មន្ត្រីជាន់ខ្ពស់ចុះសិក្សា និងកំណត់ទីតាំងសាង​សង់​ស្ថានីយអង់តែន នៅតាមគោលដៅទេសចរណ៍នៅខេត្តកែប

មន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍ ដឹកនាំដោយលោក ជា មានិត រដ្ឋលេខាធិការក្រសួងប្រៃសណីយ៍និងទូរគមនាគមន៍ សហការជាមួយប្រតិបត្តិករផ្តល់សេវាទូរសព្ទចល័តប្រតិបត្តិករផ្តល់សេវាបង្គោលអង់តែន និងប្រតិបត្តិ ករផ្តល់សេវាហេដ្ឋារចនាសម្ព័ន្ធបណ្តាញខ្សែកាបទូរគមនាគមន៍ បានចុះសិក្សា និងកំណត់ទីតាំងសាងសង់ស្ថានីយ អង់តែននៅតាមគោលដៅទេសចរណ៍អាទិភាព និងតំបន់ទេសចរណ៍ដាច់ស្រយាលនៅក្នុងខេត្តកែប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះសិក្សា និងកំណត់ទីតាំងសាងសង់ស្ថានីយអង់តែននៅតាមគោលដៅទេសចរណ៍អាទិភាពនៅខេត្តកែបនេះ មាន រយៈពេល២ថ្ងៃ គឺថ្ងៃទី២៨ -២៩ ខែកញ្ញា ឆ្នាំ២០២២ ដែលធ្វើឡើងអនុវត្តតាមអនុសាសន៍ដ៏ខ្ពង់ខ្ពស់របស់សម្ដេចតេជោនាយករដ្ឋមន្រ្តី និងស្របតាមយន្ដការរបស់លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ដែលបាន បង្កើតក្រុមការងារលើកកម្ពស់គុណភាពសេវាទាំង៥តំបន់កាលពីខែឧសភា ឆ្នាំ២០២១ កន្លងមក។

លោក ជា មានិត បានឱ្យដឹងថា ការចុះត្រួតពិនិត្យនេះដើម្បីសិក្សាស្វែងយល់ និងកំណត់ទីតាំងសម្រាប់ដំឡើងអង់តែនទូរសព្ទនៅទីតាំងចំនួន៣ នៅក្នុងខេត្តកែបរួមមាន ១.តំបន់សហគមន៍ទេសចរណ៍កោះទន្សោយ ២.ឧទ្យានជាតិកែប និង ៣.តំបន់អេកូទេសចរណ៍ភ្នំវល្លិ៍ និងគោលដៅទេសចរណ៍អាទិភាពផ្សេងទៀត។

យោងប្រសាសន៍ណែនាំដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្រសួងប្រៃសណីយ៍ និងទូរគមនាគមន៍ (ក.ប.ទ.) ក្រុមការងារអន្តរក្រសួង និងស្ថាប័នពាក់ព័ន្ធ បានរៀបចំកិច្ចប្រជុំ និងចុះត្រួតពិនិត្យសិក្សាគុណភាពសេវាទូរគមនាគមន៍តាមគោលដៅទេសចរណ៍អាទិភាព តំបន់ការពារធម្មជាតិ និងតំបន់ទេសចរណ៍ដាច់ស្រយាលនៅទូទាំងប្រទេស ចាប់ពីខែកញ្ញា ឆ្នាំ២០២២នេះតទៅ ដើម្បីពង្រឹងគុណភាពសេវា និងបានជាមូលដ្ឋានក្នុងការសាង​សង់បង្គោលអង់តែនចំនួន១០០ដូចដែលមានចែងក្នុងសេចក្ដីប្រកាសព័ត៌មានរបស់ ក.ប.ទ. ចុះថ្ងៃទី១៤ ខែកក្កដា
ឆ្នាំ២០២២ ជាមួយគ្នានេះក្រសួងបានបង្កើតក្រុមការងារលើកកម្ពស់គុណភាពសេវាដោយបានបែងចែកជា៥តំបន់៕

អត្ថបទ៖ សំអឿន