តោះមកដឹង និង​ស្វែងយល់អំពីសិល្បៈខ្មែរ​ទាំង ៧ ទម្រង់

សិល្បៈ គឺមានន័យទូលំទូលាយណាស់ ហើយមានច្រើនប្រភេទនិងច្រើនទម្រង់ ក្នុងនោះដូចជាសិល្បៈរបាំ ចម្រៀង ភ្លេង ល្ខោន កុន ចម្លាក់ គំនូរ សំណង់ សូន្យរូប ជាដើម​ដែលសុទ្ធសឹងតែដូនតាបានបន្សល់ទុកឲ្យមកដលបច្ចុប្បន្ននេះ។

ពិតណាស់សិល្បៈឆ្លុះបញ្ចាំងឲ្យឃើញអំពីបញ្ហាអត្ថន័យ សីលធម៌ គុណធម៌ គតិធម៌ ឧត្តមគតិ ដែលមានលក្ខណៈប្រកបដោយអត្តសញ្ញាណជាតិមួយពិតប្រាកដ ហើយត្រូវបានរក្សាទុកតាំងពីយូរយារណាស់មកហើយ។

តើ សិល្បៈទាំង ៧ របស់ខ្មែរមានអ្វីខ្លះ?

១.សិល្បៈស្ថាបត្យកម្ម

សិល្បៈស្ថាបត្យកម្ម ជាសិល្បៈមួយប្រភេទដែលសំដៅដល់ការសាងសង់ផ្ទះ រមនីយដ្ឋាន អាគារ និងប្រាសាទផ្សេងៗ។

២.សិល្បៈចម្លាក់

សិល្បៈចម្លាក់ ជាប្រភេទសិល្បៈសំដៅលើការសូនរូបស្មិត ជាងទង មានន័យថា ការយកសម្ភារៈផ្សេងៗដូចជា ឈើ លោហធាតុ ដី មកកែច្នៃជារូបផ្សេងៗដែលគេចង់បានដូចជា រូបមនុស្ស សត្វ ឬការធ្វើឱ្យចេញជារូបផ្សេងៗជាដើម។

៣.សិល្បៈគំនូរ

សិល្បៈគំនូរ គឺជាការគូសវាសផាត់ពណ៍ទៅលើវត្ថុអ្វីម្យ៉ាង ដើម្បីឲ្យលេចចេញជារូបភាពទៅតាមចំណង់ចំណូលចិត្ត និងជាទីចំណាប់អារម្មណ៏ផងដែរ។

៤.សិល្បៈតន្ត្រី

សិល្បៈតន្រ្តី ជាសិល្បៈដែលស្តែងចេញពីឧបករណ៍ផ្សេងៗអាចបន្លឺសូរសំឡេង ពីរោះគួរជាទីចាប់ចិត្ត ចាប់អរម្មណ៍ រំភើប ត្រេកអរ កើតទុក្ខ តាមរយៈសូរសំឡេងទាំងអស់នោះ។

៥.សិល្បៈរបាំ

សិល្បៈរបាំ ជាសិល្បៈដែលគេបានបញ្ចេញតាមរយៈកាយវិការប្រកបដោយគំនិតឆ្នៃប្រឌិត មានលក្ខណៈទន់ភ្លន់តាមចង្វាក់ភ្លេងដែលធ្វើឲ្យមនុស្សទូទៅចង់ទស្សនា។

៦.សិល្បៈអក្សរសីល

សិល្បៈអក្សរសីល ជាសិល្បៈដែលអ្នកនិពន្ធតែងធ្វើឲ្យចេញជាសាច់រឿងបម្រើដល់អ្នកអាន អ្នកស្តាប់ ចាប់ចិត្ត ចាប់អារម្មណ៍ រំភើប ញ៉ាប់ញ័រ ឬកើតក្តីមិនសប្បាយចិត្តដោយសារសាច់រឿងនោះ។

៧.សិល្បៈភាពយន្ត

សិល្បៈភាពយន្ត ជាសិល្បៈ ភាពយន្ត ល្ខោន កុន ដែលបានស្តែងចេញតាមរយៈរូបភាពពិត ឬរូបភាពឆ្លុះបញ្ចាំងដែលធ្វើឲ្យមនុស្សមានចិត្តរំភើព ញ៉ាប់ញ័រ សប្បាយឬកើតទុក្ខ។ ចំពោះខ្មែរសិល្បៈប្រភេទនេះ មានតាំងពីយូយាណាស់មកហើយ ដែលគេស្គាល់តាមរយៈល្ខោនស្បែក។