ព័ត៌មានជាតិ
មន្ត្រីក្រសួងយុត្តិធម៌ ៖ ការអំពាវនាវឲ្យដោះលែង និងទម្លាក់បទចោទលើអ្នកប្រព្រឹត្តខុសច្បាប់ មិនមែនជាការធានាលំហប្រជាធិបតេយ្យទេ
មន្ត្រីជាន់ខ្ពស់ក្រសួងយុត្តិធម៌ បានលើកឡើងថា ការអំពាវនាវឲ្យដោះលែង និងទម្លាក់ចោលបទចោទ ទៅលើអ្នកប្រព្រឹត្តខុសច្បាប់ មិនមែនជាការធានានូវលំហប្រជាធិបតេយ្យនោះទេ។ ការលើកឡើងនេះ បន្ទាប់ពីគណបក្សភ្លើងទៀន បានចេញសេចក្ដីថ្លែងការណ៍មួយ ដោយបានអំពាវនាវឲ្យទម្លាក់ចោលបទចោទ និងផ្ដល់ក្របខ័ណ្ឌដល់មន្ត្រី និងសកម្មជនរបស់ខ្លួនចំនួន ៤នាក់។
ពាក់ព័ន្ធនឹងការអំពាវនាវនេះលោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានលើកឡើងជាសំណួរថា «បើយើងប្រព្រឹត្តខុសច្បាប់ ហើយឲ្យគេទម្លាក់ចោលបទចោទ ដោះលែងដើម្បីធានាលំហប្រជាធិបតេយ្យ សិទ្ធិសេរីភាពម៉េចកើត»?។
លោក ជិន ម៉ាលីន មានប្រសាសន៍ប្រាប់កម្ពុជាថ្មី នៅថ្ងៃទី ២៤ ខែមិថុនានេះថា ការអំពាវនាវឲ្យដោះលែង និងទម្លាក់ ចោលបទចោទ ទៅលើអ្នកប្រព្រឹត្តខុសច្បាប់ មិនមែនជាការធានានូវលំហប្រជាធិបតេយ្យនោះទេ តែករណីនេះពាក់ព័ន្ធនឹងបញ្ហាផ្លូវច្បាប់ ដោយអ្នកប្រព្រឹត្តបទល្មើស ត្រូវដោះស្រាយតាមដំណើរការនីតិវិធីរបស់តុលាការ។ ដោយឡែក ការលុបឈ្មោះបុគ្គលពីររូបចេញពីក្របខ័ណ្ឌ គឺដោយសារតែពួកគេប្រព្រឹត្តខុសទៅលើវិន័យការងារ ឬក៏មានកំហុសក្នុងការងារ។ នេះជាការលើកឡើងបន្ថែមរបស់លោក ជិន ម៉ាលីន។
លោករដ្ឋលេខធិការក្រសួងយុត្តិធម៌ បានបន្តថា «ឯការលុបឈ្មោះចេញអីហ្នឹង គឺដោយសារតែមានការប្រព្រឹត្តខុសទៅនឹងវិន័យការងារ ឬមានកំហុសក្នុងការងារ អាហ្នឹងត្រូវធ្វើការប្ដឹងផ្ដល់តវ៉ា ការពារសិទ្ធិរបស់ខ្លួន បើសិនខ្លួនយល់ការបញ្ឈប់ ឬក៏ការចោទប្រកាន់អាហ្នឹងមិនត្រឹម អាហ្នឹងចូលរួមតាមដំណើរការតាមនីតិវិធីច្បាប់ ហើយការពារខ្លួនតាមស្របច្បាប់»។
