សុខភាព

មន្ត្រីជាន់ខ្ពស់ លើកទឹកចិត្តឱ្យពលរដ្ឋបង្កើនបរិច្ចាគឈាម ខណៈអ្នកបរិច្ចាគឈាម ដោយស្ម័គ្រចិត្ត នៅមានកម្រិតនៅឡើយ

បានផុស

១ year មុន

នៅ

ថ្ងៃអង្គារ ១០ មិថុនា ២០២៥

ដោយ

មន្ត្រីជាន់ខ្ពស់ នៃមជ្ឈមណ្ឌលជាតិផ្តល់ឈាម បានជំរុញ និងលើកទឹកចិត្តដល់ប្រជាពលរដ្ឋ ពិសេសយុវជន បង្កើនការចូលរួមបរិច្ចាគឈាមឱ្យបានច្រើនបន្ថែមទៀត ខណៈបច្ចុប្បន្នចំនួនអ្នកបរិច្ចាគឈាមដោយស្ម័គ្រចិត្តនៅមានកម្រិតនៅឡើយ ដែលតម្រូវឱ្យសាច់ញាតិ ឬក្រុមគ្រួសារអ្នកជំងឺ ផ្តល់ឈាមជំនួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍នៅព្រឹកថ្ងៃទី ១០ មិថុនា ថា ការជំរុញនេះ ដោយសារតែចំនួនអ្នកបរិច្ចាគឈាមដោយស្ម័គ្រចិត្តនៅមានកម្រិត ពោលមានប្រមាណ ២០% ប៉ុណ្ណោះ ខណៈចំនួនអ្នកផ្តល់ឈាមជំនួសមានរហូតដល់ទៅ ៨០%។ ជាក់ស្ដែងរយៈពេល ៥ ខែ ឆ្នាំ ២០២៥ នេះ មជ្ឈមណ្ឌលជាតិផ្តល់ឈាម ទទួលបានអំណោយឈាមចំនួន ៥៥ ៧៣៤ ប្លោក ក្នុងនោះ អ្នកបរិច្ចាគឈាមដោយស្ម័គ្រចិត្តមានចំនួន ១៤ ៨៧០ ប្លោក និងអ្នកផ្តល់ឈាមជំនួសចំនួន ៤០ ៨៦២ ប្លោក ខណៈបច្ចុប្បន្ន ក្នុង ១ ថ្ងៃ មានតម្រូវការឈាមនៅទូទាំងប្រទេសកើនឡើងដល់ ៤០០ ប្លោក ក្នុងនោះ នៅរាជធានីភ្នំពេញមានតម្រូវការឈាមដល់ ៣៥០ ប្លោក និងតាមខេត្ត ៥០ ប្លោក ដោយសារនៅតាមខេត្តការវះកាត់មានតិចជាងនៅរាជធានីភ្នំពេញ ពោលគឺក្នុង ១ នាទី ត្រូវការឈាម ១ ប្លោក។

លោកវេជ្ជបណ្ឌិត បានបន្តថា «ដូចនេះ សូមប្រជាពលរដ្ឋ ពិសេសយុវជន បន្តចូលរួមបរិច្ចាគឈាមឱ្យបានកាន់តែផុលផុសបន្ថែមទៀត ដើម្បីឱ្យមជ្ឈមណ្ឌលជាតិមានស្តុកឈាមគ្រប់គ្រាន់ក្នុងការជួយសង្គ្រោះដល់អ្នកជំងឺពាក់ព័ន្ធទៅនឹងគ្រោះចរាចរណ៍ ស្ត្រីឆ្លងទន្លេ ការវះកាត់ធំៗ ដូចជា វះកាត់ជំងឺបេះដូង ជំងឺមិនឆ្លងរួមមាន ជំងឺមហារីក និងជំងឺលាងឈាមជាដើម សំដៅជួយកាត់បន្ថយការបរិច្ចាគឈាមជំនួសសាច់ញាតិ និងបងប្អូនរបស់អ្នកជំងឺ»។

លោកវេជ្ជបណ្ឌិត បានបន្ថែមថា លើសពីនេះទៀត ការចូលរួមពីមហាជន នឹងធ្វើឱ្យមជ្ឈមណ្ឌលជាតិផ្តល់ឈាម អាចសម្រេចតាមផែនការដែលបានដាក់ចេញនៅក្នុងឆ្នាំ ២០២៥ នេះ គ្រោងនឹងប្រមូលឈាមឱ្យបាន ១ សែន ៨ ម៉ឺនប្លោក មានការកើនឡើង ២០% បើធៀបទៅនឹងឆ្នាំ ២០២៤ ប្រមូលបាន ១ សែន ៧ ម៉ឺនប្លោក៕

អត្ថបទ ៖ សំអឿន