សម្ដេចតេជោ សង្ឃឹមថា ភ្ជុំបិណ្ឌឆ្នាំនេះ នឹងមិនមានហានិភ័យណាមួយកើតឡើងនោះឡើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសារជាសំឡេងពិសេសផ្ញើជូនជនរួមជាតិ ពាក់ព័ន្ធនឹងការកាន់បិណ្ឌ នៅក្នុងពិធីបុណ្យភ្ជុំបិណ្ឌនាឆ្នាំនេះ ក៏ដូចជាស្ថានភាពនៃជំងឺកូវីដ-១៩ ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារជាសំឡេងពិសេស នៅព្រឹកថ្ងៃទី ១២ ខែកញ្ញានេះ សម្ដេចតេជោ ហ៊ុន សែន បានថ្លែងដោយបង្ហាញក្ដីសង្ឃឹមថា ការកាន់បិណ្ឌឆ្នាំនេះ រហូតដល់ថ្ងៃបុណ្យភ្ជុំធំ នឹងមិនមានហានិភ័យណាមួយកើតឡើងនោះទេ។ ម្សិលមិញនេះ ការឆ្លងជំងឺកូវីដ-១៩ មានកម្រិតតិចតួចតែប៉ុណ្ណោះ ហើយនៅថ្ងៃនេះ សម្ដេច ក៏សង្ឃឹមថា​ ការឆ្លងរាលដាលក៏មានចំនួនតិចតួចដដែល។

សម្ដេចតេជោ ហ៊ុន សែន បានថ្លែងបន្តថា កម្រិតនៃការឆ្លងតិចតួចបែបនេះ ក៏ផ្ដើមចេញពីភាពជោគ​ជ័យរបស់ប្រជាជាតិរបស់កម្ពុជា ដែលបានរួមគ្នាដោះស្រាយបញ្ហាប្រឈមដ៏ធំ កាលពីឆ្នាំកន្លងទៅសម្ដេចធ្លាប់បានប្រកាសថា យើងនៅក្បែរមាត់ជ្រោះមរណៈ តែឆ្នាំនេះ ប្រជាជនទាំងអស់គ្នា បានធ្វើបុណ្យទាន តាមទំនៀមទម្លាប់ប្រពៃណី ព្រះពុទ្ធសាសនា។

សម្ដេចតេជោ ហ៊ុន សែន បានលើកឡើងថា «ទឹកមុខប្រជាពលរដ្ឋ ព្រះសង្ឃ ក្នុងនោះក៏រាប់ទាំងអាជីវ​ករ អ្នកលក់ដូរផងដែរ រីករាយ ដោយសារតែតម្រូវការនៃការធ្វើបុណ្យទានរបស់ប្រជាពលរដ្ឋ មានខ្ពស់ តម្រូវការនៃការលក់ដូរក៏បានដាច់ ហើយវាក៏ប្លែកគ្នាយ៉ាងច្រើនកាលពីឆ្នាំកន្លងទៅ»៕

អត្ថបទ៖ ឃួន សុភ័ក្រ