មន្ត្រីជាន់ខ្ពស់ធម្មការអំពាវនាវឱ្យព្រះសង្ឃនិមន្តទៅចាក់វ៉ាក់សាំងដូសជំរុញឱ្យបានគ្រប់ៗអង្គ

មន្ត្រីជាន់ខ្ពស់ក្រសួងធម្មការនិងសាសនា បានអំពាវនាវដល់ព្រះសង្ឃនិមន្តទៅចាក់វ៉ាក់សាំងដូសជំរុញទី៤ និងទី៥ឱ្យបានគ្រប់ៗអង្គ ខណៈបច្ចុប្បន្ននេះមានព្រះសង្ឃស្ទើរតែ១០០ភាគរយបានចាក់ដូសទី៣ប៉ុណ្ណោះ។

លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការនិងសាសនា បានមានប្រសាសន៍នៅព្រឹកថ្ងៃទី១២​ ខែកញ្ញា នេះថា បច្ចុប្បន្ននេះមានព្រះសង្ឃស្ទើរតែ១០០ភាគរយបានចាក់វ៉ាក់សាំងដូសទី៣ ក្នុងចំណោមព្រះសង្ឃសរុប
ចំនួន៧០៩០៤អង្គទូទាំងប្រទេស។ ចំណែកព្រះសង្ឃមួយចំនួនតូចមិនអាចចាក់វ៉ាក់សាំងបានទេដោយសារបញ្ហាសុខភាព។

លោកបានបន្តថា «ក្នុងនាមខ្ញុំតំណាងសូមអំពាវនាវដល់ព្រះសង្ឃមានព្រះទ័យយកចិត្តទុកដាក់លើបញ្ហាសុខភាពព្រោះថា​ នៅពេលព្រះសង្ឃមានសុខភាពល្អមិនមានឆ្លងជំងឺផ្សេងៗពិសេសជំងឺកូវីដ១៩ ពុទ្ធបរិស័ទដែលមកធ្វើបុណ្យកុសលនៅតាមទីវត្តអារាមនានាក៏មានសុខភាពល្អដែរ»។

លោក សេង សុមុនី ក៏បានអំពាវនាវដល់អាជ្ញាធរគណៈកម្មការវត្តលោកអាចារ្យតាមវត្តនីមួយៗ ជួយសម្រួលធ្វើយ៉ាងណាឱ្យព្រះសង្ឃ ពិសេសព្រះសង្ឃដែលនៅតំបន់ដាច់ស្រយាលដែលមិនទាន់បានចាក់វ៉ាក់សាំងដូសជំរុញដូចជាដូសទី៣ ទី៤ និងទី៥បាននិមន្តទៅចាក់នៅតាមទីតាំងដែលអាជ្ញាធរបានរៀបចំឱ្យបានរលូនព្រោះថា បច្ចុប្បន្ននេះមានតែមន្ត្រីជាន់ខ្ពស់សង្ឃប៉ុណ្ណោះបានចាក់ដូសទី៤ និងដូសទី៥។

នៅក្នុងឱកាសពិធីកាន់បិណ្ឌ និងភ្ជុំបិណ្ឌនេះដែរលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានណែនាំដល់អាជ្ញាធរខេត្ត ស្រុក ក្រុង ខណ្ឌ រដ្ឋបាលឃុំ/សង្កាត់ ត្រូវចាត់តាំងកម្លាំងគ្រប់គ្រងឃ្លាំមើល និងធ្វើការណែនាំដល់ពុទ្ធបរិស័ទអនុវត្តវិធានការ៣កុំនិង៣ការពារឱ្យបានខ្ជាប់ខ្ជួន ហើយជួយជំរុញឱ្យប្រជាជនទៅចាក់វ៉ាក់សាំងកូវីដ-១៩ ទាំងដូសមូលដ្ឋាននិងដូសជំរុញទី៣ ទី៤ និងទី៥ ឱ្យបានគ្រប់ៗគ្នានៅតាមមូលដ្ឋានសុខាភិបាលនិងនៅតាមទីតាំងដែលត្រូវរៀបចំចាត់ចែងដោយរដ្ឋបាលរាជធានី-ខេត្តជាចាំបាច់ផងដែរ។

គួរបញ្ជាក់ថា គិតត្រឹមថ្ងៃទី១១កញ្ញានេះ កម្ពុជាបានចាក់វ៉ាក់សាំងដូសទី១បាន១៥១៨០៨០៦នាក់ ដូសទី២បាន​ ១៤ ៥២៦ ៨៥០​នាក់ ដូសទី៣បាន១០០៩៥៨៩០នាក់ដូសទី៤បាន៤១៥៩៥១៥នាក់និងដូសទី៥បាន៧៥២៣៦៧នាក់។
ជារួមកម្ពុជាបានចាក់វ៉ាក់សាំងបានប្រមាណ៩៤,៨៨%បើធៀបនឹងចំនួនប្រជាជនសរុប១៦លាន នាក់ ៕

អត្ថបទ៖ សំអឿន