​ផ្លូវល្បឿនលឿន​ភ្នំពេញ-ព្រះសីហនុ​ត្រៀមដាក់ដំណើរ​ការសាកល្បង​នៅថ្ងៃទី ១ ដើមខែតុលា ​ធ្វើដំណើរមួយ​ខែដំបូង​មិនគិតថ្លៃ​

​ផ្លូវល្បឿនលឿន​ភ្នំពេញ-ក្រុងព្រះសីហនុនឹងដាក់ឱ្យដំណើរការសាកល្បងនៅថ្ងៃទី ១ ខែតុលា នេះ ដោយ​មិនគិតថ្លៃក្នុងរយៈពេលមួយខែដំបូងសម្រាប់ប្រជាពលរដ្ឋប្រើប្រាស់។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងឱ្យដឹងថា គិតត្រឹមថ្ងៃទី ២១ ខែកញ្ញានេះ ដំណើរការសាងសង់​ស្ទើតែសម្រេចបាន ១០០ភាគរយទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទេសរដ្ឋមន្ត្រី​បានស្នើសុំទៅសម្ដេចតេជោ ហ៊ុន សែន នាយករដ្ឋមន្ត្រី ​ក្នុងការ​កំណត់​ពេល​វេលា​សម្ពោធដាក់ឱ្យប្រើប្រាស់ជាផ្លូវការ​នៅខែវិច្ឆិកាបើអាចធ្វើទៅបាន។

ផ្លូវល្បឿនលឿន​ភ្នំពេញ-ក្រុងព្រះសីហនុ បានបើកការដ្ឋានសាងសង់នៅថ្ងៃទី ២២ ខែមីនា ឆ្នាំ ២០១៩ ​តាមកិច្ចព្រមព្រៀងផ្លូវនេះត្រូវសាងសង់ឱ្យហើយរួចរាល់នៅខែឧសភា ឆ្នាំ ២០២៣ ប៉ុន្តែ​តាម​សំណូមពររបស់រាជរដ្ឋាភិបាល ​ក្រុមហ៊ុនបានខិតខំសាងសង់ផ្លូវនេះឱ្យបានចប់នៅខែ៩ ពោល​គឺ​មុន ៨ខែ នៃគម្រោង។

ផ្លូវល្បឿនលឿន​ភ្នំពេញ-ក្រុងព្រះសីហនុ​មានចម្ងាយ ១៨៧ គីឡូម៉ែត្រ ប្រើប្រាស់ថវិកាជាង ២ ពាន់លានដុល្លារអាមេរិក ជាថវិការបស់ក្រុមហ៊ុនវិនិយោគចិន៕

អត្ថបទ៖ ឡេង ដេត