CDC អនុម័តគម្រោងបង្កើតរោងចក្រពីរ​លើទុនវិនិយោគជាង ១៤លានដុល្លារ ​នៅតាខ្មៅ និងកំពង់ស្ពឺ

ក្រុមប្រឹក្សាអភិវឌ្ឍន៍កម្ពុជា CDC បានសម្រេចអនុម័តឱ្យក្រុមហ៊ុនចំនួនពីរ បង្កើតរោងចក្រនៅក្រុងតាខ្មៅ និងខេត្តកំពង់ស្ពឺ លើទុនវិនិយោគសរុបប្រមាណជាង ១៤លានដុល្លារ ដែលអាចបង្កើតការងារក្នុងស្រុកបានចំនួនជាង ៣ពាន់កន្លែង។

ក្រុមហ៊ុនដែលទទួលបានវិញ្ញាបនបត្រចុះបញ្ជីគម្រោងវិនិយោគ CDC នេះ មានដូចជា៖

១. MILANNA LEATHERWARE M.F.Y (CAMBODIA) CO., LTD គម្រោងបង្កើតរោងចក្រផលិតខ្សែក្រវាត់ និងកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៩,២លានដុល្លារអាម៉េរិក និងអាចបង្កើតការងារបានចំនួន ១.៤១៤កន្លែង។

២. BEST BEAUTY COMPANY LIMITED គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំង​វិនិយោគស្ថិតនៅភូមិព្រែកតាព្រីង សង្កាត់សិត្បូ ក្រុងតាខ្មៅ ខេត្តកណ្តាល មានទុនវិនិយោគប្រមាណ ៥,១លានដុល្លារ​អាម៉េរិក និងអាចបង្កើតការងារបានចំនួន ២.២៣៦កន្លែង។

គិតត្រឹមរយៈពេល៥ខែ ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងអភិវឌ្ឍន៍សរុបចំនួន៨០គម្រោង ដោយគិតជាទឹកប្រាក់មានចំនួនសរុប ២.៨ពាន់លានដុល្លារ​។ បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា CDC គម្រោងទាំង៨០នេះ បានផ្តល់ឱកាសការងារដល់ប្រជាពលរដ្ឋចំនួនជិត៦ម៉ឺនកន្លែងនៅទូទាំងប្រទេស៕