ឈាមដែលមានមេរោគ ទទួលបានពីការបរិច្ចាគ​ក្រសួងយកទៅណា?

ជារៀងរាល់ថ្ងៃ មានប្រជាពលរដ្ឋជាច្រើន បានទៅបរិច្ចាគឈាម ដើម្បីជួយសង្រ្គោះអ្នកដែលត្រូវការឈាមជាបន្ទាន់។ សាធារណជនជាច្រើន ក៏ចង់ដឹងថា តើឈាមដែលមានមេរោគប្រើប្រាស់មិនកើត ក្រសួងយកទៅណា?

ឆ្លើយនឹងសំណួរនេះ លោកស្រីវេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិផ្តល់ឈាមកម្ពុជា បានឱ្យដឹងថា ឈាមដែលមានផ្ទុកមេរោគ មិនអាចប្រើប្រាស់បាន ក្រសួងសុខាភិបាល យកទៅដុតចោល នៅតាមមន្ទីរពេទ្យនីមួយៗ។

អ្នកស្រីវេជ្ជបណ្ឌិត បានបន្តថា ឈាមដែលមានផ្ទុកមេរោគផ្សេងៗ ដូចជា ជំងឺអេដស៍ ជាដើម ដែលមិនអាចយកទៅ​ប្រើប្រាស់ក្នុងការបំពេញឈាមបន្ថែមដល់អ្នកជំងឺដែលត្រូវការ គឺយកទៅដុតចោលតែម្តងក្នុងឡវេជ្ជសាស្រ្ត ដែលឡនេះ ប្រើប្រាស់ក្នុងការដុតឈាមតែប៉ុណ្ណោះ។ អ្នកស្រីវេជ្ជបណ្ឌិត សង្កត់ធ្ងន់ថា« ចំពោះការដុតឈាមមេរោគនេះទៀតសោត គឺមិនអាចដុតដូចជាការដុតសាកសព ឬការសំណល់ ផ្សេងៗនោះឡើយ គឺគេត្រូវតែដុតសម្ងួតឱ្យអស់នូវសារធាតុ​រាវតែម្តង ហើយការដុតនេះ គឺទាមទារឱ្យមានបច្ចេកទេសខ្ពស់»។ 

ចំពោះប្រទេសដែលមានវិស័យវេជ្ជសាស្រ្តជឿនលឿន គេអាចយកឈាមដែលមានផ្ទុកមេរោគនោះ ទៅប្រើប្រាស់​ពិសោធន៍ទៅលើអ្វីមួយ ដែលមានប្រយោជន៍សម្រាប់ពួកគេ។ នេះជាការបន្ថែមរបស់អ្នកស្រីវេជ្ជបណ្ឌិត មើក សាមាន។

អ្នកជំនាញរូបនេះ បានបញ្ជាក់ទៀតថា គោលិកាឈាមក្រហម ជាទូទៅគឺអាចរក្សាទុកបានរយៈពេលជាមធ្យម ៣៥ថ្ងៃ ផ្លាស្មារក្សាទុកបានរយៈពេល ១ឆ្នាំ ចំណែកឯផ្លាកែតរក្សាទុកបានតែ ៥ថ្ងៃប៉ុណ្ណោះ។

សូមបញ្ជាក់ថា មជ្ឈមណ្ឌលជាតិផ្តល់ឈាម បានគ្របដណ្តប់ជាង ៧០%នៃការផ្គត់ផ្គង់ឈាមទូទាំងប្រទេស។ នៅក្នុងឆ្នាំ ២០២២ នេះមន្ទីរពេទ្យត្រូវការឈាមមួយប្លោក ដើម្បីសង្គ្រោះជីវិតអ្នកជំងឺរៀងរាល់ ៦នាទីម្តង។ បើគិតជាតម្រូវការ​ប្រចាំថ្ងៃនៅ​ទូទាំងប្រទេស គឺត្រូវការឈាមប្រមាណជិត ១០ម៉ឺនប្លោក ក្នុងមួយឆ្នាំ។ ចំណេកឯមន្ទីរពេទ្យក្នុងក្រុងភ្នំពេញ ក្នុងមួយថ្ងៃត្រូវការឈាមសរុបជាង ២០០ប្លោក។ សម្រាប់ការបរិច្ចាគឈាមឆ្នាំនេះ លើសពីឆ្នាំមុនជិត ២០% បើធៀបនឹងរយៈពេលដូចគ្នា ឆ្នាំ ២០២១។

បើតាមទិន្នន័យអង្គការសុខភាពពិភណលោក ការបរិច្ចាកឈាមដោយស្ម័គ្រចិត្តនៅក្នុងប្រទេស គឺឆ្លើយតបតាមតម្រូវការ​បានតែ ១០ភាគរយប៉ុណ្ណោះ ខណៈប្រទេសជិតខាងរបស់យើង ការបរិច្ចាកឈាមដោយស្ម័គ្រចិត្តអាច​ផ្គត់ផ្គង់បាន​រហូតដល់លើសពី ៩០ភាគរយនៃតម្រូវការ៕ អត្ថបទ៖ នាង រតនៈ