ឈាបនដ្ឋានជាច្រើន កសាងដើម្បីបូជាសពអ្នកជំងឺកូវីដ និងសពទូទៅ ក្រោយបិទឈាបនដ្ឋានកណ្ដាលរាជធានី

រដ្ឋបាលរាជធានីភ្នំពេញ បានកសាងឈាបនដ្ឋានជាច្រើន វត្តប្រសិទ្ធីរីម្មារាម ដើម្បីបូជាសពអ្នកជំងឺ កូវីដ-១៩ ហើយក្រោយបញ្ចប់វិបត្តិកូវីដ-១៩ ឈាបនដ្ឋាននេះ នៅតែមានតួនាទីយ៉ាងសំខាន់ក្នុងការបូជាសពប្រជាពលរដ្ឋទូទៅ ខណៈឈាបនដ្ឋាននៅកណ្តាលរាជធានីនឹងត្រូវបានបិទ ដោយបង្វែរទិសមកកាន់ទីតាំងជាយក្រុងវិញ។

ក្រោយបញ្ចប់ពិធីបុណ្យកាន់បិណ្ឌវេនទី១០ នៅព្រឹកថ្ងៃទី២០ ខែកញ្ញានេះ នៅវត្តប្រសិទ្ធីរីម្មារាម សង្កាត់ពន្សាំង ខណ្ឌព្រែកព្នៅ អភិបាលរាជធានីភ្នំពេញ លោក ឃួង ស្រេង មានប្រសាសន៍ថា វត្តប្រសិទ្ធីរីម្មារាម ជាវត្តថ្មីមួយដែលបានកសាងសមិទ្ធផលជាច្រើន ហើយអ្វីដែលសំខាន់នោះ ទីអារាមនេះ ក្រោមការណែនាំពី សម្ដេចអគ្គមហាសេនាបតីតេជោ ហ៊ុន សែន រដ្ឋបាលរាជធានីភ្នំពេញ បានកសាងឈាបនដ្ឋានជាច្រើន ដើម្បីបូជាសពអ្នកដែលស្លាប់ដោយសារជំងឺ កូវីដ-១៩ ខណៈប្រទេសកម្ពុជា ក៏ដូចជានៅលើពិភពលោកត្រូវបានរាតត្បាតខ្លាំងដោយជំងឺកូវីដ-១៩។

អភិបាលរាជធានី មានប្រសាសន៍បន្តថា៖ “វត្តនេះបានដើរតួយ៉ាងសំខាន់ ដោយយើងបានបង្កើតឈាបនដ្ឋានជាច្រើន ដើម្បីបូជាសពអ្នកដែលស្លាប់ដោយសារជំងឺ កូវីដ-១៩ ជាមួយនឹងការផ្តល់មឈូស កោដ្ឋ ដោយមិនគិតថ្លៃជូនប្រជាពលរដ្ឋ ដែលមានបងប្អូន សាច់ញាតិ ស្លាប់ដោយជំងឺកូវីដ-១៩ នេះផងដែរ”។

លោកឃួង ស្រេង មានប្រសាសន៍បន្ថែមថា នេះជាការយកចិត្តទុកដាក់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ដោយសម្តេចមិនត្រឹមតែរំដោះប្រទេសជាតិចេញពីរបប ប៉ុល ពត និងការកសាងអភិវឌ្ឍប្រទេសឱ្យរីកចម្រើនប៉ុណ្ណោះទេ សម្តេចបានដើរតួនាទីយ៉ាងសំខាន់ ក្នុងការរំដោះអាយុជីវិតបងប្អូនប្រជាពលរដ្ឋពីការរីករាលដាលពីជំងឺកូវីដ-១៩ថែមទៀត ដោយសម្តេចបានដាក់ចេញនូវវិធានការបិទខ្ទប់រាជធានី ជាមួយនឹងការស្រោចវ៉ាក់សាំងការពារជំងឺ កូវីដ-១៩ ជូនប្រជាពលរដ្ឋទូទាំងព្រះរាជាណាចក្រកម្ពុជា ដែលបានធ្វើឱ្យជំងឺនេះបានថមថយ និងឈានទៅដល់ការបើកឱ្យដំណើរការសេដ្ឋកិច្ចប្រទេសជាប្រក្រតីឡើងវិញ។

លោក ឃួង ស្រេង បានបញ្ជាក់បន្តថា៖ “ទីតាំងឈាបនដ្ឋានខាងលើនេះ មានទំហំដីជាងមួយហិចតា ហើយក្នុងតំណាក់កាលកូវីដ-១៩ កំពុងរីករាលដាលខ្លាំង ទីតាំងនេះបានដើរតួយ៉ាងសំខាន់ក្នុងការបូជាសព ដោយប្រើប្រាស់ពេលវេលានៃការដុតសព ម្នាក់ប្រមាណជាង ១ ម៉ោងប៉ុណ្ណោះ ដោយឈាបនដ្ឋាន២ មានឡចំនួន៨”។

លោកបញ្ជាក់ថា ឈាបនដ្ឋាននេះ មានទីតាំងធំទូលាយ សម្រាប់ធ្វើពិធីបុណ្យ។ ក្រោយបញ្ចប់កូវីដ-១៩ ឈាបនដ្ឋាននេះក៏នៅតែមានតួនាទីយ៉ាងសំខាន់ក្នុងការបូជាសពសម្រាប់ប្រជាពលរដ្ឋទូទៅ ខណៈឈាបនដ្ឋាននៅកណ្តាលរាជធានីនឹងត្រូវបិទ ដោយបង្វែរមកកាន់ទីតាំងខាងលើនេះវិញ៕

អត្ថបទ៖ ស្រីរ័ត្ន