អភិបាលរាជធានី​ជំរុញឲ្យមានការផ្សព្វផ្សាយ​ច្បាប់វិនិយោគរវាងកម្ពុជា-វៀតណាម

លោក ឃួង ស្រេង អភិបាល នៃគណៈអភិបាលរាជធានីភ្នំពេញក្នុងជំនួបសម្ដែងការគួរសម និងពិភាក្សាការងារជាមួយលោក ជិន ស៊ីថាញ់ សមាជិកគណៈកម្មាធិការកណ្តាល អនុប្រធានគណៈកម្មាធិការបក្សទីក្រុងហាណូយ នៃសាធារណៈរដ្ឋសង្គមនិយមវៀតណាមនៅទីក្រុងហាណូយ នៅរសៀលថ្ងៃទី ៥ ខែកញ្ញានេះបានជំរុញឲ្យមានការផ្សព្វផ្សាយពីច្បាប់វិនិយោគនៃប្រទេសទាំងពីរទៅដល់អ្នកវិនិយោគនៃទីក្រុងទាំងពីរឲ្យបានយល់កាន់តែច្បាស់ងាយស្រួលក្នុងការដាក់ទុន​វិនិយោគ និងពង្រឹងការទប់ស្កាត់អំពើល្មើសច្បាប់នានាសំរាប់ទីក្រុងទាំងពីរ។

នៅក្នុងឱកាសនោះលោក ជិន ស៊ីថាញ់ បានស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់ប្រតិភូទីក្រុងភ្នំពេញចំពេលខួបគម្រប់ ៥៥ ឆ្នាំ នៃទំនាក់ទំនងការទូតរវាងវៀតណាម-កម្ពុជា។

លោកអភិបាលទីក្រុងហាណូយក៏បានជំរាបជូនលោក ឃួង ស្រេង និងប្រតិភូពីការបើកដំណើរការទីក្រុងហាណូយ ឡើងវិញនៅដំណាក់កាល ៩ ខែចុងក្រោយ បន្ទាប់ពីបិទខ្ទប់ទាំងស្រុងអំឡុងពេលនៃការរីករាលដាលជំងឺកូវីដ-១៩ នាពេលកន្លងទៅដែលបានធ្វើឱ្យទីក្រុងមានសកម្មភាពជាប្រក្រតីឡើងវិញ និងរីកចំរើនលើផ្នែកសេដ្ឋកិច្ចសង្គម។

លោក ជិន ស៊ីថាញ់ បានលើកឡើងពីការដាក់ចេញនូវផែនការអភិវឌ្ឍន៍ទីក្រុងហាណូយពីឆ្នាំ ២០៣០ ដល់ឆ្នាំ ២០៤៥ ឱ្យក្លាយជាទីក្រុងវៃឆ្លាត​ (Smart city) ដោយផ្តោតសំខាន់លើការអភិវឌ្ឍន៍ហេដ្ឋារចនាសម្ពន្ធ័រូបវ័ន្ត និងយកចិត្តទុកដាក់ដោះស្រាយបញ្ហាប្រឈមដូចនៅរាជធានីភ្នំពេញដែរ នៅពេលទីក្រុងរីកចំរើនតែងជួបបញ្ហាប្រឈម មានដូចជា៖ កកស្ទះចរាចរណ៍ បញ្ហាកាកសំណល់ ទឹកកខ្វក់ និងទឹកលិចដោយសារជំនន់ទឹកភ្លៀងជាដើម។

ជាមួយគ្នានេះរដ្ឋធានីហាណួយនឹងបន្តពង្រឹង និងពង្រីកកិច្ចសហប្រតិបត្តិការរវាងរដ្ឋ និងរដ្ឋ ប្រជាជន និងប្រជាជននៃទីក្រុងទាំងពីរថែមទៀតផង។

លោក ឃួង ស្រេង ក្នុងឱកាសនោះក៏បានសំដែងក្តីរីករាយដែលថ្នាក់ដឹកនាំទីក្រុងហាណូយបានទទួលស្វាគមន៍យ៉ាងកក់ក្តៅរាក់ទាក់ចំពោះប្រតិភូរាជធានីភ្នំពេញនាពេលនេះ។ លោកអភិបាលរាជធានីភ្នំពេញ និងអភិបាលទីក្រុងហាណូយបានឯកភាពគ្នាទៅលើការបន្តកិច្ចសហប្រតិបត្តិការលើវិស័យជាច្រើនដូចជាវិស័យ៖

អប់រំ ទេសចរណ៍ វប្បធម៌ សុខាភិបាល សេដ្ឋកិច្ច ពាណិជ្ជកម្មជាដើម និងឯកភាពលើការបន្តផ្លាស់ប្តូរគណៈប្រតិភូរវាងទីក្រុងទាំង២ឲ្យបានញឹកញ៉ាប់តាមដែលអាចធ្វើបាន។

លោក ឃួង ស្រេង បានថ្លែងអំណរគុណដល់ប្រជាជន និងថ្នាក់ដឹកនាំទីក្រុងហាណូយដែលបានជួយដល់រាជធានីភ្នំពេញទាំងទឹកចិត្ត ថវិកា និងសម្ភារៈជាបន្តបន្ទាប់ក្នុងបុព្វហេតុអភិវឌ្ឍរាជធានីភ្នំពេញក្នុងនាមទីក្រុងសម្ពន្ធ័ភាពក្រោម អនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែនជានាយករដ្ឋមន្ត្រី។

លោកអភិបាលរាជធានីភ្នំពេញក៏បានអញ្ជើញប្រតិភូទីក្រុងហាណូយមកបំពេញទស្សនកិច្ចនៅរាជធានីភ្នំពេញដើម្បីផ្លាស់ប្តូរបទពិសោធន៍ក្នុងការអភិវឌ្ឍន៍ទីក្រុង និងស្របពេលនៃខួបលើកទី១៨ឆ្នាំនៃការចងសម្ព័ន្ធមេត្រីភាពរវាងរាជធានីភ្នំពេញ និងទីក្រុងហាណូយផងដែរ៕

អត្ថបទ៖ ស្រីរ័ត្ន