​រាជរដ្ឋាភិបាលផ្តល់ថវិកាជិត៥០ម៉ឺនដុល្លារ​ឲ្យវិស័យឯកជន​ធ្វើការបណ្តុះបណ្តាល​ជំនាញ​ទេសចរណ៍ឡើងវិញ​

​ប្រធានសមាគមទីភ្នាក់ងារ​ទេសចរណ៍កម្ពុជា​លោកស្រី​ ឆាយ ស៊ីវលីន​ បានថ្លែងឲ្យដឹង​នៅក្នុង​ឱកាស​ជួបជាមួយប្រតិបត្តិករទេសចរណ៍​នារសៀលថ្ងៃទី ២២ ខែកក្កដា ​ឆ្នាំ២០២២ ​នៅក្រុង​សៀមរាប​នេះថា នៅក្នុងអំឡុងពេលប្រទេសកម្ពុជាទទួលរងគ្រោះខ្លាំងដោយសារការរាតត្បាត​នៃមេរោគ​កូវីដ១៩ ក្រុមហ៊ុនទេសចរណ៍សណ្ឋាគារ​ និងអាជីវកម្មទេសចរណ៍ផ្សេងៗ​បានកាត់បន្ថយ​បុគ្គលិក​ឬបិទអាជីវកម្ម ​ដោយសារគ្មានភ្ញៀវទេសចរ ​និងគ្មានប្រាក់ចំណូល​ ហើយបុគ្គលិកដែល​បានសម្រាក​ការងារពីវិស័យទេសចរណ៍នេះ ក៏បានទៅរកការងារផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោកស្រី ឆាយ ស៊ីវលីន​បន្តថា ឥឡូវនេះស្ថានភាពកូវីដមានការធូរស្រាល​ភ្ញៀវទេសចរ​ក៏បានចេញ​ដើរកម្សាន្តឡើងវិញជាបណ្តើរ ប៉ុន្តែយើងខ្វះធនធានមនុស្សជំនាញទេសចរណ៍ សម្រាប់ទទួល​បដិ​សណ្ឋាកិច្ចភ្ញៀវដោយសារអ្នកជំនាញដែលបានទៅរកការងារ​ផ្សេងៗ​បានត្រឡប់​មកវិញមានចំនួនតិចតួច។

ដូចនេះដើម្បីឱ្យយើងអាចមានអ្នកជំនាញទេសចរណ៍ឡើងវិញ សម្រាប់​ទទួលបដិសណ្ឋាកិច្ចភ្ញៀវទេសចរ រាជរដ្ឋាភិបាលកម្ពុជាតាមរយៈគម្រោង​ឧបត្ថម្ភដោយ​មូលនិធិ​អភិវឌ្ឍន៍ជំនាញ (SDF) ចំណុះឱ្យក្រសួងសេដ្ឋកិច្ច និងហិរញ្ញវត្ថុ (MOEF)​បានកំពុង​សាកល្បង​ផ្តល់ថវិកាជិត៥០ដុល្លាដល់សមាគមទីភ្នាក់ងារទេសចរណ៍កម្ពុជា សម្រាប់ធ្វើ​ការបណ្តុះ​បណ្តាល​អ្នកជំនាញទេសចរណ៍ ដែលមានស្រាប់ បើគិតជាមនុស្ស​ដែលត្រូវទទួល​បានការបណ្តុះ​បណ្តាលមានប្រមាណជា១ពាន់នាក់ ហើយអ្នកដែលមកទទួលការបណ្តុះបណ្តាលនេះ។

លោកស្រី ឆាយ ស៊ីវលីនបានបន្តថា វគ្គបណ្តុះបណ្តាលនេះ​នឹងដំណើរការឆាប់ៗខាងមុខនេះ ខណៈលោកស្រីរំពឹងថា នឹងទទួលបានផ្លែរផ្កាល្អសម្រេចបានតាមការព្យាករណ៍​របស់​ក្រសួងទេសចរណ៍ថា នៅឆ្នាំ២០២២នេះ កម្ពុជានឹងទទួលបានភ្ញៀវទេសចរ១លាននាក់ ដែល​បច្ចុប្បន្ននេះទទួលបានប្រមាណជា៥០ម៉ឺននាក់៕

អត្ថបទ៖ កុសល