ខេត្ត​បាត់ដំបង មាន​អង្គការសមាគម ១៤៧ ​ប្រតិបត្តិការសកម្មភាព​លើវិស័យនានា

លោក សុខ លូ អភិបាលនៃគណៈអភិបាលខេត្តបាត់ដំបង បានមានប្រសាសន៍លើកឡើងថា នៅក្នុងខេត្តបាត់ដំបង មានសមាគម និងអង្គការមិនមែនរដ្ឋាភិបាលចំនួន ៣៥៦ ប៉ុន្តែជាក់ស្ដែងមានតែអង្គការ សមាគមចំនួន ១៤៧ ប៉ុណ្ណោះ ដែលកំពុងប្រតិបត្តិការសកម្មភាពលើវិស័យនានាដូចជា វិស័យកសិកម្ម វិស័យដីធ្លី វិស័យសំណង់ វិស័យច្បាប់ ធនធានធម្មជាតិ អភិបាលកិច្ចល្អ អប់រំ កុមារស្រ្ដី យេនឌ័រ សុខាភិបាល សង្គមកិច្ច និងសេដ្ឋកិច្ច វប្បធម៌ជាដើម។

លើកឡើង​ក្នុងវេទិកាស្ដីពីការពិគ្រោះយោបល់ ពង្រឹងកិច្ចសហប្រតិបត្តិការភាពជាដៃគូរវាងរដ្ឋបាលខេត្តបាត់ដំបង និងអង្គការសង្គមស៊ីវិលកាលពីម្សិលមិញ​នេះ លោក​សុខ លូ បាន​ឲ្យ​ដឹ​ងថា រដ្ឋបាលខេត្តតែងតែបានបង្កលក្ខណៈងាយស្រួលផ្ដល់កិច្ចសហការល្អ និងតែងតែសម្របសម្រួលឱ្យសមាគម និងអង្គការមិនមែនរដ្ឋាភិបាល ដែល​ចុះបញ្ជីស្របច្បាប់នៃព្រះរាជាណាចក្រកម្ពុជា មានសិទ្ធិសេរីភាពពេញលេញ ក្នុងការធ្វើសកម្មភាពរបស់ខ្លួន នៅតាមបណ្ដាមូលដ្ឋានក្នុងខេត្តបាត់ដំបង។

នា​ឱកាស​នោះ លោក​ក៏​បានអនុញ្ញាតិឱ្យអ្នកតំណាងសមាគម អង្គការមិនមែនរដ្ឋាភិបាល ឬសហគមន៍ឡើងផ្ដល់ជាមតិយោបល់ ចោទជាសំណួរ និងសំណូមពរដល់រដ្ឋបាលអំពីបញ្ហាប្រឈមដែលជួបប្រទះកន្លងមក ក្នុងន័យដើម្បីសហការគ្នាកាន់តែល្អជាងមុនបន្ថែមទៀត។

ជាមួយគ្នា​នេះ​លោកក៏​បានស្នើដល់អាជ្ញាធរដែនដី មន្ទីរអង្គភាព សមត្ថកិច្ចពាក់ព័ន្ធបន្តសហការ​គ្នាឱ្យបានល្អជាមួយបណ្ដាសមាគម អង្គការមិនមែនរដ្ឋាភិបាល ឬសហគមន៍ដែលបានចុះបញ្ជីត្រឹមត្រូវ និងបានអនុវត្តសកម្មភាពស្របតាមលក្ខន្ដិកៈ៕

អត្ថបទ៖ សៅ រិទ្ធ