ព័ត៌មានជាតិ

លោក អ៊ុំ រាត្រី ត្រៀមកម្លាំងជាស្រេច ក្នុងការជួយពលរដ្ឋ ខណៈទឹកកំពុងហក់ឡើងខ្លាំង នៅស្រុកមង្គលបូរី

បានផុស

៤ years មុន

នៅ

ថ្ងៃព្រហស្បតិ៍ ១៥ កញ្ញា ២០២២

ដោយ

ទឹកស្ទឹងមង្គលបូរី ក្នុងភូមិសាស្ត្រខេត្តបន្ទាយមានជ័យ កំពុងហក់ឡើងយ៉ាងខ្លាំង ដោយសារទឹកហូរធ្លាក់ចុះមកខាងក្រោម។ នេះបើតាមការអះអាងរបស់លោក អ៊ុំ រាត្រី អភិបាលខេត្តបន្ទាយមានជ័យ ពេលដែលលោកដឹក ក្រុមការងារជំនាញ ចុះពិនិត្យស្ថានភាពទឹក នៅព្រឹកថ្ងៃទី ១៥ ខែកញ្ញា ឆ្នាំ ២០២២ នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្តបន្ទាយមានជ័យ បានអំពាវនាវដល់ប្រជាពលរដ្ឋ ដែលរស់នៅបណ្តោយដងស្ទឹង ប្រឡាយ បឹងបួ និងស្ទឹង ត្រូវតែមានប្រុងប្រយ័ត្នឲ្យបានខ្ពស់ ពិសេសក្មេងតូចៗព្រោះវាអាចនឹងបង្កគ្រោះថ្នាក់លង់ទឹកមួយប៉ប្រិចភ្នែកតែប៉ុណ្ណោះ។ ក្នុងការចុះពិនិត្យនេះ លោក អ៊ុំ រាត្រី បានប្រាប់ឲ្យដឹងថា លោកបានដឹកនាំកម្លាំង ក្នុងនោះមានលោក រ័ត្ន ដាស៊ីណង់ អភិបាលស្រុកមង្គលបូរី មន្ត្រីសាលាស្រុក កងកម្លាំងទាំងបីប្រភេទ លោកមេឃុំ ក្រុមប្រឹក្សាឃុំ បានចុះពិនិត្យ វាយតម្លៃ ស្ថានភាពទឹកជំនន់និងផលប៉ះពាល់លើប្រជាពលរដ្ឋដែល រស់នៅប្របស្ទឹង និងអាស្រ័យផល តាមបណ្តោយដងស្ទឹងមង្គលបូរី ក្នុងការចុះពិនិត្យស្ថានភាពទឹកជំនន់ដែលធ្លាក់មកពីប៉ែកខាងលិចនៃឃុំសឿ ដូចជានៅសំណង់ព្រែកសឿ នៅភូមិបល្ល័ង្គជ្រៃ ឃុំសឿ និងពិនិត្យសាលាបឋមសិក្សាជំនីកឃុំសឿ ព្រមទាំងបន្តចុះពិនិត្យ ស្ថានភាពទឹក តាមឃុំចំណោម រហាត់ទឹក បត់ត្រង់និង ឃុំឫស្សីក្រោក តាមដងស្ទឹងមង្គលបូរី ផងដែរឃើញថា ស្ថានភាពទឹកហូរបានធ្លាក់ពីទីខ្ពស់មកកាន់តំបន់ទំនាបបឹង និងស្ទឹងដែលបានធ្វើឱ្យស្ថានភាពមានការកើនឡើង កន្លែងខ្លះមានការជន់លិចផ្លូវផងដែរ។

លោក អ៊ុំ រាត្រី បានបញ្ជាក់ឲ្យដឹងទៀតថា លោកមិនបណ្តែតបណ្តោយឲ្យប្រជាពលរដ្ឋណារងទុក្ខ ដោយសារទឹកជំនន់ដែលត្រៀមលិចផ្ទះប្រពលរដ្ឋនេះឡើយ លោកបានត្រៀមកម្លាំងសមត្ថកិច្ច ៣ស្ថាប័ន រួមមានកម្លាំងអាវុធហតខេត្ត កម្លាំងស្នងការនគរបាលខេត្ត និងយោធារដ្ឋបាលខេត្តក្រុង ស្រុក និងត្រៀមជួយដឹកជញ្ជូនជម្លៀសប្រជាពលរដ្ឋណា ដែលត្រូវទឹកជំនន់លិចលង់ទាំងអស់ទៅដាក់ទីទួលសុវត្ថិភាពហើយ ក្នុងនោះក៏មានត្រៀមធ្វើការចែកស្បៀងឲ្យហូបជាបណ្ដោះអាសន្នផងដែរ។

លោកបានធ្វើការផ្តាំផ្ញើដល់ប្រជាពលរដ្ឋណា ដែលបម្រុង និងលិចផ្ទះសម្បែងដោយទឹកជំនន់នោះ ត្រូវចេះថែទាំសុខភាព សម្អាតអនាម័យជុំវិញខ្លួន កែប្រែទម្លាប់អវិជ្ជមាន និងយកចិត្តទុកដាក់ធ្វើអនាម័យជាប្រចាំ ដើម្បីការជំងឺឆ្លងនានា។ សូមអាជ្ញាធរ ស្រុក ឃុំ គ្រប់លំដាប់ថ្នាក់ និងប្រជាពលរដ្ឋទូទាំងខេត្តសូមបង្កើនការយកចិត្តទុកដាក់ ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងដោយយថាហេតុផងដែរ៕

អត្ថបទ៖ វ៉ាន់ ណាង