បណ្ឌិត ឈត ប៊ុនថង៖ ករណីលោក ខឹម វាសនា ជាករណីមួយដែលត្រូវដោះស្រាយឱ្យបានល្អបំផុត

លោកបណ្ឌិត ឈត ប៊ុនថង បានថ្លែងប្រាប់ “កម្ពុជាថ្មី” ថា បញ្ហារបស់លោក ខឹម វាសនា នៅភ្នំគូលែន គួរចាត់វិធានការតាមច្បាប់ណាមួយឱ្យបានល្អបំផុត មិនអាចឱ្យរួចផុតពីសំណាញ់ច្បាប់បានឡើយ ព្រោះប្រសិនបើមិនចាត់វិធានការទេ បញ្ហានឹងកាន់តែធ្ងន់ធ្ងរទៅៗ ចៀសមិនផុតពីអន្តរាគមន៍របស់អាជ្ញាធរដដែល។ ម្យ៉ាងវិញទៀត ប្រសិនជាបណ្តោយឱ្យនៅ បែបនេះ អាចធ្វើឱ្យក្រុមនរយោបាយ ឬ ក្រុមមនោគមវិជ្ជាណាមួយប្រព្រឹត្តតាមក៏ថាបាន។ 

អ្នកជំនាញផ្នែកទស្សនវិជ្ជា និងសីលធម៌សង្គម នៃរាជបណ្ឌិត្យសភាកម្ពុជា លោកបណ្ឌិត ឈត ប៊ុនថង មានប្រសាសន៍ថា៖ “សម្រាប់ខ្ញុំ ទោះបីថាសម្តេចលោកមានវិធីល្អយ៉ាងណាក៏ដោយ តែក៏មិនគួរឱ្យករណីហ្នឹងចៀសផុតពីសំណាញ់ច្បាប់ទេ ត្រូវតែដោះស្រាយឱ្យល្អ។ ពីព្រោះ វាអាចជាគំរូសម្រាប់គណបក្សនយោបាយណាមួយផ្សេង ក្រុមណាមួយផ្សេងជាវិស័យឯកជន ឬ សង្គមស៊ីវិល ធ្វើបែបនឹង ដោយសារតែយើងឃើញថារដ្ឋាភិបាលដោះបែបនឹង អញ្ចឹងគេអាចធ្វើអនុគមន៍អីនៅកន្លែងណាមួយទៀត”។ 

យ៉ាងណាមិញ លោកក៏បានបន្ថែមថា ប្រសិនបើរដ្ឋាភិបាលអាចដោះស្រាយតាមបែបសីលធម៌បាន គឺជារឿងល្អបំផុត។ ការដោះស្រាយបែបសីលធម៌នេះ គឺជាការចុះទៅពន្យល់ប្រាប់ពីហេតុផល និងសម្របសម្រួលប្រជាជនឱ្យមានការយល់ដឹង និងណែនាំពួកគេឱ្យត្រឡប់ទៅផ្ទះសម្បែងរៀងៗខ្លួនវិញ។ ជាក់ស្តែង បច្ចុប្បន្ននេះ អាជ្ញាធរកំពុងតែព្យាយាមសម្រប សម្រួលប្រជាជន ឱ្យចាកចេញពីចំការលោកខឹម វាសនា ដោយសន្តិវិធី ​ ពោល គឺជាដំណោះស្រាយរបស់អាជ្ញាធរបច្ចុប្បន្ន ពាក់កណ្តាលសីលធម៌ និងពាក់កណ្តាលច្បាប់។

ទន្ទឹមជាមួយគ្នានេះ រូបលោកក៏មានក្តីបារម្ភចំពោះក្រុមមនុស្សមួយចំនួនដែលដើរតាមលោក ខឹម វាសនា មានអាការៈធ្ងន់ធ្ងរជាងលោក ខឹម វាសនា ស្ទើរតែគុណនឹង១០នៃប្រធានគណបក្សសម្ព័ន្ធដើម្បីប្រជាធិបតេយ្យរូបនេះទៅទៀត។  មនុស្សមួយចំនួនបានលើកដៃបញ្ចេញសិល្ប៍ ព្រមទាំងធ្វើកាយវិការ ច្រង៉េងច្រង៉ាង មើលទៅគួរ​ឱ្យខ្លាច និងមិនសមរម្យទាល់តែសោះ។

លោកបណ្ឌិតបាននិយាយថា៖ “យើងមិនអាចធ្វើបែបនេះបានទេ ព្រោះនៅក្នុងប្រទេសមួយ ក្នុងតំបន់មួយ ដែលស្ថិតនៅក្រោមច្បាប់រដ្ឋ ស្ថិតនៅក្រោមអាជ្ញាធរ បើយើងធ្វើរបៀបនេះ វាពិបាកហើយ” ។ 

គួររំលឹកថា ក្រោយពីមានប្រជាជនប្រមាណជាង ២ម៉ឺននាក់ ទៅចំការរបស់លោកខឹម វាសនា ដើម្បីគេចពីការរលាយនៃភពផែនដីតាមពាក្យលោកឃោសនានោះ ក៏មានអាជ្ញាធរនៅតំបន់នោះបានចុះទៅអន្តរាគមន៍ ដោយព្យាយាមនិយាយបញ្ចុះបញ្ចូលឱ្យពួកគេត្រឡប់ទៅផ្ទះរបស់​ខ្លួនវិញ។ ក៏ប៉ុន្តែ ក៏នៅមានប្រជាជនមួយចំនួនបានតវ៉ាជាមួយអាជ្ញាធរ ព្រមទាំងបានបញ្ចេញនូវអាកប្បកិរិយាចម្លែកៗទៀតផង៕

ដោយ៖ អុន ស្រីមាន