ព័ត៌មានជាតិ

អ្នកគាំទ្រលោក ខឹម វាសនាជាង១ម៉ឺននាក់នៅតំបន់ភ្នំគូលែន សុំពេលចាកចេញពីកន្លែងប្រមូលផ្តុំត្រឹមថ្ងៃទី៥ ខែនេះ

បានផុស

៤ years មុន

នៅ

ថ្ងៃសុក្រ ២ កញ្ញា ២០២២

ដោយ

ពលរដ្ឋដែលទៅប្រមូលផ្ដុំការជួបជុំជាមួយ លោក ខឹម វាសនា នៅសល់ប្រមាណ ១ ម៉ឺននាក់ សុំពេលរុះរើចាកចេញពីកន្លែងប្រមូលផ្ដុំត្រឹមថ្ងៃទី ៥ ខែកញ្ញា ឆ្នាំ ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ អភិបាលស្រុកបន្ទាយស្រី ប្រាប់កម្ពុជាថ្មីថា នៅព្រឹកថ្ងៃសុក្រទី ០២ ខែកញ្ញានេះថា ចំនួនអ្នកទៅគាំទ្រលោក ឃឹម វាសនា ជិតពាក់ណ្ដាលបានចាកចេញ ហើយនៅសល់ប្រមាណ ១ ម៉ឺននាក់ទៀតពួកគាត់សុំពេលវេលាដើម្បីរុះរើដោយសារសំអាងលើហេតុផលកន្លែងធំគ្នាច្រើន ដូច្នេះតាមកិច្ចសន្យារបស់គាត់ គឺនៅថ្ងៃទី ៥ ជាថ្ងៃចុងក្រោយនៃការរុះរើឱ្យអស់តែម្ដង។

កាលពីពេលថ្មីៗនេះលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យបានឃោសនាថា ភពផែនដីនឹងត្រូវជន់លិចនៅពេលខាងមុខ ដោយអំពាវនាវឱ្យអ្នកគាំទ្រខ្លួនទៅប្រមូលការជួបជុំនៅដីចម្ការរបស់លោកស្ថិតនៅតំបន់ភ្នំគូលែន ស្រុកបន្ទាយស្រី ខេត្តសៀមរាបទើបរួចផុតគ្រោះមហន្តរាយ។

ការឃោសនាបែបនេះ ធ្វើឱ្យពលរដ្ឋប្រមាណ ១៥ ០០០ នាក់ បានរត់ទៅប្រមូលម្តុំទៅទីនោះ ខណៈដោយទាំងពលរករខ្មែរនៅកូរ៉េជាង ១ ពាន់នាក់ ដែលជាអ្នកគាំទ្រលោក ខឹម វាសាន ក៏បានធ្វើដំណើរមកកម្ពុជាផងដែរ។

ក្រោយការជួបជុំ អាជ្ញាធរខេត្តសៀមរាប បានដាក់ឱសានុវាទ ត្រឹមថ្ងៃទី ៣០ ខែ សីហា ឱ្យលោក ខឹម វាសនា បំបែកការប្រមូលផ្ដុំដោយអាជ្ញាធរអះអាងថា ជាការឃោសនាប្រជាភិថុតបែបអបិយជំនឿប្រាសចាកពីការពិត ធ្វើឱ្យពលរដ្ឋបោះបង់ផ្ទះសំបែង មុខរបរ កាងារធ្វើឲ្យប៉ះពាល់ដល់សណ្តាប់ធ្នាប់សាធារណៈ សុវត្ថិភាព និងសុខភាពពលរដ្ឋ។

ទោះយ៉ាងណាក្រុមលោក ខឹម វាសនា មិនបានធ្វើតាមការបញ្ជារបស់អាជ្ញាធរ ខណៈអាជ្ញាធរបានប្រើវិធានការបិទខ្ទប់ ដោយបើកឱ្យពលរដ្ឋដែលចង់ចាកចេញពីតំបន់នោះ ប៉ុន្តែមិនអនុញ្ញាតឱ្យចូលវិញនោះទេ។ ម្យ៉ាងទៀត អាជ្ញាធរមានការសម្របសម្រួលដឹកអ្នកដែលចង់ចាកចេញត្រលប់ទៅផ្ទះវិញ តាមការណែនាំរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា៕