​​ផ្លូវបេតុងជាង ១ គីឡូម៉ែត្រ​ចូលបឹងតាម៉ាត សម្រុក​បញ្ចប់​​មុនបុណ្យភ្ជុំបិណ្ឌនេះ

ការដាក់លូនិងស្ថាបនាផ្លូវបេតុងចូលទៅបឹងតាម៉ាត ស្ថិតក្នុងភូមិសាស្ត្រភូមិម័រនិងភូមិសំបួរ សង្កាត់ដង្កោ ដែលមានប្រវែងជាង ១ គីឡូម៉ែត្រ គិតមកដល់ពេលនេះការដ្ឋានទាំងមូលសម្រេចបានជាច្រើនភាគរយហើយ គ្រោងនឹងរួចរាល់នៅមុនបុណ្យភ្ជុំបិណ្ឌនេះ ដើម្បីសម្រួលចរាចរជូនប្រជាពលរដ្ឋក្នុងការធ្វើដំណើរ។

លោកសាំ ពិសិដ្ឋ ប្រធានមន្ទីរសាធារណៈការនិងដឹកជញ្ជូនរាជធានីភ្នំពេញបានអោយដឹងនៅព្រឹកថ្ងៃ១៤ កញ្ញានេះថា ក្រុមការងារនៃមន្ទីរសាធារណៈការនិងដឹកជញ្ជូនរាជធានីភ្នំពេញ កំពុងស្ថាបនាផ្លូវចាក់បេតុងចូលទៅបឹងតាម៉ាត ស្ថិតក្នុងភូមិសាស្ត្រភូមិម័រនិងភូមិសំបួរ សង្កាត់ដង្កោ មានទទឹង៨ម៉ែត្រ កំរាស់២តឹកនិងមានប្រវែងជាង១គីឡូម៉ែត្រ។

កំណាត់បេតុងចូលទៅបឹងតាម៉ាតនេះ ជាផ្លូវមានសារៈសំខាន់មួយក្នុងការដោះចរាចរចេញពីផ្លូវ៣៧១និងផ្លូវ២១៧។ គិតត្រឹមថ្ងៃ១៤ កញ្ញានេះ ការដ្ឋានទាំងមូលសម្រេចបានជាច្រើនភាគរយហើយ ក្នុងនោះសម្រាប់ការងារដាក់លូ ទំហំ ១ ម៉ែត្រ​​កន្លះx២ម៉ែត្រ និងការដាក់លូ ទំហំ១ម៉ែត្រនៅផ្លូវបេតុងនេះ ក្រមការងារដាក់លូសម្រេច ១០០%ហើយ។ ចំណែកការងារស្ថាបនាផ្លូវបេតុងវិញ ការដ្ឋានទាំងមូលសម្រេចបាន ៥០ ភាគរយ គ្រោង​ឲ្យ​បានរួចរាល់នៅមុនបុណ្យភ្ជុំបិណ្ឌនេះ ដើម្បីសម្រួលចរាចរជូនប្រជាពលរដ្ឋ ក្នុងការធ្វើដំណើរបានស្រួល។

លោកសាំ ពិសិដ្ឋ ក៏បានបញ្ជាក់ទៀតថា ការដាក់លូនិងស្ថាបនាផ្លូវបេតុងចូលទៅបឹងតាម៉ាត ស្ថិតក្នុងភូមិសាស្ត្រភូមិម័រនិងភូមិសំបួរ សង្កាត់ដង្កោនេះនឹងធ្វើអោយតំបន់នេះលែងទទួលរងនូវការ​លិចលង់ដោយជំនន់ទឹកភ្លៀងដូចពេលមុនទៀតហើយការរំដោះចរាចរវិញក៏កាន់តែប្រសើរជាងមុនផងដែរ។

កាលពីព្រឹកថ្ងៃទី០២ធ្នូ ឆ្នាំ២០២១កន្លងនេះ លោកឃួង ស្រេង បានដឹកនាំមន្ត្រីជំនាញនិងអាជ្ញាធរខណ្ឌចុះពិនិត្យមើលស្ថានភាព ការដាក់លូនៅផ្លូវបេតុងចូលទៅបឹងតាម៉ាតនេះជាក់ស្តែង ហើយខណៈចុះពិនិត្យទីតាំងនេះកាលណោះ លោកអភិបាលរាជធានីភ្នំពេញបានជំរុញឲ្យ ក្រុមការងារនៃមន្ទីរសាធារណៈការនិងដឹកជញ្ជូនរាជធានីភ្នំពេញស្ថាបនាប្រព័ន្ធលូជាមុនសិន ដើម្បីរំដោះការលិចលង់ដោយជំនន់ទឹកភ្លៀង នៅក្នុងភូមិសាស្ត្រខាងលើ បន្ទាប់មកត្រូវស្ថាបនាផ្លូវបេតុងតែម្តង។ តែអ្វីដែលជាការកត់សំគាល់ គឺការងារដាក់លូ គិតមកដល់ពេលនេះ សម្រេចបាន១០០%ហើយ។ ចំណែកការងារស្ថាបនាផ្លូវបេតុងសម្រេចបាន៥០ភាគរយហើយដែរ ដោយគ្រោងនឹងស្ថាបនាអោយបានរួចរាល់នៅមុនបុណ្យភ្ជុំបិណ្ឌឆ្នាំនេះ៕

អត្ថបទ៖ ស្រីរ័ត្ន