ព័ត៌មានជាតិ

រដ្ឋសភាប្រកាសទទួលស្គាល់សុពលនៃអាណត្តិតំណាងរាស្ត្រពីររូបជាផ្លូវការ

បានផុស

៦ years មុន

នៅ

ថ្ងៃអង្គារ ២៩ ធ្នូ ២០២០

ដោយ

ភ្នំពេញ ៖ រដ្ឋសភាបានប្រកាសទទួល ស្គាល់សុពលនៃអាណត្តិតំណាងរាស្ត្រពីររូបផ្លូវការ នៅព្រឹកថ្ងៃទី២៩ ខែធ្នូនេះ ក្នុងសម័យប្រជុំរដ្ឋសភាលើកទី៥ នីតិកាលទី៦ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណាងរាស្ត្រថ្មីទាំងពីររូបនេះ មានឯកឧត្តម លី ស៊ុគ្រី ជាតំណាងរាស្ត្រថ្មីមណ្ឌលខេត្តតាកែវ ជំនួសឯកឧត្តម សុខ សូកាន ដែលបានសុំលាលែង និងឯកឧត្តម សៅ ស៉ារ៉ាត់ ជាតំណាងរាស្ត្រថ្មីមណ្ឌលខេត្តប៉ៃលិន ជំនួស លោក ជំទាវ បាន ស្រីមុំ ដែលបានលាលែង។

បន្ទាប់មកសម័យប្រជុំពេញអង្គរដ្ឋសភា ក៏បានបោះឆ្នោតជ្រើសតាំង ឯកឧត្តម ខៀវ ភារិទ្ធ ជាសមាជិកគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ ដោយទទួលបានសម្លេងឆ្នោតយល់ព្រមចំនួន ១១០សម្លេង សម្លេងឆ្នោតមិនព្រម ០ សម្លេង សម្លេងឆ្នោតអនុប្បវាទ ០ សម្លេង និងសម្លេងឆ្នោតមោឃ: ០សម្លេង និងជ្រើសតាំងលោកជំទាវ នូ សុវណ្ណនី ជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ដោយទទួលបានសម្លេងឆ្នោតយល់ព្រមចំនួន ១១០សម្លេង មិនព្រម ០ សម្លេង អនុប្បវាទ ០ សម្លេង និងសម្លេងឆ្នោតមោឃ: ០សម្លេង។

សម្តេចអគ្គមហាពញាចក្រី ហេង សំរិន ប្រធានរដ្ឋសភា បានប្រកាសថា យោងតាមលទ្ធផលបោះឆ្នោតនេះ ឯកឧត្តម ខៀវ ភារិទ្ធ ទទួលបានសម្លេងជាប់ឆ្នោតជាសមាជិកគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ និងលោកជំទាវ នូ សុវណ្ណនី ទទួលបានសម្លេងជាប់ឆ្នោតជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៅថ្ងៃទី២៩ ខែធ្នូ ឆ្នាំ២០២០ ក្នុងសម័យប្រជុំរដ្ឋសភាលើកទី៥ នីតិកាលទី៦៕
ដោយ ៖ ប៉ាល់សុង