មន្ត្រីជាន់ខ្ពស់ក្រសួងយុត្តិធម៌ បានបញ្ជាក់បន្ថែមថា ការដែលបង្ខំឲ្យតុលាការដោះលែងអ្នកប្រព្រឹត្តខុសច្បាប់ និងការដែលបង្ខំក្រសួងផ្ដល់ក្របខ័ណ្ឌ ដល់អ្នកប្រព្រឹត្តខុសវិន័យការងារ ឬមានកំហុសក្នុងការងារ ដើម្បីធានាលំហសិទ្ធិសេរីភាព និងប្រជាធិបតេយ្យនោះ មិនមែនជារឿងដែលត្រឹមត្រូវនោះឡើយ។
សូមជម្រាបថា គណបក្សភ្លើងទៀន កាលពីថ្ងៃទី ២២ ខែមិថុនា ឆ្នាំ ២០២២ បានចេញសេចក្ដីថ្លែងការណ៍មួយ ដោយបានឲ្យដឹងថា កាលពីពេលថ្មីៗនេះ មន្ត្រីរបស់ខ្លួនថ្នាក់ស្រុកមួយរូប និងបេក្ខជនមេឃុំជាប់ឆ្នោតមួយរូប ត្រូវបានអាជ្ញាធរចាប់ខ្លួន។ ចំណែកឯសកម្មជនគណបក្សភ្លើងទៀនពីរនាក់ទៀត ត្រូវបានបណ្ដេញចេញពីក្របខ័ណ្ឌ របស់ក្រសួងសុខាភិបាល និងក្រសួងមហាផ្ទៃ។
តាមរយៈសេចក្ដីថ្លែងការណ៍នេះ គណបក្សភ្លើងទៀន បានចាត់ទុកការចាប់ខ្លួន និងបណ្ដេញចេញពីក្របខ័ណ្ឌខាងលើនេះ គឺធ្វើឡើងក្រោមហេតុផលនយោបាយ។ ក្នុងនោះ គណបក្សមួយនេះ ក៏បានអំពាវនាវឲ្យដោះលែង ទម្លាក់ចោល បទចោទ និងផ្ដល់ក្របខ័ណ្ឌដល់សកម្មជនរបស់ខ្លួនវិញ ផងដែរ៕
អត្ថបទ៖ ឃួន សុភ័ក្រ
-
ចរាចរណ៍៥ ថ្ងៃ ago
ឆ្នាំ២០២៣ ខេត្តកំពង់ចាម មានអ្នកស្លាប់ព្រោះគ្រោះថ្នាក់ចរាចរណ៍ជាង១រយនាក់ និងរបួសជាង២រយនាក់
-
បច្ចេកវិទ្យា១៣ ម៉ោង ago
វិធីប្លែកៗ ជនអានាមិកប្រើដើម្បីបោកបញ្ឆោត តាមប្រព័ន្ធបច្ចេកវិទ្យា
-
ព័ត៌មានអន្ដរជាតិ១ សប្តាហ៍ ago
យន្តហោះក្រុមហ៊ុនអាកាសចរណ៍ Jetstar មួយគ្រឿង បុកគ្នាជាមួយរថយន្តសន្តិសុខអាកាសយាដ្ឋាន
-
ព័ត៌មានជាតិ២ ថ្ងៃ ago
សម្តេចតេជោ ហ៊ុន សែន សម្រេចជួយកសាងកុដិ-ទិញដីពង្រីកវត្តសម្រាប់ព្រះសង្ឃ និងកូននេនសីហា
-
បច្ចេកវិទ្យា២ ថ្ងៃ ago
កុំពឹងផ្អែកលើប្រព័ន្ធសន្តិសុខ App ធនាគារទាំងស្រុង ត្រូវពង្រឹងសុវត្ថិភាពបន្ថែម
-
ព័ត៌មានអន្ដរជាតិ៦ ថ្ងៃ ago
រូបភាពបុរសម្នាក់លើឆ្នេរ អង់គ្លេស ក្លាយជាព័ស្តុតាងថា បានឆ្លងភពចូលមកឆ្នាំ ១៩៤៣
-
វប្បធម៌ ជំនឿ៣ ថ្ងៃ ago
ទំនាយលោកយាយ Baba Vanga ជិតក្លាយជាការពិតមួយទៀតហើយ
-
ព័ត៌មានជាតិ១ សប្តាហ៍ ago
មន្រ្តីក្រសួងបកស្រាយវីដេអូរថភ្លើងបើកលើផ្លូវជាតិ ពលរដ្ឋសង្ស័យបើកខុសបច្ចេកទេស