ព័ត៌មានជាតិ

សម្តេចតេជោ ហ៊ុន សែន សម្រេចយកដំណឹងអំពីមរណភាពរបស់សម្តេចឧត្តមទេពញាណ ហ៊ុន ណេង ប្រាប់បងប្រុស

បានផុស

៣ years មុន

នៅ

ថ្ងៃសុក្រ ២៤ មិថុនា ២០២២

ដោយ

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចយកដំណឹងអំពីមរណភាពរបស់សម្តេចឧត្តមទេពញាណ ហ៊ុន ណេង ដែលជាបងប្រុសទី២ ប្រាប់បងប្រុសទី១ គឺលោក ហ៊ុន សាន នេះបើតាមការបញ្ជាក់នៅលើបណ្តាញសង្គមហ្វេសប៊ុកផ្លូវការរបស់សម្តេច នាល្ងាចថ្ងៃទី២៤ ខែមិថុនា នេះ។

បើតាមសម្តេចតេជោ ហ៊ុន សែន ការសម្រេចយកដំណឹងអំពីមរណភាពរបស់សម្តេចឧត្តមទេពញាណ ហ៊ុន ណេង ប្រាប់ទៅបងប្រុសនេះ ដោយសារតែសុខភាពរបស់គាត់ (ហ៊ុន សាន) បានប្រសើរ ហើយពេលវេលាក៏សមស្របផងដែរ។ សម្តេចថា “ប្រតិកម្មដំបូងក្រោយទទួលព័ត៌មានថា ប្អូនស្លាប់ គឺភាពស្រឡាំងកាំង ការញ័រដៃ ភ្នែកឡើងក្រហម និងពោលពាក្យដដែលៗថា ហេតុអីមិនប្រាប់គាត់”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោ ហ៊ុន សែន អះអាងថា ក្រោយពីការពន្យល់របស់ប្អូនៗ និងក្មួយៗ គាត់យល់ តែអ្វីដែលបារម្ភ គឺក្រោយពេលប្អូនៗ និងក្មួយៗ ចេញផុត គាត់អង្គុយយំ និងពិសារគុយទាវតែ២ម៉ាត់គត់។ គាត់បាននិយាយថា ប្អូនគាត់មិនមានជំងឺអ្វីសោះ និងបន្តនិយាយថា ហេតុអីមិនប្រាប់គាត់។ ខ្ញុំកំពុងឱយក្មួយៗតាមដាន និងលួចថតរូបគាត់ផ្ញើមកខ្ញុំ។ គាត់ពិតជាពិបាកទទួលយកនូវរឿងបែបនេះណាស់ ព្រោះនេះជាការវាយប្រហារខាងផ្លូវចិត្តខ្លាំងបំផុតសម្រាប់គាត់។

សូមបញ្ជាក់ថា សម្តេចឧត្តមទេពញាណ ហ៊ុន ណេង ប្រធានគណៈកម្មការទី៤ នៃរដ្ឋសភា ដែលជាបងប្រុសបង្កើតរបស់សម្តេចតេជោ ហ៊ុន សែន បានទទួលមរណភាព ដោយសារជំងឺគាំងបេះដូង កាលពីល្ងាចថ្ងៃទី០៥ ខែឧសភា ឆ្នាំ២០២២ ក្នុងជន្មាយុ៧២ ឆ្នាំ ហើយសពសម្តេចឧត្តមទេពញាណ ហ៊ុន ណេង ត្រូវបានដង្ហែទៅបញ្ចុះនៅវត្តសុវណ្ណគិរីរតនៈភ្នំប្រុស៕

ដោយ ៖ កោះកែវ